Luka 22 - Matu Chin New Testament 2006

Jesuh Ngawn ham Khawkhanna

¹ Kaantaakpoei, Tawlru aka thuum nawh Takawi Poei tah atue yoeii poen.

² Khawsoeih ahaamca thli oen Phungawl cangpueikung thli lawng thlaangping te a rih u dawngah Jesuh te ahuepla ngawn ham along a-im tlap hamla a yawm u.

Jesuh Sawah Paipi Thleep Ham Judah A Kaw Tla

³ Tevengah hubang paha thlaihih khuiah aka thuum Iskariot a ti u Judas kaw khuila Seitan te kuun.

⁴ Tedawngah Judas tah khawsoeih ahaamca thli oen tempal bok-im aka toet raal bawi thli tengla cet tih Jesuh te ahimi kut ah peek thaina ham koei akawng te a thui u.

⁵ Ahimi tah a kaw hoe soeh u tih ahih te tangka peek ham awl a khueh u.

⁶ Te tila te Judas khaw a kaw tla van tih thlaangping lawng he kawng he ming ohla Jesuh te ahimi kut ah peek ham atue theen te tlap ham a tong.

Kaantaak Poei Buh Roekbahna

⁷ Tawlru thuum mueh Takawi Poei vengkah Kaantaak poeibuh hamla tuuca ngawn ham khawhin te a pha.

⁸ Jesuh lawng Piter oen Johan te he tila awl a uen tih a tuih: “Cet hih langtah mami kah caak ham Kaantaak Poei te roekbah hih” a tina.

⁹ Ahih rawi lawngah, “Ame huen ah roekbah sak ham na ngaih?” tila a doet.

¹⁰ Ahih lawng, “Nanghih lawng khawpui khuila na kuun vengah tuithaan thlaang pakhat oen na hum u ai. Ahih a kuunna im khuila te vai poe hih langtah,

¹¹ Imkung nala te, ‘Saya lawng, me kah akhann khuiah nuem Kaantaak Poei buh te ka hubang hue oen ka caak ai?’ ti, tila thui peh.

¹² Ahih lawngah im han kah akhann kau hlang thaihu a cungkuem la aka awm te n'huh sak ai, te ah te thaihu soeprep te roekbah hih,” a tina.

¹³ Ahih rawi tah cet hih tih Jesuh lawng a thui pe angla soeprep te a huh tih Kaantaak Poei buh te a roekbah hih.

Bawipa Thlembuh

¹⁴ Atue a khoek vengah Jesuh lawng caboi te a hubang hue oen haih a veel u.

¹⁵ Ahimi nala te, “Kai lawngah patang palai ka khang thlan ah Kaantaak Poei buh he nangmi oen veel haih hamla ka ngaih tangkiik!

¹⁶ Nangmi tengah kavan thui u, metihtiah Pathen Ram khuiah he kah poei buh lawng thuingaihna tangtang te a tueng sak thlantoe tah ka ca tlaih manawh.” a tina.

¹⁷ Tecoengah Jesuh lawng boengloeng te a lawh tih Pathen tengah awmngaih awl a thui, “He he lo u langtah nangmi khat oen khat rekra u lang aw uh.

¹⁸ Kavan thui u, tahe kalawng ah Pathen Ram a pai thlantoe misurtui he ka aw tlaih manawh.” a tina.

¹⁹ Tecoengah takawi te a lawh tih Pathen tengah awmngaih awl a thui coeng atah takawi te a eh tih ahimi te a peek, “He tah ka pum ni, nangmi ham kan peek te ni. Nangmi lawng kai he nan poek khuepna ham he tila sai uh.” a tina.

²⁰ Tetih toengtoeng la thlembuh caak coengah boengloeng te ahimi a peek tih, “He kah boengloeng he tah nangmi ham ka hok ka thi oen ah ka cak sak Pathen kah awlkam thaai ni.

²¹ Tede, bueh lah! Ka sawah paipi aka thleepkung tah caboi tengah ka awm haih.

²² Pathen kah awltloek angla Thlaanghing Capa tah duek ai, tede ka sawah paipi aka thleep thlaang ham tah khawmap tangkiik mah aw!” a tina.

²³ Tecoeng atah ahimi khat oen khat te a-u lawngah he kah thaihu he a sai ai tila doet u.

Aka Lenduet kawng Awlpuungna

²⁴ A hubang hue lawng amami tim ah a-u nuem aka lenduet la poek ham aka awm ti u tih awl puung u.

²⁵ Jesuh lawng ahimi te, “Pathen aka oeng nawh sengpahrang thli lawng thlaang rangpui sawah aana a khueh u tih ukkung bawi thli lawngkhaw amami te ‘Thlaang rangpui te aka lungvatkung ni’ ti u.

