Marku 12 - Matu Chin New Testament 2006

Misur Dum ah Bii Bina oen thuidoetna

¹ Jesuh lawng ahimi te thuidoetna oen a thui pe. Jesuh lawngah, ‘Vaikhat ah misur dum aka sai thlaang pakhat awm tih dum te vawng oen khoep a thung, misurtui suina ham ungrawm a to tih a toetna ham paw a sak. Tecoengah dum te thlaang a vat tih amah tah khawlawng thla la te cet.

² Misur thaih bit tue veng atah dum aka vat thlaang thli tengah a sal pakhat te a tuih tih a dang ham koei dum khang te a lawh sak.

³ Dum aka vat hue lawng a salpa te a tuuk tih a bawh u, thaihu khat khaw peek ohla atliingla a mel sak u.

⁴ Tecoengah dum khuehkung lawng atloe sal pakhat te a tuih; dum aka vat hue lawng a luu ah a bawh u tih yarau yahdeng la a khueh sut u.

⁵ Dum khuehkung lawng atloe sal pakhat te a tuih koep de a ngawn pe u; atloe sal thli te khaw te tila a sai u, khatsut te a bawh u tih atloe hue te a ngawn u.

⁶ Dum khuehkung lawng a tuih ham tah a lungduet amah capa khat bueng te ni a awm poen. Hukhueng atah, ka capa he tah dum aka vat hue lawng a hinyah ai a ti dawngah a capa te a tuih.

⁷ Tede dum vat hue lawng, ‘Ahih he dum khuehkung kah a capa ni. Law uh, ngawn u sih, ahih kah ro thaihu he mami kah koeva la awm ai,” ti u.

⁸ Tedawngah ahimi lawng a capa te a tuuk u, a ngawn u tih a rawkk te misur dum adau benla a voeih u.

⁹ “Tetih atah dum khuehkung lawng ahimi te metila a tina ai?” tila Jesuh lawng a doet. “Ahih lawng law vetih dum aka vat hue te a ngawn ai, misur dum te thlaangtloe a vat ai.

¹⁰ “Caciim lawng: Imsakung thli lawng aphu aka awm nawh angla a hoett u lungto te atloe boeih lak ah aphu aka awm koek Lungto la awm.

¹¹ He tah Bawipa lawng a sai ni. Mami mik huh ah kawpoek rai la awm', tila a thui te na tae noek u nawh aw?” a tina.

¹² Judah ahaamca hue lawng he thuidoetna he amami te ni a thui ee-tla thil tite a ming u dawngah Jesuh te tuuk hamla kamthlah u, tede thlaang rangpui te a rih u dawngah a ceh taak u.

Mangmu Peekna Kawng

¹³ Farasi khatsut hue oen Herod kah thlaang khatsut hue Jesuh te awl doet tih a awl thui dawng teah a thawlhna tuuk pe hamla te a tuih u.

¹⁴ A tengla te law u tih, “Saya, nang tah awltak na thui yoeyah, thlaang kah poekna khaw n'tu la na ngaai nawh. Nang lawngtah thlaang mik-hai khaw na dan nawh tih Pathen kawngaih awltak te thlaang na cang puei tite ka ming u. Rom Sengpahrang Sangluel tengah mangmu peek he mami kah Phungawl oen kalh u kai aw? Ahimi he mangmu peek ham tueng aw, peek tueng nawh aw? van thui lah,” a tina u.

¹⁵ Tede Jesuh lawng ahimi kah thailatna te a ming tih, “Me tih ti kawngah kai he kamah awl thui dawngah thawlhna tuuk ham na ngaih u? Ngun tangka pheek at ah van khuen u lah, ka bueh lah ai,” a tina.

¹⁶ Ahimi lawng ngun tangka pheek at avan khuen pe u tih, “A-u kah muei-ame oen miing aka awm?” tila Jesuh lawng a doet. Ahimi lawng, “Rom Sengpahrang Sangluel kah muei-ame oen a miing awm,” a tina u.

¹⁷ Tedawngah Jesuh lawng, “Tetih atah Sengpahrang kah koeva te Sengpahrang pe u langtah Pathen koe te Pathen pe uh,” a tina. Te tila te ahimi tah Jesuh sawah a kawpoek rai sut u.

Thawhkoepna Kawng Doetna

¹⁸ Tecoengah Sadusi thlaang khatsut, duek coengah thawhkoepna awm nawh aka ti hue te Jesuh tengla law u tih,

¹⁹ “Saya, kaimi ham Mosi lawngah he tila phungawl a thut: ‘Thlaang pakhat lawng a ca cuun muehla duek tih a yu te a ro sut oh atah, aka duek kah ca anau la a ca sak pe ham huhainu te a manau lawng yuna seh,’ ti.

²⁰ Vai at tah boenhui thlaang pasarih awm u; ahaam koek lawngah a yu a lawh de a ca sak mueh la duek.

²¹ Tecoengah apabena lawngah a maya yu te a pang de ahih khaw a ca sak muehla duek. Te tila te apathumna te khaw awm tih,

²² atloe hue khaw te tila awm u boeih. Boenhui pasarih lawng te hutaa te a yuna u de a ca sak ohla duek boeih u. Hukhueng atah te hutaa khaw duek.

²³ Te hutaa te boenhui boeih lawng a yuna u dawngah thawhkoepna khawhin, thlaangduek boeih a thawh vengah, te hutaa te a-u kah yu la a awm ai?” tila a doet u.

