Johan 6 - Matu Chin New Testament 2006

Jesuh Lawng Thlaang Thong Ngaa A Kok

¹ He coeng atah Jesuh te Galili Tuiliipui ah te kaa phai. (Tiberias Tuiliipui tila khaw a thui u).

² Ahimi lawngah thlaangtlo a hoeih sak kawpoekrai noekna te a huh u tih thlaangping lawng a hu ah bung a vai.

³ Jesuh te tlaangsawm la luui tih a hubang thli oen haih ngawl u.

⁴ Kaantaak Poei atue tah yoeii poen.

⁵ Jesuh lawng a teng avai te a dan vengah thlaangping yahawh hlang a tengla a law te a huh, tevengah Filip te a doet tih, “He kah thlaang he yoeh hamla caak khoek buh he ame ah n'lai thai ai?” a tina.

⁶ (He tila a doet he tah Filip te noekdak ham a ngaih; amah lawngtah metila ka sai ai tite a ming poen).

⁷ Filip lawngah, “Thlaang boeih lawng ayawlca ah yeen a caak ham Pateng takawi laina ham ngun tangka yahnih khoek manawh.” a tina.

⁸ A hubang atloe pakhat, Simon Piter kah a manau, Andru lawngah,

⁹ “He ah he baalii takawi cuun ngaa oen nga pahih aka khueh camaw tawngpaca pakhat awm” a tina. Tede he kah thlaang he yoeh hamla te ang ca mai te khoek manawh.” a tina.

¹⁰ Jesuh lawng ahimi nala te, “Thlaangping te ngawlh sak lah,” a tina. (Te ah te pompih moen awm). Te ah te thlaang boeih te ngawl u; te kah thlaang te thong ngaa yun awm.

¹¹ Jesuh lawng takawi te a lawh tih Pathen tengah awm-ngaih awl a thui, tecoengah te kah aka ngawl thlaangping tengah te a ree. Nga te khaw te tila te a sai tih ahimi lawngah ahahla a caak u.

¹² Ahimi boeih lawng ahahla a caak u coeng atah a hubang hue nala te, “Acoeih aphe te cawi uh; baw-are sak boel.” a tina.

¹³ Tedawngah ahimi lawng a cawi u tih baalii takawi cuun ngaa dawngkah thlaangping lawng a caak coeih te vawhphueih paha thlaihih dawngah abela a cawi u.

¹⁴ Jesuh lawng a sai kawpoekrai miknoekna he aka hu thlaang boeih lawngah, “Ahih he tah dilai dawngah aka law ham koei Tawngha taktak te ni” tila a thui u.

¹⁵ Ahimi lawngah law u vetih amangkhakla amah te sengpahrang la n'khueh u ai tite Jesuh lawng a ming tih; tedawngah tlaangsawm la te amah bueng koep cet.

Tui Sawah Jesuh Cet

¹⁶ Khaw athlem thuk veng atah Jesuh kah a hubang hue te tuiliipui la cet thuk u,

¹⁷ Lowng dawngah ngawl u tih Kapernaum khaw benla te tuiliipui ah kaa u phai tih cet u. Khaw tah yiin poen de ahimi tengla Jesuh tah pha thlan hun.

¹⁸ Tevengah khaw thlii khuengdeng tih tuilet tho.

¹⁹ A hubang hue lawng meng thum, meng lii yunyan lowng te a kaih u coeng atah tui sawah Jesuh te law phai tih lowng a awmna benla ayoeii rep te a huh u veng atah ahimi lawng a rih u.

²⁰ Jesuh lawng ahimi nala te, “Rih u boel, kai ni” a tina.

²¹ Tecoengah lowng dawngah te awmngaihcala a ngawlh sak u, tecoeng atah ahimi lawng pha ham a ngaih ahuen te kawlkalh ah a pha u.

Thlaangping Lawng Jesuh A Tlap

²² Avuen khawhin atah tuiliipui khatben rall ah aka awm thlaangping lawng, te huen ah lowng pakhat bueng a awm te a ming u. Te kah Lowng dawngah Jesuh cet nawh tih a hubang hue bueng ni a ceh u tite a ming u.

²³ Tiberias kalawng aka law atloe lowng thli te, Bawipa lawng awmngaih awl a thui coengah thlaangping lawng takawi a caakna huen tuikeeng ah te avan pha u.

²⁴ Thlaangping lawngah te huen ah te Jesuh oen a hubang hue khaw awm u nawh tite a ming u vengah te kah lowng dawngah te luui u tih ahih te tlap hamla Kapernaum khaw la te cet u.

