Luka 21 - Matu Chin New Testament 2006

Huhai Kah Thaihu Peek

¹ Jesuh lawng maang tih a teng avai te a dan vengah Tempal bok-im kah tangkakong khuiah kuirang thli lawng tangka a sang u te a huh,

² Khawdeng tangkiik huhai pakhat lawng ruhum pheksa pahih a sang te khaw a huh.

³ Tevengah ahih lawng, “Atak tang kavan thui u, thlaangtloe boeih lak ah he kah khawdeng koek huhai lawng yahawh ngaai te a sang poen.

⁴ Metihtiah thlaangtloe hue lawngtah amami kah khuehtoen bawi alenna dawngkah acoeih aphe te ni a peek u, tede he hutaa he tah khawdeng de amah kah hingna ham a khueh duen te a peek kik poen” a tina.

Jesuh Lawng Tempal Bok-im Pawna kawng A Thui

⁵ A hubang khatsut hue lawngah Tempal bok-im lungto theen theen oen dan ngaih danthluela thoekcauna oen Pathen tengah kutdo peekna akawng te a thui u.

⁶ Tevengah Jesuh lawngah, “He kah na huh boeih he, lungto khatca khaw ceh taak ohla apum boeih la a voeih dingkangna atue te avan pha ai.” a tina.

Patang Khangna oen Heemtekna

⁷ Ahimi lawngah, “Saya, metuek vengah he tila a awm ai? Atue apha poen tite noekna ham n'tu aka thoeng ai?” tila a doet u.

⁸ Jesuh lawng, “Ngaithuen uh; a-u lawngkhaw n'thaina boel seh. Thlaang broe lawngah ka miing oen law ai, ‘Kai tah ahih poen ni! Atue a pha poen!’ ti ai. Tede ahimi hu ah te bang u boel.

⁹ Nangmi lawng raal thawhna oen ceemtloekna te na yaak u vengah rih u boel; te ang thaihu te lamhacuek ah va thoeng ai, te ang thli te aboetna tah yoeii poen ti ngaihna nawh ni.” a tina.

¹⁰ Tecoengah a awl thui te a tom tih, “Ram pakhat oen khat kaap u the ai; thlaangphun khat oen khat thekyak u the ai.

¹¹ Khaaw yat ram yat ah rih-awm likluei hinghuen ai; khawthe khawkha oen tlawhtahaw awm ai; vaan kalawng miknoekna oen rih-awm thaihu thoeng ai.

¹² He kah thaihu boeih he a thoeng thlan ah nangmi te n'tuuk u vetih n'heemtek u ai; nangmi te sinakok ah awlcek ham n'ceh puei u vetih thongim ah n'thlaak ai; kai kawngah sengpahrang thli oen ukkung bawi thli haiah n'khuen ai.

¹³ He tah Awlthang Theen phawngna ham ah nangmi hamla atue theen la awm ai.

¹⁴ Namah oen namah te metila ka phungtu u ai tite lakueng u boel, thincak la awm oepsoeh uh,

¹⁵ metihtiah na raal thli a-u khatca lawngkhaw oelhtaih thai nawh tih taa thai nawh hamla nangmi lawng na thui ham koei awl oen cuihna te kan peek ai.

¹⁶ Nangmi te na nu oen na pa lawngkhaw, na boenhui lawngkhaw, na paya lawng-khaw raal kut ah m'peek u vetih nangmi timkah khatsut te tah a ngawn u ai.

¹⁷ Kai kawngah nangmi te thlaang boeih lawng n'thina ai.

¹⁸ Tede na luu dawngkah sam te thaam at mai khaw ha ata manawh.

¹⁹ Acakla pai lah, tetih atah namah oen namah te na thlawn u ai.

Jerusalem a Pawna kawng Jesuh Lawng A Thui

²⁰ “Jerusalem khawpui te raal thli lawng a veel khoep te na huh u vengah adiw thlan ah rawk poen ai tila te ming uh.

²¹ Tevengah Judia ram khuiah aka awm thlaang thli lawng tlaang sawm la heeng u seh; khawpui khuiah aka awm thlaang thli lawng khawpui te co taak u seh, khaaw teng khaaw vai ah aka awm thlaang thli lawng khawpui khuila kuun u boel seh.

²² Metihtiah te hin te tah, ‘Dantatna Khawhin’ la a awm dawngah Caciim lawng a thui te soep ai.

²³ Te khawhin tah bungpum vawn-um oen cacuun naukem hutaa thli ham tah khawmap sut maimah aw! He kah ram khuiah rih-awm mueirihtamyiin te thoeng vetih he kah thlaang thli sawah Pathen kah dantatna te thoeng ai.

²⁴ Thlaang khatsut te samsen oen a ngawn u vetih atloe hue te tah ram tawm ah saltamnaa la a khuen ai; thlaangphun tloe lawng amami kah atue atang te aboet thlantoe Jerusalem te a khow huiah a khueh ai.

Thlaanghing Capa Lawna

²⁵ “Te atah khawmik, thla oen aisi thli dawngah, noekna alakloe te thoeng ai. Dilai sawkah ram boeih lawng tuitunlii kah tuisambaak awl oen tuilet thawh awl te a rih u vetih ngaihang khawbing la awm ai.

²⁶ Dilai pum ah aka law ham koei te thlaang thli lawng a poek doen u vengah a rih u vetih thuen ai, metihtiah vaan kah huham tharana te hinghuen ai.

²⁷ Tecoengah thlaanghing capa tah ruep-awmna oen bawilen tharana oen muui dawngah a rum thuk te a huh u ai.

²⁸ He thaihu thli a thoengna ham atong poen atah pai u langtah na luu te thawh u lah, metihtiah nangmi thlawnna ham tah yoeii poen” a tina.

Thaidut Thing dawngkah Cuihna Cang

²⁹ Tecoengah Jesuh lawng ahimi tengah he kah thuidoetna he a thui pe: “Thaidut thing oen atloe thingthaih boeih te poek u lah.

³⁰ A dawn thaai a cawn hang te nangmi lawng na huh u vengah khawhaal hungkang tue tah yoeii poen tila na ming u.

³¹ Tetih van angla he kah thaihu thli a thoeng te nangmi lawng na huh u vengah Pathen Ram tah law poen ai tila ming uh.

³² He he hilh u boel, tahe ah aka hing thlaang thli he a duek boeih thlan ah he kah thaihu thli he va thoeng ai.

³³ Vaan oen dilai tah khum ai, tede ka awl he tah mevengah khaw khum manawh.

Ngaithuen Angoe

³⁴ “Ngaithuen u lah! Nangmi lawng awmtheen awmyaal poeibuh caak awkk oen dilai han khawsak lakuengna te poek u aih boel, te tila na awm u veng bawtbet khawlai ah te kah Khawhin lawng nangmi teng avan pha ai.

³⁵ Metihtiah te tah dilai saw khaaw tawm ah aka awm thlaang boeih sawah thoeng ai.

³⁶ He kah aka law ham koei thaihu thli he ading asuekla pooeng ahana ham, tharana khueh tih Thlaanghing Capa haiah paina thai ham ahuertuela awm u langtah thangthui yoeyah uh.” a tina.

³⁷ Jesuh lawng khawdaai atah Tempal bok-im ah thlaang thli te a cang puei, thlemben atah Olif Tlaang la cet tih khawyiin atah te ah te ip yoeyah.

³⁸ Thlaang boeih lawngah ahih awl te hutung hamla mincanghi ah Tempal bok-im la te cet u.