²⁴ Jesuh lawng ahimi nala te, “Na poek thawlh u nawh pai he! N'tu ah ka poek thawlh u ti he na ming u aw? Nangmi lawng Caciim khaw, Pathen kah tharana khaw na ming u nawh dawngah ni.

²⁵ Metihtiah thlaangduek a thawh koep veng atah vaan kah vanthlaang thli angla awm u vetih yuvaa ti he awm manawh.

²⁶ Thlaangduek thawhkoepna kawng: Mosi kah cabu dawngah tangpuem a ungna kawng awl te na tae noek u nawh aw? Te cabu dawngah a thut tah Pathen lawng Mosi nala, “Kai tah Abraham Pathen, Isak Pathen, oen Jakob Pathen la ka awm,” a tina te ta.

²⁷ Ahih tah aka hing thlaang thli kah Pathen la awm tih aka duek thlaang thli kah Pathen nawh ni. Nangmi lawng na poek thawlh u tangkiik” a tina.

Aka Lenduet Awlpeek

²⁸ Te tila awl a thui u te aka ya Phungawl cangpueikung pakhat teah te awm. Jesuh lawng Sadusi hue kah awldoetna atheencala a thung pe te a huh vengah awl doet ham a tengla law tih, “Awlpeek boeih boeih ah ame ang awlpeek nuem awlpui koek?” tila a doet.

²⁹ Jesuh lawng, “Awlpui koek pakhatna tah he ni: “Israel thlaang thli hutung u lah! Mami kah Bawipa Pathen bueng ni Bawipa la a awm.

³⁰ Bawipa na Pathen te na thinkaw lungbui boeih oen na hingna boeih oen, na kawpoek boeih oen, na tharana boeih oen ah lungnah”.

³¹ A pabena awlpui koek awlpeek tah, “Namah oen namah te na lungna van angla na imbe te lungnah” a ti he ni. He rawi pahih lak-ah awlpui ngai atloe awlpeek awm tlaih nawh”. a tina.

³² Phungawl, cangpueikung lawng Jesuh nala te, “Saya, Boehoeng theen! Bawipa bueng he Pathen la awm tih ahih bueng nawh tah Pathen tloe awm nawh.

³³ Tedawngah thlaanghing lawng Pathen te thinkaw lungbui boeih oen kawpoek boeih oen tharana boeih oen ah lungna ham awm tih m'mah kah pum n'lungna van angla imbe te khaw lungna ham awm. He awlpeek pahih n'vai he tah Pathen tengah boknathaang dawngah boiava thawthuengna oen atloe thawthuengna lak-ah awlpui ngaai la awm” a tina.

³⁴ Ahih lawng cuihna oen awl a thung pe te Jesuh lawng a yaak vengah ahih nala te, “Nang tah Pathen ram oen na thla nawh”, a tina. He coeng kalawng tah Jesuh he a-u lawngkhaw awl doet ha tlaih nawh.

Messiah Kawng Doetna

³⁵ Jesuh Lawng Tempal bok-im khuiah a cang puei vengah he tila awl a doet, “Metila Phungawl cangpueikung hue lawng Messiah tah Devid kah cadil nauha la awm ai tila a thui u thai kai?

³⁶ Aciim Muithla kah bawnghorhna rang oen Devid amah lawng: “Bawipa lawng ka Bawipa tengah: Na raal thli te na khowpha huiah ka khueh thlantoe ka bantang ben ah ngawl” a tina.

³⁷ Devid amah lawng ahih te, “Bawi-pa”; tila a khue atah metila Messiah te Devid kah cadil nauha la a awm thai ai?” a tina. Thlaangping hue lawng Jesuh awl te awmngaihcala a hutung u.

Phungawl Cangpueikung te Ngaithuen Uh

³⁸ Jesuh lawng te tila a cang puei vengah te, “Phungawl cangpueikung hue he ngaithuen uh, ahimi lawng himbai dunghlang oen yingyawi a ngaih u tih dawr yun ah khaw thlaang lawng hinyahna oen n'voem n'toei lah sui tila a ngaih u,

³⁹ sinakok bok-im ah athloekla ahooep atlaang ngawlhna oen poei saina ah huen theen ngawlhna te a tuek u.

⁴⁰ Huhai tumtee thli kah a ruemm thaihu ralring capau te a lawh pe u tih ahimi kah a im thli te a rot pe u, tecoengah thlaang kah yaak theen la asanhlangla thangthui u. Ahimi te a the-eepla dan a tat ai.

Huhainu kah Peekna

⁴¹ Jesuh tah tempal bok-im kah tangka bawm tengah te ngawl tih thlaang thli kah tangka a sang u te a doen. Kuirang thlaanglen thli lawng tangka yahawh hlang a sang u te a huh;

⁴² Tevengah te huhainu khawdeng pakhat law van tih ruhum tangka pheksaseen pahih te a sang.

⁴³ Tecoeng atah a hubang hue te a khue tih, “Atak tang kavan thui u, he kah huhainu khawdeng lawng thlaangtloe boeih lak ah tangka bawm khuiah yahawh ngaai a sang poen.

⁴⁴ Metihtiah atloe hue lawngtah a khuehtoen khuikah acoeih aphe te ni a sang u; tede he huhainu tah khawdeng de a khueh duen te a peek kik poen,” tila a thui pe.