Jesuh Tah Hingna Takawi

²⁵ Thlaangping lawng tuiliipui khatben rall ah Jesuh te a huh u vengah, “Saya, me vengah he la he na pha?” a tina u.

²⁶ Jesuh lawng, “Awltak kavan thui u; nangmi lawngah kawpoekrai miknoekna te na yaakming u dawngah kai he nan tlap u moenih, takawi te a hah toett la na caak u dawngah ni nan tlap u.

²⁷ Aka awm poe nawh caak awkk ham bii bi u boel; te lak ah dungyan aka awm caak awkk ham bii te bi uh. Thlaanghing Capa lawng caak awkk te m'peek ai; metihtiah Pa Pathen lawngah ahih sawah amah kah ngaikhuekna miknoek a khueh poen.” a tina.

²⁸ Te atah ahimi lawngah, “Pathen lawng kaimi sai sak ham a ngaih te ka bina u thai ham n'tu ka sai u ai?” tila a doet u.

²⁹ Jesuh lawng ahimi nala te, “Pathen lawng nangmi sai sak ham a ngaih te tah amah lawng avan tuih thlaang te tangna ham lawngah ni” a tina.

³⁰ Ahimi lawng, “Kaimi lawngah na sai te ka huh u tih nang te kan tangna u hamla kawpoekrai miknoek n'tu na sai ai? Nang lawng n'tu navan sai ai?

³¹ Caciim lawngah a thui angla, ‘Ahih lawngtah ahimi kah caak hamla vaan kah takawi a peek’ a ti van angla kaimi kah patuer hue lawngtah ramhum huhang ah manna te a caak u.” a tina.

³² Jesuh lawngah, “Awltak kavan thui u, Mosi lawng nangmi m'peek te vaan kah takawi nawh ni; vaan kah takawi tangtang te nangmi aka pe tah a Pa ni.

³³ Metihtiah Pathen kah peek takawi tah vaan kalawng law thuk tih dilai he hingna a peek.” a tina.

³⁴ Ahimi lawngah, “Bawipa, te takawi te yoeyahla kaimi m'pe lah.” a tina u.

³⁵ Jesuh lawng ahimi nala te, “Kai tah hingna takawi ni, a-u khaw ka tengah aka law tah meveng khaw a bung pawng manawh; a-u khaw kai he aka tangna tah meveng khaw tui hall manawh.

³⁶ Tede kavan thui u, tahe ah nan huh u poen de nan tangna u nawh.

³⁷ A Pa kah peek boeih tah ka tengla law ai. A-u khaw ka tengah aka law boeih tah ka hek manawh.

³⁸ Metihtiah kamah kawngaih sai hamla vaan kah ka law nawh tih kai aka tuihkung kah kawngaih te sai ham ni ka law.

³⁹ Kai he aka tuihkung kah kawngaih tah ka tengah amah kah peek boeih te pakhat khaw ha-ata sak ham nawh ni, tede aboetna khawhin ah ahimi boeih te thawh sak tih hing sak ham ni.

⁴⁰ Metihtiah Capa te a huh tih aka tangna boeih lawngtah dungyan hingna te khueh hamla a Pa lawng a ngaih. Tecoengah aboetna khawhin ah ka thawh vetih ka hing sak ai.” a tina.

⁴¹ Ahih lawngah, “Kai tah vaan kalawng aka rum thuk takawi ni” tila a thui dawngah te kah thlaangping hue te caitoek u.

⁴² Tedawngah ahimi lawng, “He thlaang he Josep capa Jesuh nawh aw? Mami lawng ana pa oen a manu khaw m'ming u ta. Metila vaan kalawng ka rum thuk a ti mai?” ti u.

⁴³ Jesuh lawng, “Nangmi lawng caitoek khiing u boel, toeng u loeih.

⁴⁴ Kai he aka tuihkung a Pa lawngah ka tengla avan mawt nawh atah a-u khat khaw ka tengah law thai manawh; aboetna khawhin ah ahih te ka thawh vetih ka hing sak ai.

⁴⁵ Tawngha thli lawng, “Thlaang boeih te Pathen lawng a cang puei ai” tila a thut. A-u khaw Pa awl te a yaak tih aka cang tah ka tengla law u.

⁴⁶ He tah a Pa te aka hu thlaang awm ti ngaihna nawh ni; Pathen tengkah aka law bueng lawng ni Pa te a huh.

⁴⁷ Awltak tang kavan thui u: ahih te aka tangna tah dungyan hingna a khueh.

