Marku 15 - Matu Chin New Testament 2006

Pilat haiah Jesuh A Khuen U

¹ Mincanghi ah khawsoeih ahaamca thli tah Judah ahaamca thli, Phungawl cangpueikung thli, awlcekna khonsil ah aka thuum boeih oen ah tun huh u tih khaw a khan u. Jesuh te thiirui oen a khih u, a ceh puei u tih Pilat kut ah a peek u.

² Pilat lawngah, “Nang he Judah sengpahrang tang aw?” tila awl a doet. Jesuh lawng, “Na thui angla soeng,” a tina.

³ Khawsoeih ahaamca thli lawngah Jesuh te thawlh broela a peel u.

⁴ Tedawngah a doet koep tih, “Awl na thung pe nawh ai aw? Ahimi kah thawlh peel boeih he hutung lah!” a tina.

⁵ Jesuh lawng awl kam at khaw thui nawh toeng toeng tih Pilat tah a kawpoek la rai.

Jesuh te Ngawn ham Awl A Tloek U

⁶ Kaantaak Poei apha veng roekk ah thawngtla pakhat rangpui lawng a bih te Pilat lawng a thlah poepa.

⁷ Tevengah raal la aka tho thli oen thong haih aka tla, raal la a thawh u vengah thlaang aka ngawn Barabbas a miingna thongtla thlaang pakhat te awm.

⁸ Thlaangping lawngah law u tih poei vengah thongtla pakhat thlah noek angla te thlah sak ham Pilat tengah a bih u.

⁹ Pilat lawng ahimi te, “Nangmi lawngah Judah sengpahrang he thlah sak ham na ngaih u aw?” tila a doet.

¹⁰ Pilat lawng, ka kut dawngah Jesuh avan pha sak u he khawsoeih ahaamca thli lawng a uett u dawngah ni tite atheencala a ming.

¹¹ Tede khawsoeih ahaamca thli lawng thlaangping te a ceemtuh tih Barabbas dai lat te thlah sak ham Pilat tengah a bih u.

¹² Pilat lawng thlaangping te, “Tetih atah Judah sengpahrang he ta metila sai sak ham na ngaih u?” tila koep a doet.

¹³ Ahimi lawngah, “Thinglam dawng-ah ngawn!” tila paang u.

¹⁴ Pilat lawng, “Ahih lawngah n'tu thawlhna a sai?” tila a doet. Ahimi lawngah, “Thinglam dawngah ngawn!” tila angaihhlangla paang tare u.

¹⁵ Pilat lawng thlaangping te ngaitluep sak ham a ngaih dawngah Barabbas te a thlah pe. Tecoengah Jesuh te cungpoelh oen a bawh tih ngawn hamla ahimi kut ah a peek.

Raalkap thli lawng Jesuh Nuihbu la A Sai

¹⁶ Raalkap thli lawngah Jesuh te ram ukbawi kah impui talawng vawngup khuila te a ceh puei u tih raalkap bu khat te a khue tih tun kueng u.

¹⁷ Ahimi lawng Jesuh te himbaidung lingduuk te a bai sak u tih thliing oen a veh bawilen lumuek te a muek sak u.

¹⁸ Tecoengah thekha thangpawmna la: “Judah Sengpahrang a hinglung vaang hawn seh!” ti u.

¹⁹ A luu ah cungpoelh oen a bawh u tih a tumthoeih u, a haiah khuklu oen cuengkueng u, a luu a khun u tih a bok u.

²⁰ Te tila nuihbu kamring la a sai u coengah himbailing te a dul pe u tih amah kah himbai te a bai sak koep u. Tecoengah ahimi lawng thinglam dawngah ngawn hamla te a khuen u.

Thinglam dawng Jesuh A Ngawn

²¹ Lawngpueng ah khaawte ben kalawng khawpui la aka law Simon aka miingna thlaang pakhat a hum u tih raalkap thli lawng Jesuh kah thinglam te amangkhak la a kawh sak u. (Simon he Sairin khaaw kah Alekzandar oen Rutas kah ana pa ni.)

²² Jesuh te Golkota huen ben la te a ceh puei u. Golkota ti he tah “Luuruh huen” ti ngaihna ni.

²³ Te huen ah te mura oen a pawlh haih misurtui te a tuul u, tede Jesuh lawng aw nawh.

²⁴ Tecoengah ahimi lawng Jesuh te thinglam dawng a tai u, ahimi lawngah talcung a suh u tih a himbai te rek ara u.

²⁵ Ahimi lawng mincang khawnoek pakua vengah Jesuh te thinglam dawng a tai u.

