Johan 4 - Matu Chin New Testament 2006

Jesuh oen Samari Nu

¹ Jesuh lawngah Johan lak ah hubang yahawh adang tih baptisma a peek tite a yaak u.

² (Atak tang atah Jesuh amah lawngtah a-u khat khaw baptisma pe nawh; a hubang hue lawng ni a peek.)

³ Tedawngah te tila a thui u te Jesuh lawng a yaak vengah Judia peng te a ceh taak tih Galili la te koep meel;

⁴ te vengah te Samaria peng kalawng te a ceh hamla awm.

⁵ Samaria peng khuikah Saika khaaw te a pha, Te khaaw te Jakob lawng a capa Josep a peek lohuen kalawng ah thla aih nawh.

⁶ Te ah te Jakob kah tuikhur te awm, Jesuh tah lawngpueng ceh ah bawngg malcal tih tuikhur tengah te ngawl. Te veng te tah hingthun yunyan ni.

⁷ Samari nu pakhat te tui thaan la law tih Jesuh lawng ahih nala te, “Tui n'awkk sak lah.” a tina.

⁸ (A hubang hue tah caak awkk lai ham khawpui khuila cet u.)

⁹ Te kah hutaa lawngah, “Nang he Judah thlaang la na awm, kai tah Samaria thlaang ni; metila kai tengah tui navan bih mai lauh?” a tina. (Judah thlaang phun lawngah Samari thlaang thli kah a hawna boengloeng oen beel thli te hawna u nawh.)

¹⁰ Jesuh lawng, “Pathen kah peek lungvatna tila doek na ming mai tih nang tengah tui aka bih he a-u tite na ming kawinih, ahih tengah te na bih vetih ahih lawng hingna tui te m'peek ai.” a tina.

¹¹ Te kah hutaa lawngah, “Bawipa, tuium khaw na khueh nawh, tuikhur khaw dung tangkiik. Nang lawng ame kah hingna tui te na dang ai?

¹² He kah tuikhur he patuer Jakob lawng kaimi m'peek ni; amah lawngkhaw a ca anau thli lawngkhaw, a boiava lawngkhaw he kah tui he ni rip a awkk u. Nang he Jakob lak ah na lenduet ngaai aw? a tina.

¹³ Jesuh lawng, “A-u khaw he kah tui aka aw tah tui hall koep ai,

¹⁴ tede, a-u khaw kai lawng ka peek tui te aka aw tah tui hall koep tlaih manawh.” a tina.

¹⁵ Te kah hutaa lawng, “Bawipa, te tih atah kai lawngah tuihalh la koep ka awm tlaih nawh ham khaw, he la he tui thaan la ka law koep tlaih nawh ham te tui te kai m'pe lah!” a tina.

¹⁶ Jesuh lawng ahih nala te, “Cet langtah na vaa te khue, tecoengah koep va lawh.” a tina.

¹⁷ Ahih lawngah, “Kai he ka vaa awm nawh.” a tina. Jesuh lawng, “Ka vaa awm nawh na ti te soeng.

¹⁸ Nang lawng thlaang pa-ngaa na vaana poen, tahe ah na awm puei thlaang te na vaa tangtang nawh ni. Atak tang ni na thui.” a tina.

¹⁹ Te hutaa lawngah, “Bawipa, nang he tawngha ni tila kan ming.

²⁰ Kaimi Samari thlaang thli kah patuer hue lawngtah he kah tlaangsawm ah he Pathen a bok u, tede nangmi Judah thlaang lawngtah Jerusalem ah ni Pathen he bok ham awm na ti u.” a tina.

²¹ Jesuh lawng ahih nala, “Hutaa nang, ka awl thui he tangna lah, he kah tlaangsawm ah khaw, Jerusalem ah khaw, Pa te thlaang lawngah a bokna nawh atue te a pha ai.

²² Nangmi Samari thlaang lawngah a-u ka bok u tite na ming u taktak nawh; tede kaimi Judah thlaang lawngtah a-u ka bok u tite ka ming u, metihtiah Judah thlaang teng kalawng ni thlawnna tah a law.

²³ Tede Pa tah ataktangla a awm van angla aka bok thlaang thli lawngkhaw Pathen kah Muithla tharana oen awltak oen ah a bokna atue te avan pha poen tih he ah he awm poen. Te tila aka bok te ni Pathen lawngah a ngaih.

²⁴ Pathen tah Muithla la a awm dawngah ahih te aka bok thlaang lawngkhaw Muithla oen awltak la a bok ham awm.” a tina.

²⁵ Hutaa lawng ahih nala, “Messiah law ai tite ka ming, ahih te a law veng atah soeprep boeih te kaimi tengah avan thui ai.” a tina.

²⁶ Jesuh lawng awl a thung pe tih, “Nang oen awl aka thui kai he tah ahih poen ni.” a tina.

²⁷ Tevengah te Jesuh kah a hubang thli koep va meel u tih hutaa pakhat oen awl a thui te a huh u vengah ahimi tah a kawpoek rai u tangkiik. Tede ahimi khat lawngkhaw te hutaa te, “N'tu na ngaih?” te tila doet u nawh tih Jesuh te khaw, “N'tu ah ahih oen awl na thui?” tila khaw doet u nawh.