²⁶ Tede nangmi tah te tila awm ham nawh ni; nangmi timkah aka lenduet lawngtah anoca koek angla awm ham ni, mawtkung lawngah tuihyoeihthlaang angla awm ham ni.

²⁷ A-u aka lenduet, buh caak ham aka ngawl thlaang aw, tihnawhtah buhteemkung aw? Aka ngawl thlaang te lenduet ta. Tede, kai tah nangmi tim ah buh teem an teem angla ka awm.

²⁸ “Nangmi lawngtah suek-halhna ka tawngna boeih ah nan awm puei u;

²⁹ a Pa lawng ka tengah ukna aana m'peek van angla nangmi khaw kan pe van ai.

³⁰ Nangmi lawngtah ka Ram khuiah kamah kah caboi dawng na caak na awkk u vetih Israel phun paha thlaihih te uk hamla bawi ngawlhcoen dawngah na ngawl u ai.

Piter Kah Basana Kawng Jesuh Lawng A Thui Oepsoeh

³¹ Jesuh lawng, ‘Simon, Simon! Hutung lah! Lotoenkung lawng caangtak oen caanghii a pekthlee angla athe khui kalawng atheen te thloeng ham, nangmi boeih te noekdak hamla Seitan lawng saithaina nawl a dang poen.

³² Tede Simon, na oengna te a tlaakna nawh ham ah nang ham ka thangthui. Tecoengah ka tengla koep na maang phai vengah na maya manau thli te tha van ra sak.” a tina.

³³ Piter lawng, “Bawipa, nang oen thong tlaak haih ham khaw, duek haih ham khaw oepsoeh la ka awm poen” a tina.

³⁴ Jesuh lawngah, “Piter, kavan thui, n'tu yiin ah, kai he ka ming ka tung nawh tila voei thum toe na thui thlan atah aai khawk manawh.” a tina.

Tangkabawm, Sawngsa Oen Samsen

³⁵ Tecoengah Jesuh lawng a hubang thli nala te, “Kai lawng nangmi te tangkabawm, sawngsa oen khowmuek khaw khuen sak ohla kan tuih u vengah te avoetna awm aw?” tila a doet. Ahimi lawngah, “Khat khaw voet mai nawh” a tina u.

³⁶ Jesuh lawng, “Tede, tahe atah tangkabawm khaw, sawngsa khaw khuen uh, a-u khaw samsen te a khueh nawh atah angki te yooei selang lai seh.

³⁷ Kavan thui u, metihtiah caciim lawngah, ‘Ahih tah thlaangthawlh la a toek haih poen’ tila kai kah kawng alam a thut te asoep ham awm, metihtiah kai kah kawng alam a thut sut te noenoe soep poen.

³⁸ A hubang hue lawng, “Bawipa, bueh lah! He ah samsen pahih awm!” a tina u. Ahih lawngah, “Te mah khoek poen” a tina.

Olif Tlaang Ah Jesuh Thangthui

³⁹ Jesuh lawng a sai nooek angla khawpui te a thawh taak tih Olif Tlaang la te cet, a hubang hue khaw ahih oen haih cet u.

⁴⁰ Te huen ah a pha u veng atah ahimi nala te, “Suek-halhna khuiah na tlaak thawlh nawh ham thangthui uh.” a tina.

⁴¹ Tecoengah ahimi teng kalawng lungto kutdi daawng khoek athlana ah cet tih khuklu oen cuengkueng tih thang-thui.

⁴² “A Pa, na kawngaih atah he kah patang khangna boengloeng he ka teng kalawng khoe hawn. Tede kai kah kawngaihna boel selang na kaw-ngaih angla sai hawn.” tila thangthui.

⁴³ Vaan kah vanthlaang pakhat a tengah phumpho tih ahih te tha a peek.

⁴⁴ Thin thiip uett ah kawsi dung tangkiik la thangthui tih a sotui te thisen angla dilai ah cip.

⁴⁵ A thangthuina kalawng tho hang tih a hubang hue tengla te cet phai, ahimi tah kawthe uett ah tawnba sut u tih a ih muelh u te a huh.

⁴⁶ Ahimi nala te, “N'tu ah na ih muelh u? Suekna khuiah na tlaak thawlh nawh ham tho lang thangthui u lah.” a tina.

Jesuh A Tuuk U

⁴⁷ Jesuh te awl a thui lii vengah thlaangping te avan pha, hubang thlaihih khuiah aka thuum Judas lawngah te avan law puei. Ahih lawng Jesuh te mok hamla a tengla tang va law.

