Luka 19 - Matu Chin New Testament 2006

Jesuh Oen Zakia

¹ Jesuh tah Jeriko khaw la kuun tih te kalawng poe cet.

² Te ah te Zakia aka miingna mangmu cawikung bawi pakhat awm tih ahih tah bawireng tangkiik.

³ Jesuh he a-u kai ti tih huh hamla a yawm, tede ahih tah thlaang hemm la awm tih thlaangping lawng a thlip khoep dawngah Jesuh te hu thai nawh.

⁴ Tedawngah Jesuh a cehna koei ben ah thlaangping kah hai benla heeng phai tih ahih te a huhna ham thaihba thing dawngah luui.

⁵ Jesuh lawng te huen te a pha atah asaw benla maang hang tih Zakia nala te, “Zakia, aloela rum thuk, tihin ah nang im ah ka pah ai.” a tina.

⁶ Zakia tah aloela rum thuk tih awmngaih cala ahih te a pah sak.

⁷ Te tila a awm te thlaang thli lawng a huh u vengah, “He kah thlaang he thlaang-thawlh im ah pah hamla a ceh maica!” ti tih caitoek u.

⁸ Zakia lawng pai hang tih Bawipa nala te, “Bawipa, hutung lah! Ka khueh thaihu avaang athal ah khawdeng thlaang thli ka pe ai, thlaang ka thai ka latna tih thaihu ka lawh pe atah apueh asawm let lii la ka sah ai.” a tina.

⁹ Ahih te Jesuh lawng, “He kah im ah thlawnna ti hin ah a pha poen, metihtiah ahih khaw Abraham kah cadil van ni.

¹⁰ Thlaanghing Capa tah thlaangha paataam tlap ham oen ah thlawn ham ni a law.” a tina.

Sui Tangka oen Thuidoetna

¹¹ Thlaangping hue lawng awl a hutung u lii vengah he kah thuidoetna pakhat he a thui pe. Jerusalem te a pha tawm u poen tih ahimi lawngtah Pathen Ram he tueng pahoei poen ai tila a poek u.

¹² Tedawngah tila a thui pe, “Voei khat ah areng aka sang thlaang pakhat awm tih sengpahrang la coengg ham khaw thla la cet, tecoeng atah im la meel koep hamla te kamthlah.

¹³ A ceh thlan ah tuihyoeihthlaang paha te a khue, ahimi te sui tangka pheek at rip a peek tih, “Khawlawng la ka ceh ruet ah, he kah tangka oen thaihu thaiha yooei uh.” a tina.

¹⁴ Tede ahih te a ram khuikah thlaang thli lawng a thina u dawngah laipai a tuih u tih, “He kah thlaang he kaimi lawngah sengpahrang la ka ngaih u nawh.” tila te a thui sak u.

¹⁵ Te kah thlaang te sengpahrang la a awm coeng atah koep meel. A tuihyoeihthlaang thli lawng tangka apuung ataai meyoeh a dang kai tite ming a ngaih tih ahimi te pahoei a khue.

¹⁶ Lamhacuek kah thlaang te law tih, ‘Bawipa! Nang lawng nan peek tangka pheek at oen thaihu thaiha ka yoeih tih apuung ataai sui tangka pheek ha ka dang,’ a tina.

¹⁷ Tevengah ahih lawng, ‘Theen! Nang tah aka theen tuihyoeihthlaang ni! Nang tah thaihu tehca dawngah uep-awm la na awm tih khawpui paha ukkung la kan khueh ai.’ a tina.

¹⁸ Tecoengah a pahihna tuihyoeihthlaang te law tih, ‘Bawipa, nang lawng nan peek tangka pheek at oen thaihu thaiha ka yoeih tih apuung ataai sui tangka pheek ngaa ka dang,’ a tina.

¹⁹ Ahih te khawpui pa-ngaa ukkung la na awm ai,’ a tina.

²⁰ Atloe tuihyoeihthlaang te law tih, ‘Bawipa, nang kah tangka te awm ngoen he; baipeen oen ka cuun tih ka kuem mangkhak ta.’ a tina.

²¹ Nang tah amangkhak thlaang la na awm tih kan rih tangkiik. Nang lawngtah namah kah thaihu nawh khaw na lawh tih caangti na tuh nawh te khaw na ah mai? a tina.

²² Ahih nala te, ‘Nang thlaangthe tuihyoeihthlaang! Na awlthui te namah awlcekna ham ka hawna ai! Kai he amangkhak thlaang, kamah kah thaihu nawh khaw ka lawh tih caangti ka tuh nawh te khaw ka ah te na ming ta.

²³ Theen, te atah, n'tu ah tangka kuemna bengh ah ka tangka te na khueh nawh? Ka meel koep vengah tangkaca oen acingrang la ka dang ai ta.’ a tina.

²⁴ Tecoengah te kah aka pai thlaang thli nala te, “Ahih tengkah sui tangka te lo u langtah tangka pheek ha aka khueh tuihyoeihthlaang te pe uh.’ a tina.