²⁸ Tecoeng atah hutaa lawng tuium te a ceh taak tih khaw khuila cet koep, te kah aka awm thlaang thli nala te,

²⁹ “Kai lawng ka sai thaihu boeih aka thui thlaang he law u langtah bueh u lah. Ahih he Messiah kai aw?” tila a thui pe.

³⁰ Tedawngah khaw khuikah thlaang thli te law u tih Jesuh tengla cet u.

³¹ Teveng ruet ah te a hubang hue lawng Jesuh nala te, “Saya, buh ca de saw!” a tina u.

³² Tede ahih lawng, “Akawng alam na ming u nawh buh te caak hamla ka khueh.” a tina.

³³ Tedawngah hubang hue lawng doet u the tih, “thlaang pakhat khat lawng buh avan peek kai aw?” ti u.

³⁴ Jesuh lawng ahimi nala te, “Kai kah buh tah kai aka tuihkung kah kawngaih te vai ham oen ah sai ham bii m'peek te coeng pe ham ni.

³⁵ Nangmi lawngtah, ‘he coengah thla lii a awm atah caang ah ham khoek poen ai’ na ti u. Tede kavan thui u, loha thli ke a theenla dan u lah; tahe ah caang hiin poen tih caang ah ham khoek poen!

³⁶ Caang aat thli lawng thapang a dang u tih dungyan hingna hamla caangvui te a cawi u; tedawngah caang aka tuhkung oen caang aatkung tah awmngaih bok ai.

³⁷ ‘Thlaang pakhat lawng a tuh tih thlaangtloe pakhat lawng a ah” tila a thui awl te soeng tangtang.

³⁸ Nangmi lawng na bina nawh lohuen ah caang aat la kan tuih u; te ah te thlaangtloe lawng bii a bi tih ahimi kah biibina dawngah te nangmi lawng athawn na dang u” a tina.

³⁹ Te kah hutaa lawngah te, “Kai lawng thaihu ka sai boeih te ahih lawngah avan thui” tila te a thui pe dawngah, te khaw kah aka awm Samari thlaang broe lawng Jesuh te a tangna u.

⁴⁰ Tedawngah Samari thlaang thli lawng Jesuh tengla avan pha u vengah te kaimi tengah cam mai de a tina u tih Jesuh tah te khaw ah te khawhin hin hih cam.

⁴¹ Amah kah awl thui a yaak u dawngah thlaang broe lawng a tangna u tih,

⁴² ahimi lawng te kah hutaa nala te, “Nang lawng na thui dawngah nawh tih, kamami roe lawng amah awl thui ka yaak u poen dawngah ahih tah he dilai thlawnkung ni tila ka ming u tih tahe ah ka tangna u poen.” a tina.

Jesuh lawng Bawi pakhat kah Capa A Hoeih Sak

⁴³ Te ah te hin hih a cam coengah Jesuh tah Galili la te cet.

⁴⁴ Metihtiah Jesuh amah lawngah te, “Tawngha he amah ram khuiah thangpawm u nooek nawh.” tila a thui u.

⁴⁵ Galili te a pha veng atah te kah thlaang thli lawng a do u, metihtiah ahimi tah Jerusalem ah Kaantaak Poei vengah cet u van tih te poei ah ahih kah a sai thaihu boeih te a huh u dawngah ni.

⁴⁶ Tecoengah tui te misurtui la a coeng sakna Galili peng kah Kanaa khaaw la te koep cet. Te ah te ukkungbawi pakhat awm, Kapernaum khaaw ah aka awm a capa te tlo.

⁴⁷ Ahih lawngah Judia kalawng Galili la Jesuh va law tite a yaak vengah a tengla cet tih a capa aka duek tawm te hoeih sak ham ah Kapernaum la poe ceh hamla reenna a bih.

⁴⁸ Jesuh lawngah ahih nala te, “Nangmi lawngah kawpoekraina oen kawpoekrai thaihu te na huh u nawh atah mevengah khaw na tangna u manawh” a tina.

⁴⁹ Te kah bawi lawngah, “Bawipa, ka ca a duek thlan ah law mai de.” a tina.

⁵⁰ Jesuh lawng ahih nala te, “Cet loeih, na ca te hing badai.” a tina. Te kah thlaang lawng Jesuh awl te a tangna tih cet.

⁵¹ Lawngpueng a ceh phai vengah te a tuihyoeihthlaang thli oen hum u tih, “Na capa te theen badai” a tina awlthang oen avan voekk u.

⁵² Ahih lawngah a capa te mevengah a hoeih tila a doet tih ahimi lawngah, “N'thlem hingthun khawnoek pakhat ah a sanat lawng a thlah” tila a thui pe u.

⁵³ Tevengah ana pa lawngah, “Na Capa te theen badai” tila Jesuh lawng a tina atue ni tite a ming. Tedawngah amah oen a imkhuikaw boeih lawng a tangna u.

⁵⁴ He tah Judia kalawng Galili la a law coengah Jesuh lawng apabe kawpoekraina miknoek a sai ni.