Johan 19 - Matu Chin New Testament 2006

¹ Tecoengah Pilat lawng Jesuh te a khue tih cungpoelh oen a tam sak u.

² Raalkap thli lawng thliing lumuek te a sai u tih a luu ah a muek sak u, tecoengah himbai ling te a bai sak u,

³ a tengla te yoeii u tih, “Judah Sengpahrang na hinglung vaang seh!” a tina u tih a bel u.

⁴ Pilat lawng koekthoek cet tih thlaangping nala te, “Bueh u lah! Ahih he duek sak ham akawng alam ka hu nawh tite na huhna u ham nangmi tengah kavan khuen ai.” a tina.

⁵ Tecoeng atah Jesuh lawng thliing lumuek te a muek tih bailing bai oen va law. Pilat lawng ahimi nala te, “Ahih he bueh u lah!” a tina.

⁶ Khawsoeih ahaamca thli oen tempal bok-im aka toet raalkap thli lawng a huh u vengah paang u tih, “Thinglam dawngah ngawn! Thinglam dawngah ngawn!” tila a thui u. Pilat lawng ahimi nala te, “Nangmi lawng khuen u langtah thinglam dawng ngawn uh. Kai lawngtah ahih he duek sak ham akawng alam ka hu nawh.” a tina.

⁷ Thlaangping lawngah, “He kah thlaang lawng amah oen amah te Pathen Capa a ti dawngah kamami kah phungawl lawng a thui angla a duek ham awm.” tila awl te koep a thung pe u.

⁸ He tila a thui u te Pilat lawng a yaak vengah tare a rih.

⁹ Ahih lawngah impui khuila cet koep phai tih Jesuh te, “Nang he ame kalawng na law?” tila a doet. Tede Jesuh lawng awl thung pe nawh.

¹⁰ Pilat lawng, “Kai he nan voem ngaih nawh aw? Kai lawngah nang he thlah thaina khaw, thinglam dawng ngawn thai ham khaw aana ka khueh ti he na ming nawh aw?” a tina.

¹¹ Jesuh lawngah, “Nang lawng ka sawah aana na khueh he Pathen lawng m'peek dawngah ni. Tedawngah na kut dawngah kai aka pekung te a thawlhna bo tare ngai,” a tina.

¹² He tila a thui te Pilat lawng a yaak vengah Jesuh thlah ham oen ah loeih sak ham along a-im te a tlap. Tede thlaangping lawngah paang koep u tih, “Nang lawng ahih te na loeih sak atah nang tah Sengpahrang sangluel kah paya tlaih nawh ni! A-u khaw amah oen amah te sengpahrang ni aka ti boeih tah Sengpahrang sangluel te aka raalna thlaang poen ni!” ti u.

¹³ Pilat lawng he awl he a yaak vengah Jesuh te adaubenla avan law puei tih, “Lungpeel Phaih” a ti u ahuen kah awlcekna ngawlhcoen dawngah te ngawl. (Lungpeel Phaih a tite Hebru awl la “Gabbatha” ti u.)

¹⁴ Teveng te tah Kaantaak Poei huet hin hingthun tawm poen ni. Pilat lawngah thlaangping nala te, “Na sengpahrang he bueh u lah!” a tina.

¹⁵ Ahimi lawngah paang koep u tih, “Ahih te ngawn! Ahih te ngawn! Thinglam dawngah ahih te ngawn!” ti u. Pilat lawng ahimi nala, “Nangmi kah sengpahrang he thinglam dawng ngawn sak ham na ngaih u aw?” tila a doet. Khawsoeih ahaamca thli lawngah, “Sizar Sengpahrang sangluel nawh tah atloe sengpahrang ka khueh u nawh.” a tina u.

¹⁶ Tecoeng atah Pilat lawng Jesuh te thinglam dawngah ngawn hamla ahimi kut ah a peek. Tecoeng atah ahimi lawng Jesuh te a ceh puei u.

Thinglam Dawng Jesuh A Ngawn U

¹⁷ Amah thinglam te kawh ruila cet tih, “Luuruh Huen” a ti u te a pha. (Hebru awl la tah, “Golgota” ti u.)

¹⁸ Ahimi lawng te ah te thinglam dawng a ngawn u; thlaangtloe pahih khaw khatben khat bang ah a ngawn u tih Jesuh te a lung ah a ngawn u.

¹⁹ Pilat lawng noekna ca a thut tih thinglam dawngah a tai sak. Ahih lawng, “Nazaret khaaw kah Jesuh, Judah Sengpahrang” tila a thut.

²⁰ Thinglam dawngah Jesuh a taina huen te khawpui khui kalawng athla aih nawh dawngah thlaang tawm lawngah noekna ca te a tae u. Noekna ca te Hebru, Latin oen Krik awl la a thut.

²¹ Khawsoeih ahaamca hue lawngah Pilat nala te, “Judah Sengpahrang tila thut boel, te lak atah amah awl thui angla, ‘He kah thlaang lawng kai tah Judah sengpahrang ni’ a ti ang la te thut” a tina u.