²⁵ Tede ahimi lawng, ‘Bawipa, ahih tah tangka pheek ha a khueh poen ta!’ a tina u.

²⁶ Ahih lawng awl a thung pe tih, ‘Kavan thui u, yahawh hlang aka khueh te yahawh ngaai a peek ai; tede aka khueh nawh te a khueh duen Pateng khaw a lawh pe ai.

²⁷ Kai he amami kah sengpahrang la awm sak ham aka ngaih nawh ka raal thli te van law puei u langtah ahimi te ka hai ah ngawn uh!’ a tina” tila a thui pe.

Taana oen Jerusalem La Kuun

²⁸ Jesuh lawng he kah thuidoetna awl he a thui coengah ahimi haiah Jerusalem la te cet.

²⁹ Olif Tlaang tengkah Betfat oen Bethani khaaw te a pha u tawm atah a hubang pahih te hai la a tuih tih tila awl a uen:

³⁰ ‘Na hai kah khaaw la ke an cet hih langtah khaaw khuila na kuun hih vengah a-u lawngkhaw a cit thlan lacano pakhat a kiing u te na huh pahoei hih ai. A kiingna rui te thlam hih langtah he la he van khuen.

³¹ Thlaang pakhat khat lawngah n'tu ham rui te na thlam a ti atah, Bawipa lawng a ngoe tila thui peh.” a tina.

³² Ahih rawi lawng cet hih tih Jesuh lawng a thui pe angla soeprep boeih te a huh.

³³ Ahih rawi lawng lacano a khihna rui te a thlam hih lii vengah la khuehkung lawngah ahih rawi nala te, “N'tu hamla rui te na thlam hih?” a tina.

³⁴ Te rawi lawngah, “Bawipa lawng a ngoe,” a tina hih tih,

³⁵ Jesuh tengla lacano te a khuen pe. Tecoengah ahimi lawngah amami kah himbai te lacano kah a uen dawngah a phaih u tih Jesuh te a ngawlh sak u.

³⁶ Jesuh lawng lacano te a cit tih a ceh phai vengah thlaangping lawng amami kah himbai te lawngpui ah a phaih u.

³⁷ Jerusalem te a pha tawm tih Olif Tlaang tengkah singlingla lawngpui a rum thukna ahuen kalawng tah a hubang thli thlaangping lawngah kawpoek rai thaihu thli te a huhna dawngah Pathen te a uem u tih angaih-hlangla a thangpawm u:

³⁸ “Bawipa miing oen aka law sengpahrang tah Pathen lawng yotheen kam-awmna pe hawn seh! Vaan ah roepna awm selang Pathen tengah ruep-awmna awm hawn seh!” tila paang u.

³⁹ Tevengah thlaangping timkah Farasi thlaang khatsut lawng Jesuh nala te, “Saya, na hubang thli he awl a phahna ham thui pe lah,” a tina u.

⁴⁰ Jesuh lawngah, “Kavan thui u, ahimi lawng awl phah sap kawinih lungto thli lawng amah poek ah paang ai ta.” a tina.

Jesuh Lawng Jerusalem A Rah

⁴¹ Jerusalem khawpui te a pha tawm tih, Jerusalem te a huh atah rap.

⁴² “Tihin ah ngaimawngna hamla n'tu angoe ti bueng mah te na ming u mai kawinih! Tede nang lawng tahe ah na hu thai nawh!

⁴³ Nang he na raal thli lawngah raalvawng oen ceemraal oen ah n'duum khoep vetih khatben khatbang kalawng n'khaih khoepna khawhin te a pha ai.

⁴⁴ Ahimi lawngah nang te m'phe phengvel vetih na vawngup khuiah na thlaang thli te a ngawn dingkang poen ai. Ahimi lawng lungto khatca khaw khupthal ohla awmna huen ah ceh taak u manawh, metihtiah nang thlawn hamla Pathen a lawna atue atang te na ming nawh dawngah ni!” a tina.

Jesuh Tempal Bok-im La Cet

⁴⁵ Tecoengah Jesuh tah Tempal bok-im khuila kuun tih thaihu aka yooei thlaang thli te pheng a vai,

⁴⁶ ahimi nala te, “Caciim dawngah, Pathen lawng, ‘Kai kah Tempal bok-im tah thangthuina im tila a thui u ai.’ tila a thut te ta. Tede nangmi lawngtah thlaanghuuen pa caan thli kuepyingna la na sai u poen.” a tina.

⁴⁷ Jesuh lawng khawhin roekk ah Tempal bok-im khuiah a cang puei u. Khawsoeih ahaamca thli, Phung-awl cangpueikung thli oen thlaangping mawtkung thli lawng ahih te ngawn ham a ngaih u,

⁴⁸ tede thlaang boeih lawng ahih awl te a thung u tih lung at khaw thlauh ham a ngaih u nawh dawngah ahimi lawng te tila te sai ham along a-im hu u nawh.