²⁶ Ahih thawlh peelna thinglam dawng a tai u te tah, “Judah sengpahrang” tila a thut.

²⁷ Ahih oen thlaanghuuen pahih khaw a bantang ben ah pakhat, a banvoei ben ah pakhat a tai haih u.

²⁸ He tila te caciim lawngah, “Thlaangthawlh tim ah ahih te a thuum sak” a ti awl te soep.

²⁹ Te kah aka cet paitai thli lawngkhaw, a luu te halh a voeih u tih Jesuh te a tamdeng kawkhahna u: “Aw! Nang aw, Tempal bok-im te ka phe vetih hin thum khuiah ka sak koep ai na ti!.

³⁰ Thinglam dawng kalawng tahe ah rum thuk langtah namah oen namah thlawn u lah!” a tina u.

³¹ Tetih van la te khawsoeih ahaamca hue oen Phungawl Cangpueikung hue lawngkhaw Jesuh te a nuihna u, “Thlaangtloe tah a thlawn de amah oen amah tah thlawn u thai nawh he ta!.

³² Israel sengpahrang Messiah te thinglam dawngkah a rum thuk te tahe ah hu u lah sih, te atah mami lawng n'tangna ai ta! ti u. Jesuh amah oen a tai haih thlaang pahih te lawngkhaw ahih te athe akhana hih van.

Jesuh A Duekna

³³ Hingthuntaang ah ram pum boeih te khawnoek pathum khui yiinna lawng a thiing khoep.

³⁴ Thlemben khawnoek pathum tue vengah Jesuh lawng, “Eloi, Eloi, Lama sabaktani?” tila angaih hlang la paang. A thuingaihna tah, “Ka Pathen, ka Pathen, n'tu kawngah nan hoett sut?” ti ngaihna ni.

³⁵ A teng kah aka pai thlaang khatsut lawng ahih kah paang awl te a yaak vengah, “Hutung lah! Ahih lawng Elijah a khue! ti u.

³⁶ Ahimi tim kah thlaang pakhat lawng palh cet tih him baipeen te a lawh, misurtui thuii dawngah a nuem tih rawkuih dawngah a piin. Jesuh te a kaa ah a tuh tih “Ring de lah! thinglam dawngkah thlawn hamla Elijah va rum ai nuem, bueh u lah sih,” ti u.

³⁷ Jesuh lawng angaihhlangla paang, tecoengah duek.

³⁸ Tevengah Tempal bok-im khuikah baiyaan te asaw kalawng adang toe pahih la poet pheuh u.

³⁹ Thinglam haiah aka pai raalbawipa lawng metila Jesuh a duek tite a huh vengah, “He thlaang he tah Pathen Capa tangtang ni!” tila a thui.

⁴⁰ Te kah aka awm hutaa khatsut lawngtah athla kalawng a dan u. Ahimi tim ah Meri Makdalin, anoca Jeem oen Josep kah a manu Meri oen ah Salome mi khaw thuum u.

⁴¹ Galili ah Jesuh a awm vengah ahimi lawng a hu ah baang u tih a bawm a ceem u. Atloe hutaa hue lawngkhaw Jerusalem la te law u tih ahimi oen ah te awm u van.

Jesuh Rawkk Vuina

^42-43 Khaw a thlem atah Arimatia khaaw kah Josep te va law. (Ahih avan pha vengah te khawthlem poen.) Ahih tah awlcekna Khonsil ah aka thuum hinyah koei thlaang pakhat van tih Pathen a law te aka ring thlaang ni (Te Khawhin tah rueng-aphongna Huet hin, Sabbath pha thlan khawhin ni.) Tedawngah Josep lawng tawng-aa ohla Pilat tengla cet tih Jesuh rawkk te a bih.

⁴⁴ Pilat lawng Jesuh duek poen tila a yaak vengah a kawpoek la rai. Ahih lawng raalbawi te a khue tih Jesuh a duekna san poen aw tila a doet.

⁴⁵ Raalkap bawi kah awl thui te a yaak coeng atah, Pilat lawng Jesuh rawkk te Josep a lawh sak.

⁴⁶ Josep lawng rawkk yaawlna himbai a lai, a rawkk te thinglam dawngkah a lawh tih himbai oen te a yaawl coengah thel a thuk heet thlann lungkaw khuiah te a up. Tecoengah lungto bohlang a plet u tih phuel thawhka te a tleng.

⁴⁷ Meri Makdalin oen Josep manu Meri mi khaw awm van tih Jesuh kah a rawkk upna huen te a huh hih.