Marku 4 - Matu Chin New Testament 2006

Caangti Tuhkung oen Thuidoetna

¹ Jesuh lawng Galili Tuilii keeng ah te cang puei koep ham a tong. A tengah aka tun thlaangping te ayahawh aih dawngah lowng khuila kuun tih te ah te ngawl. Lowng te tuiluung ah awm tih thlaangping tah tuiliikeeng tui tengah pai u.

² Ahimi te thaihu yahawh hlang cang puei ham thuidoetna te a hawna tih ahimi nala te;

³ “Hutung u lah! Voei khat ah lo khuehkung thlaang pakhat tah caangti tuh hamla cet.

⁴ Ahih lawng lo khuiah caangti te a tuh vengah khatsut tah lawngpui ah tla, va thli law tih kang a ruh boeih.

⁵ Caangti khatsut tah Lungrawng sawkah dilai a pamna ah tla, dilai a pam dawngah kawlkalh ah caangti te po.

⁶ Tede khaw a ling hang atah caangkung te khawling lawng a kaang, a yung a phooeng dawngah kawlkalh ah yai tih reu.

⁷ Caangti khatsut tah thliing tim ah tla, thliingkung te roeng hang, caangkung te a diik khoep tih a vui athaih awm nawh.

⁸ Tede caangti khatsut tah laitheen dawngah tla tih po, roeng hang tih a vui athaih thawn. Khatsut tah a pueh sawmthum, atloe hue te tah sawmruk, yakhat toela puung.

⁹ Jesuh lawng awlcuina ah, “Hutung uh, yaakna haa aka khueh lawngtah ya seh” a tina.

Thuidoetna Awl Kah A Mengtengna

¹⁰ Jesuh te amah bueng a awm vengah a awlthui aka ya thlaang khatsut lawng a hubang thlaihih hue oen a tengla haih law u tih thuidoetna awl te thuicaih pe ham a ceel u.

¹¹ Jesuh lawng, “Pathen Ram kah awlhuep tah nangmi tengah m'peek poen. Tede adauben ah aka awm thlaangtloe lawngtah thuidoetna awl bueng oen ni thaihu he a yaak u,

¹² tedawngah, ‘Ahimi lawngah a bueh khing u de hu u nawh; Ahimi lawngah a hutung khiing u de yaakming u nawh. Metihtiah ahimi lawng hu tih yaakming u kawinih Pathen tengla meel u vetih khawdawp a ngaai pe ai.” tila a thui angla awm ai” a tina.

Caangti Tuhkung Thuidoetna Awl Thuicaihna

¹³ Tecoengah Jesuh lawng ahimi nala te, “He kah thuidoetna awl he na yaakming u nawh aw? Te tih atah metila atloe thuidoetna thli te na yaakming u thai ai?

¹⁴ Caangti tuhkung lawng Pathen awl te a tuh,

¹⁵ Thlaang khatsut tah lawngpui ah aka tla caangti oen lo u; Ahimi lawng awl a yaak pek vengah te Seitan lawng law tih a kaw khuiah a tuh awl te a rot pe.

¹⁶ Atloe thlaang thli tah dilai a pamna lungrawng sawah aka tla caangti oen lo u. Pathen awl te a yaak u vengah awmngaih la pahoei a do u.

¹⁷ Tede ahimi kah thinkaw lungbui ah a thlengyung a thlaak nawh dawngah asan hlang awm nawh. Tedawngah Pathen awl kawng dawngah thekha raina oen heemtekna soeprep a law vengah ahimi lawng kawlkalh ah a hoett pahoei u.

¹⁸ Atloe thlaang thli tah thliing tim ah aka tla caangti oen lo u. He thli lawng Pathen awl te a yaak u,

¹⁹ tede he dilai khawsakna dawngah lakuengna, bawireng ham ngaihna soeprep lawng kuun tih Pathen awl te a tleng khoep dawngah ahimi tah a vui athaih awm nawh.

²⁰ Tede atloe thlaang thli tah lai theen dawngah a tuh caangti oen lo u. Ahimi lawng Pathen awl te a yaak u vengah a do u tih a vui athaih thawn. Khatsut tah a pueh sawmthum, khatsut tah a pueh sawmruk, khatsut tah a pueh yakhat toela thawn.” a tina.