⁴⁸ Kai tah hingna takawi ni.

⁴⁹ Nangmi kah patuer hue lawng ramhum hu hang ah manna te a caak u de ahimi boeih tah duek u.

⁵⁰ Tede, a-u khaw vaan kah aka rum thuk takawi te aka ca boeih tah duek manawh.

⁵¹ Kai tah vaan kalawng aka rum thuk hingna takawi ni. A-u khaw he takawi he aka ca tah yoeyahla hing poen ai. Kai lawng ka peek ham koei takawi tah ka thi ka sa he ni, dilai lawng a hingna ham ka peek ni.” a tina.

⁵² He awl lawngah ahimi tim ah te thinso kawsa a thawh sak tih, “He kah thlaang lawngah he mami kah caak hamla metila a thi asa te mami m'peek thai ai?” tila doet u.

⁵³ Jesuh lawng ahimi nala te, “Awltak kavan thui u: nangmi lawngah Thlaanghing Capa kah a ngan te na ca u nawh tih a thi te na awkk u nawh atah hingna te na khuiah awm manawh,

⁵⁴ A-u khaw ka ngan he a caak tih ka thi he a awkk atah dungyan hingna a khueh tih ahih te aboetna khawhin ah ka thawh vetih ka hing sak ai.

⁵⁵ Metihtiah ka ngan he tah caak ham tangtang tih ka thi he tah awkk ham koei tangtang ni.

⁵⁶ A-u khaw ka ngan he a caak tih ka thi he aka aw tah kai dawngah hing tih kai khaw ahih dawngah ka hing.

⁵⁷ Aka hing a Pa lawngah kai he n'tuih tih ahih rang oen ah kai khaw ka hing. Tetih van angla a-u khaw kai he aka ca tah kai rang oen ah hing ai.

⁵⁸ Tecoengah he tah vaan kalawng aka law takawi ni; he takawi he aka ca tah yoeyahla hing poen ai. He tah nangmi kah patuer hue lawng a caak takawi oen lo u nawh, te kah takawi te aka ca tah duek u.” a tina.

⁵⁹ Jesuh lawng he awl he Kapernaum khaw Sinakok bok-im ah a cang puei.

Dungyan Hingna Awl

⁶⁰ He awl he a huvai thlaang broe lawng a yaak u vengah, “He kah cangpueina he rai tangkiik aih, a-u lawng a yaakming thai ai?” ti u.

⁶¹ He kawngah ahimi caitoek u tite a-u lawngkhaw thui pe muehla Jesuh lawngah a ming tih tedawngah ahimi te, “He awl lawngah he na kaw avan boet sak u aw?

⁶² Thlaanghing Capa he acuek vengkah a awmna huen la a luui koep hang te na hu u mai kawinih me tih ni na ti u oh ai?

⁶³ Hingna pekung tah Pathen Muithla ni; thlaanghing tharana tah a poei ni. Nangmi tengah kavan thui awl lawngah hingna aka pe Pathen Muithla te avan law puei.

⁶⁴ Tede nangmi khatsut lawngtah na tangna u nawh.” a tina. (Jesuh lawngah thlaang pakhat lawngtah tangna nawh vetih amah sawah paipi a thleep ai tite acuekca kalawng a ming poen.)

⁶⁵ Tecoengah a thui pe tih, “He kawngah ni a Pa lawng avan tuih nawh atah a-u khaw ka tengla law thai manawh tila acuekca ah kavan thui u teta.” a tina.

⁶⁶ He kawngah he Jesuh kah a huvai thlaang broe te meel koep u tih a hu ah te bang u tlaih nawh.

⁶⁷ Tedawngah a hubang thlaihih hue te, “Nangmi khaw kai he ceh taak ham na ngaih u van aw?” tila a doet.

⁶⁸ Simon Piter lawngah, “Bawipa, a-u tengla ka ceh u ai? Nang lawng ni dungyan hingna na khueh.

⁶⁹ Tahe atah nang he Pathen tengkah aka law Thlaang Ciim tila kan tangna tih kan ming u poen.” a tina.

⁷⁰ Jesuh lawng, “Nangmi thlaihih hue he kai lawng kan tuek u nawh aw? Nangmi khuikah pakhat tah raaithe la awm!” a tina.

⁷¹ Ahih lawng Simon Iskariot capa Judah kawng ni a thui. Metihtiah Judah khaw hubang paha thlaihih khuikah pakhat van de ahih sawah te paipi a thleep.