²² Pilat lawng awl a thung pe tih, “Ka thut tangte he tah ka thut angla awm seh.” a tina.

²³ Raalkap thli lawng Jesuh te thinglam dawngah a tai coeng atah ahimi lawng hi-acuu te a lawh pe u tih amami pakhat rip hamla thloep lii la a pek u. Ahimi lawngah a himbaidung te khaw a lawh u, te himbaidung te tah aduul la a tah dawngah a huina a-ngawhaa awm nawh.

²⁴ Raalkap thli lawng, “He tah pheuh u boel sih; a-u lawng nuem a dang ve, talcung sutt u sih” tila a thui u. He kah Caciim lawngah, “Ahimi lawngah, kai tah hi-acuu te pek u the tih ka himbaidung te tah talcung a yueh u” tila a thui te asoepna hamla tila he awm. Raalkap thli lawng te tila te a sai u.

²⁵ Jesuh kah thinglam tengah te a manu oen a manu kah manau Klopas yu Meri oen Meri Makdalin hue he ayoeiila rep pai u.

²⁶ Jesuh lawng a manu oen te ah aka pai a lungna a hubang te a huh tih a manu nala te, “Ahih te na capa ni.” a tina.

²⁷ Tecoengah te kah hubang nala te, “Ahih te na nu ni” a tina. Te kalawng atah a hubang lawngah amah im ah awm sak ham a ceh puei.

Jesuh Duekna

²⁸ Jesuh lawngah, tahe tah thaihu cungkuem soep boeih poen tite a ming tih Caciim lawng a thui te asoepna ham, “Tui ka hall” tila a thui.

²⁹ Te ah te misurtui thuii abecala a thloen u tuium pakhat awm; te kah misurtui dawngah baipeen te a nok tih hissop thing cungkui dawngah a kek, tecoengah Jesuh te a kaa ah a tuh.

³⁰ Jesuh lawng misurtui te a yawn tih, “Coeng boeih poen!” ti. Tecoeng atah a luu te a khun a hingna boet.

A Vee ah Cai oen A Thun

³¹ Tecoengah aana khuehkung Judah thlaang thli lawng Pilat tengla cet u tih thinglam dawng a tai thlaang thli kah a khow thli te tlot khem pe ham, ahimi kah rawkk te thinglam dawngkah lawh hamla a bih u. Ahimi lawng tila a bih u he tah te khawhin te huet hin la awm tih Sabbath khawhin ah rawkk thli te thinglam dawng awm sak ham ahimi lawng ngaih u nawh, Sabbath khawhin tah aciim khawhin la a awm dawngah ni.

³² Tedawngah raalkap thli lawng cet u tih thinglam dawng Jesuh oen a ngawn haih thlaang kah a khow te lamhacuek ah a khem pe, tecoengah atloe pakhat kah a khow te a khem pe u.

³³ Tede, ahimi lawngah Jesuh teng a pha u veng atah duek tangte la a awm te a huh u, tedawngah ahih kah a khow te tah khem pe u nawh.

³⁴ Raalkap pakhat lawngah Jesuh te a vee ah cai oen a thun tih tevengah thisen oen tui te pahoei thoeng.

³⁵ (He tila a awm he aka hukung lawng tila a thui he tah nangmi lawngkhaw na tangna u van hamla ni. Ahih lawng atak tang a thui te amah lawng a ming.)

³⁶ Caciim lawngah, “A ruh te pakhat Pateng tlot manawh” tila a thui te asoepna hamla tila he awm.

³⁷ Tecoengah atloe Caciim dawngah khaw, “Ahimi lawng cai oen a thun u te a bueh u ai” tila a thui te awm.

Jesuh Rawkk Kuemna

³⁸ He coeng atah Arimatia khaaw kah Josep lawng Jesuh rawkk te lawh hamla Pilat tengah a bih. (Josep lawng aana khuehkung Judah thlaang thli te a rih tih ahuepla Jesuh kah hubang la thuep aka awm ni.) Pilat lawng a rawkk te na lawh thai a tina dawngah cet tih a lawh.

³⁹ Jesuh te huh hamla khawyiin ah aka cet Nikodemu khaw Josep oen haih cet tih mura oen aloes a pawlh heet riimtuui pawng yakhat tluk te a khuen.

⁴⁰ Ahih rawi lawng Jesuh rawkk te a khuen hih tih Judah phung rawkk vui siing angla Jesuh rawkk oen riimtuui te himbai haldoel oen ah haih a yaawl.

⁴¹ Jesuh a ngawnna huen ah te dum pakhat awm tih te ah te a-u khat khaw a upna nawh thlann lungkaw a thai pakhat awm.

⁴² Te khawhin te tah Judah thlaang thli kah huet hin la awm tih thlann lungkaw te khaw ayoeica dawngah te ah te Jesuh te a up u.