Beeldung oen A Muek Haiim

²¹ Jesuh lawngah, “A-u lawngkhaw haiim te a khuen tih beeldung oen a muek khoep aw? Tih nawh atah ihkhun huiah khaw a khueh u aw?

²² Ahuep ahel ah a thuh boeih te a tuengna huen ah pho boeih vetih muek dah la aka awm boeih te khaw a daih boeih ai.

²³ Tedawngah yaakna haa na khueh u atah ya uh” a tina.

²⁴ Tecoengah Jesuh lawng ahimi nala, “Na yaak u te anepla poek uh! Thlaangtloe awlcekna ham na hawna a taring van te nang awlcekna ham Pathen lawng a hawna van ai, te lak ah anauh ngaai la a hawna tare ai.

²⁵ A-u khaw aka khueh moek te a tawm athap pe vetih aka khueh nawh te a khueh duen Pateng khaw a lawh pe ai.” a tina.

Caangti aka Po oen Thuidoetna

²⁶ Tecoengah Jesuh lawng, “Pathen Ram tah he oen lo u. Thlaang pakhat lawng a lo khuiah caangti a heh.

²⁷ Khaw a yiin atah ip, mincang ah tho tih hingthun ah bii a bi, tevengah caangti tah po tih roeng hang. Tede caangti te metila a po hang tih a roeng hang tite ming nawh.

²⁸ Dilai lawng akung te a roeng sak tih a thaih sak. Lamhacuek-la a raaidueng thoeng, tecoengah caangvui te thoeng tih hukhueng ah caangvui dawngah a cang te a awm sak.

²⁹ Caang te hiin tih caang ah tue apha vengah thlaang lawng vin oen caang te a ah,” tila a thui pe.

Antammu oen Thuidoetna

³⁰ Jesuh lawng, “Pathen Ram he n'tu oen a lawh u tila n'thui lah ai? Thuicaihna ham me ang thuidoetna n'hawna u lah ai?

³¹ Te tah he oen lo u. Thlaang pakhat lawng dilai dawngkah amu-ati boeih lak ah aka yiit koek antammu thaam at te a lawh tih a tue.

³² Tecoengah po tih a roeng hang atah tawitlim anno thing boeih lak ah aka bo koek la awm. A beek thli te abo hlang la cawn, va thli law u tih a khuup ah bu a tuk u,” a tina.

³³ Jesuh lawng ahimi kah yaakming thai khoek ah he ang thuidoetna atloe khaw a hawna tih Pathen awl a thui pe.

³⁴ Ahih lawng thuidoetna hawna muehla ahimi tengah awl thui pe nawh, tede Jesuh he a hubang hue oen amami bueng a awm u vengah soeprep thaihu boeih te a thuicaih pe.

Jesuh Lawng Thlipui A Dip Sak

³⁵ Te khawhin thlemben ah Jesuh lawng a hubang hue nala, “Tuilii khatben rall la cet u sih,” a tina.

³⁶ Tedawngah ahimi lawng thlaangping te a ceh taak u tih Jesuh a ngawlhna lowng khuila a hubang hue te kuun u tih Jesuh te a ceh puei u. Lowng atloe thli khaw teah te awm.

³⁷ Poek mueh maila, thlipui tho khuengdeng tih tuiphu te lowng khuila a kuun dawngah lowng khuiah tui be tawm.

³⁸ Jesuh tah lowng a mai ben ah te awm tih luudoelh dawngah te muelh ip. A hubang hue lawng a thawh u tih, “Saya, mami n'duek boeih poen ai he, n'tu la na sak nawh aw?” a tina u.

³⁹ Jesuh lawng tho hang tih thlipui te awl a peek, “Thli tlaih boel, duem loeih!” a tina. Tevengah thlipui lawngkhaw duem tih dipsiditla awm.

⁴⁰ Tecoengah Jesuh lawng a hubang hue nala te, “N'tu ah he tila na rih u aih? Tahe toe oengna na khueh u nawh hun aw?” a tina.

⁴¹ Tevengah ahimi lawng caalla a rih u tih, “He thlaang he a-u kai? Thlipui oen tuilet lawng Pateng awl a ngaai pe mai!” tila khat oen khat ti u.