⁴⁸ Tede Jesuh lawng, “Judas, nang lawngah mokna oen aw Thlaanghing Capa he na thak ai? a tina.

⁴⁹ Jesuh tengah aka awm a hubang hue lawngah te tila thaihu aka thoeng te a huh u vengah ahimi lawng, “Bawipa, samsen oen ka tloek u ai aw?” a tina.

⁵⁰ Ahimi timkah thlaang pakhat lawng Khawsoeih Bawi kah a sal te a bantang haa pat a tloek pe.

⁵¹ Tevengah Jesuh lawng, “Yoeh mah seh!” a tina. Ahih lawng te thlaang kah a haa te a tek tih a hoeih pe sak.

⁵² Tecoengah Jesuh lawng khawsoeih ahaamca thli oen tempal bok-im aka toet thli kah a bawi hue oen ah a tengla aka law ahaamca boeih nala te, “Kai he thlaanghuuen la ka awm dawngah aw nangmi lawng samsen oen boelhoen oen ah nan law thil u?

⁵³ Kai he khawhin roekk ah Tempal bok-im ah nangmi oen n'awm u ta, tevengah te nan tu u nawh. Tede yiin tharana lawng a uk lii tahe vengah he nangmi kah saina hamla a tue theen ni.” a tina.

Piter Lawng Jesuh A Hoett

⁵⁴ Ahimi lawng Jesuh te a tuuk u tih Khawsoeih Bawi im la te a ceh puei u; Piter lawngah athla ngaai kalawng soei soei a vai.

⁵⁵ Talawng luung ah hai a toeih u, hai te a aawm u tih ngawl u, Piter khaw te ah te ngawl van.

⁵⁶ Hai kungah Piter a ngawlh te tuih-yoeihthlaang hutaa pakhat lawng a huh vengah a bueh rang patang tih, “He kah thlaang he khaw Jesuh oen aka awm haih ni!” ti.

⁵⁷ Tede Piter lawng a oelh tih, “Hutaa nang, ahih te ka ming moenih” a tina.

⁵⁸ Tecoeng a awm bawt ah thlaang pakhat lawng Piter te a huh nooek dawngah, “Nang khaw, ahimi timkah thlaang pakhat van ni” a tina. Tede Piter lawng, “Kai he ahimi timkah thlaang nawh ni” a tina.

⁵⁹ Tecoengah khawnoek pakhat yunyan a diw raih coeng atah thlaangtloe pakhat lawng, “Ahih he khaw Jesuh oen aka awm haih ni, uepvoetna tehca khaw awm nawh, metihtiah ahih he Galili thlaang la khaw awm!” tila rapcaat la a thui.

⁶⁰ Tevengah Piter lawng, “Nang lawng na thui akawng alam he ka ming moenih!” a tina. Awl a thui lii vengah aai te khawk pahoei.

⁶¹ Bawipa tah dak maang tih Piter te rangpatang la a bueh heet, tevengah Piter lawng, “N'tu yiin aai a khaawk thlan ah kai he kan ming nawh tila voei thum toe na basa ai” tila Bawipa lawng a thui pe te lot a poek.

⁶² Piter te adaubenla cet, a kawsi la dung tih rap.

Jesuh te Thekhala A Bawh U

⁶³ Jesuh amah te aka toet raalkap thli lawngah thekha la a sai u tih a bawh u.

⁶⁴ Ahimi lawngah a mik te khoep a yeen pe u tih a doet u, “A-u lawng nang n'bawh? Thui lah!” a tina u.

⁶⁵ Te tila te ahimi lawngah thekhana awl tloe broela a thui u.

Awlcekkung thli Khonsil Haiah Jesuh A Khuen U

⁶⁶ Khaw a daai veng atah Judah thlaang ahaamca thli, khawsoeih haam thli oen Phungawl cangpueikung thli te tun huh u tih Jesuh te awlcekkung thli khonsil haiah avan law puei u.

⁶⁷ Ahimi lawngah, “Nang he Messiah aw, van thui lah?” a tina u. Ahih lawngah, “Kai lawngah ka thui cakhaw na tangna u manawh;

⁶⁸ awl kan doet u cakhaw navan thung tang u manawh.

⁶⁹ Tede tahe kalawng tah Thlaanghing Capa he Thara koek Pathen bantang ben ah ka ngawl poen ai.” a tina.

⁷⁰ Ahimi boeih lawngah, “Te atah nang he Pathen Capa aw?” tila a doet u. Ahih lawng ahimi nala, “Na thui u angla Pathen Capa ni.” a tina.

⁷¹ Tevengah ahimi lawngah, “Aka mingkung sausi khat khaw ngoe tlaih nawh! Amah awlthui te mami lawng n'yaak rep poen!” ti u.