Luka 17 - Matu Chin New Testament 2006

Thawlhna

¹ Jesuh lawng a hubang hue tengah, “Thawlhna khuiah thlaang aka tlaak sak thaihu thli awm ngai khoek ai, tede te ang tlaakna te aka sai thlaang thli ham tah khawmap tangkiik!

² He camaw tim kah pakhat mai khaw thawlh sak lak atah caang neetna lungto bohlang a rawn a awi tih tuitunlii khuiah tla kawinih ahih ham theen bet ai.

³ Tedawngah na sai ham koei te ngaithuen uh! Na boenhui te a thawlh atah ahih te toel athaam, a yut alawi atah a sawah khawdawp ngaai peh.

⁴ Ahih lawng hin at ah voei sarih na sawah thawlhna a sai tih voei sarih van na tengah law tih, ‘Ka yut oh poen,’ a ti atah a sawah khawdawp van ngaai peh,” a tina.

Oengna

⁵ Celtuih thli lawng Bawipa nala, “Kaimi kah oengna he van roeng sak lah,” a tina u.

⁶ Bawipa lawngah, “Nangmi lawng antammu teh mai mah oengna te na khueh u atah he kah songlet thing he, ‘Na yung oen haih ah namah poek ah phuk u langtah tuitunlii ah namah poek ah liing u lah,’ na tina atah nangmi awl te avan ngaai ai,” a tina.

Tuihyoeihthlaang Lawng Sai Ham Koei

⁷ “Nangmi tim kah thlaang pakhat lawngah laithawl aka sai mai khaw, tuudoen mai khaw seh tuihyoeihthlaang pakhat na khueh ti mai lah sih. Ahih te lo kalawng law tih a paipuek ah, ‘Aloela buh ca loeih’ na tina u ai aw?

⁸ Na tina u manawh! Te tila na tina lak ah nang lawng, ‘Kai hamla thlembuh van lo de lah, tecoengah rangkhukna angki te buen langtah buh ka caak vengah kai he n'toet de lah; tecoengah buh te na caak badai,’ na tina ai.

⁹ Te kah tuihyoeihthlaang lawng awl a ngaai dawngah te awmngaih awl thui pe ham ngoe nawh de lah koen?

¹⁰ Nangmi khaw te tila na awm u van, sai hamla avan thui boeih te na sai u coengah, ‘Kaimi tah tuihyoeihthlaang mai ni; kamami kah sai ham koei te ni ka sai u’ ti u mai hawn,” tila a thui pe.

Thlaang Paha Jesuh Lawng A Hoeih Sak

¹¹ Jerusalem khaw benla Jesuh a ceh phai vengah Samaria oen Galili laklaw ramri ah te cet.

¹² Vangca pakhat la ahih te a kuun vengah haibe aka na thlaang paha a tengla law u. Ahimi lawngah athlala hoer pai u tih,

¹³ “Bawipa Jesuh! Kaimi he n'reen lah!” tila paang u.

¹⁴ Jesuh lawng ahimi te a huh vengah, “Cet u langtah nangmi te khawsoeih thli lawngah n'yutt n'yam u seh.” a tina. Lawngpueng a ceh phai u vengah ahimi tah boeih hoeih u.

¹⁵ Ahimi tim kah pakhat lawngah ka hoeih poen tila a ming vengah, meel koep tih angaihhlangla Pathen te a koeh.

¹⁶ Jesuh kah a khowkungah dilai dawng buekuep tih Jesuh tengah uemna awl a thui. Te thlaang te tah Samaria thlaang ni.

¹⁷ Jesuh lawng, “Thlaang paha hoeih u de lah koen ni, atloe pakua hue teta mela oh kai?

¹⁸ N'tu ah he kah thlaangphun tloe pakhat bueng lawngah Pathen thangpawm ham a va meel koep?” a tina.

¹⁹ Jesuh lawng ahih nala te, “Tho lang cet loeih; na oengna lawng n'hoeih sak poen,” a tina.

Pathen Ram A Lawna Kawng

²⁰ Farasi thlaang khatsut lawng Jesuh nala te, “Pathen Ram he mevengah avan pha ai,’ tila a doet u. Ahih lawng awl a thung pe tih, ‘Pathen Ram he tah huh thai koeila law manawh.

²¹ A-u lawngkhaw, ‘Bueh lah he ah awm he! tihnawhtah, te ah awm te!’ tila thui thai manawh, metihtiah Pathen Ram tah namami khuiah ni a awm.” a tina.

²² Tecoengah a hubang hue te, “Thlaanghing Capa kah Khawhin hin at te nangmi lawng huh hamla na ngaihna atue law ai, tede nangmi lawng na hu u manawh.

²³ Nangmi tengah, ‘Bueh lah, ke ah awm ke!’ tihnawhtah, ‘Bueh lah, he ah awm he!’ tila aka thui thlaang awm ai. Tede tlap hamla cet u boel.

²⁴ Thlaanghing Capa kah khawhin tah khaw thlap apha vengah khawhi-mikboet akhatben kalawng khatben toe ah a aangna lawng a thue rawngtheng angla te awm ai.

²⁵ Tede ahih lawngah lamhala patang palai a khang vetih tihin hang kah thlaang thli lawng ahih te a hoett u ai.

²⁶ Noah dung vengkah a awm angla te Thlaanghing Capa kah khawhin vengah khaw awm van ai.

²⁷ Noah te lowng khuila a kuun khawhin toe ah thlaang thli lawng a caak a awkk u tih hutaa tawngpa lawng yu a lawh u tih vaa a sak u, tuiliwpui law khuengdeng tih ahimi te boeih a khuk.

²⁸ Lot dung vengah a awm angla te awm van ai. Thlaang boeih lawng a caak a awkk u, thaihu a lai u tih a yoeih u, thingkung rawkung a liing u tih im a sak u.

²⁹ Lot lawng Sodom khaaw te a thawh taak hin vengah vaan kalawng hai oen kat hai te, khaw angla tlan tih ahimi boeih te a ngawn.

³⁰ Thlaanghing Capa kah khawhin a thoeng vengah khaw te tila awm van ai.

³¹ Te khawhin ah amah kah imphu ah aka awm lawng a thaihu thli te lawh hamla im khuila kuun re tlaih boel seh; te tila te lo ah aka awm thlaang lawngkhaw im la meel koep tlaih boel seh.

³² Lot kah a yu te hilh u boel!

³³ A-u khaw a hingna te thlawn hamla a yawm atah a hingna te sung ai; A hingna te a sung atah hingna te a dang ai.

³⁴ Nangmi tengah kavan thui u, te kah khawhin ah ihkhun dawngah aka ip haih thlaang pahih khuiah pakhat te a lawh vetih a khat te a ceh taak ai,

³⁵ Sum deeng haih hutaa pahih khuiah pakhat te a lawh vetih pakhat te a ceh taak ai.

³⁶ Lo ah bii aka bi haih thlaang pahih khuiah pakhat te a lawh vetih pakhat te a ceh taak ai.” a tina.

³⁷ A hubang hue lawng ahih te, “Bawipa, te tila te me tuek ah a awm ai?” tila a doet u. Jesuh lawngah, “Duek rawkk a awmna roekk ah langta thli tun ai,” a tina.