Johan 10 - Matu Chin New Testament 2006

Tuudoen oen Thuidoetna

¹ Jesuh lawngah, “Awltak kavan thui u: Tuu im khuila thawhka kalawng kuun ohla atloe abang kalawng luui tih aka kuun tah thlaanghuuen thli oen raal thli ni.

² Thawhka kalawng aka kuun thlaang te tah tuu thli te khawlcuikung tuudoen ni.

³ Thawhka toetkung lawng ahih hamla thawh a awng pe; amah kah tuu thli te a miing oen a khue vengah ahih awl te tuu thli lawng a yaak pe tih ram la a ceh puei.

⁴ Ahih lawng tuu thli te a khuen vengah te thli kah a hai ben ah a ceh pe tih tuu thli lawng a hu ah a vai u, metihtiah ahih awl te a noek u dawngah ni.

⁵ Thlaangtloe hu tah vai u nawh, ahih kah awl te noek u nawh vetih te ang thlaang te tah a heng taak khongphaat dai ai.” a tina.

⁶ He kah thuidoetna he ahimi tengah Jesuh lawng a thui pe de thuingaihna te ming u nawh.

Jesuh tah Tuudoen Theen

⁷ Tedawngah Jesuh lawng koep a thui pe tih, “Awltak kavan thui: Kai tah tuu thawhka ni.

⁸ Kai ka law thlan veng kah atloe boeih aka law te tah thlaang huen oen raal thli ni; tede ahimi kah awl te tuu thli lawng hutung pe nawh.

⁹ Kai tah thawhka ni. A-u khaw kai dawng kalawng ah a kuun atah thlawnna a dang ai, ahih tah kuun thuk, cet hang vetih ramtliim sainona te a dang ai.

¹⁰ Thlaanghuuen lawngtah huuen ham, ngawn ham oen ah phe ham bueng ni a law. Kai tah nangmi lawng hingna te na khueh thaina hamla, asoepbir hingna te na khuehna u thai ham ni ka law.

¹¹ Kai tah tuudoen theen ni. Tuudoen theen lawngtah tuu hamla a hingna te a peek.

¹² Tuudoen la aka awm nawh, thlaangvat tuudoen lawngtah amah kah tuu khaw khueh nawh, metaang a law te a huh vengah tuu thli te a ceh taak tih a heeng taak; tedawngah metaang lawng tuu te a ngeh tih a thek ayak boeih.

¹³ Thlaangvat tuudoen tah thlaangvat la a awm dawngah tuu thli te doen acang nawh.

^14-15 Kai tah tuudoen theen ni. A Pa lawng kai he m'ming angla A Pa te kai lawngkhaw ka ming, tetih van la kai lawng ka tuu thli te ka ming tih ahimi lawngkhaw kai he m'ming u van. Kai lawngtah tuu thli ham hingna ka peek.

¹⁶ He kah tuu-im khuiah aka awm nawh ka tuu thli atloe khaw awm hun. Te thli te khaw kavan khuen hun ai; te thli lawngah ka awl he a ngaai ai; tuu huui at la coengg vetih tuudoen pakhat oen awm u ai.

¹⁷ Kai lawngtah hingna te ka dang koep hamla a awm dawngah hingna te peek ham ka ngaih tih a Pa lawng n'lungna.

¹⁸ Ka hingna he a-u lawngkhaw van rot nawh. Kamah kawthawh oen ni ka peek. Kai lawngah peek thaina ka khueh tih lawh thai koepna khaw ka khueh. He tah kai lawngah sai ham a Pa kah awlpeek ni.” a tina.

¹⁹ He kah awl dawngah he thlaangping tim ah pekbona te koep awm.

²⁰ Ahimi a kuum ngaai lawngtah, “Ahih he raaithe a khueh! Angparawt thlaang ni! N'tu la a awl he na hutung pe u?” tila a thui u.

²¹ Tede atloe hue lawngtah, “Raaithe aka khueh thlaang lawngah he tila awl thui manawh! Metila raaithe lawng mikpum thlaang te mik a tueng sak ai?” ti u.

Judah hue Lawng Jesuh A Hoett U

²² Jerusalem ah Tempal bok-im Nawnna Poei te awm. Te tah sikca sikding tue ni.

²³ Jesuh tah Tempal bok-im kah Solomon Imcoen ah te yingyawi.

²⁴ Thlaangping lawngah a veel khoep u tih, “Kaimi he meveng toe ah ngaihang khawbing la nan khueh khiing ai? Awlceet van thui loeih: Nang he Messiah aw?” tila a doet u.

²⁵ Jesuh lawngah, “Kavan thui poen ta, tede kai he nan tangna u nawh. A Pa kah aana oen ah ka sai thaihu thli lawng kamah kawng he a thui;

²⁶ tede nangmi he kamah kah tuuca la na awm u nawh tih nan tangna u nawh.

²⁷ Kamah kah tuuca lawngtah ka awl he a hutung; tuu thli te ka ming tih ka hu ah va bang u.

²⁸ Te thli te dungyan hingna ka peek tih meveng khaw duek u tlaih manawh. A-u lawngkhaw ahimi te van rot u manawh.

²⁹ Ka tengah a Pa kah peek te tah soeprep lak ah aka lenduet ni, a Pa kah khoemdoenna khui kalawng rot manawh.

³⁰ A Pa oen kai he tah pakhat ni.” a tina.

³¹ Tecoeng atah ahih te dena hamla lungto a ruh u.

³² Jesuh lawng ahimi nala te, “Kai lawng sai hamla a Pa kah peek thaihu theen te nangmi hai ah moen ka sai poen; he thaihu thli khuiah me ang kawng dawngah kai he lunghawh oen de hamla na ngaih u?” a tina.

³³ Ahimi lawngah, “Thaihu theen na sai dawngah nang he lungto oen de ham ka ngaih u moenih, tede Pathen thekhana awl na thui dawngah ni! Nang he thlaangthoet mailai ni, tede namah oen namah te Pathen la na sa u.” a tina u.

³⁴ Jesuh lawng, “Namami kah Phung-awl dawngah Pathen lawng ‘Nangmi tah pathen thli ni” tila, a thui te a thut.

³⁵ Caciim lawngah a thui he yoeyahla soeng tite ka ming; Pathen lawng amah kah awl a peek thlaang thli te pathen a tina.

³⁶ Kai he a Pa lawng n'tuek tih dilai la n'tuih. Tetih atah kai tah Pathen Capa ni ka ti dawngah Pathen thekhana awl na thui tila metila nangmi lawng na thui thai ai?

³⁷ A Pa lawng sai sak ham a ngaih thaihu te kai lawng ka sai nawh atah kai he n'tangna u boel.

³⁸ Tede te thli te ka sai atah, nangmi lawng kai he nan tangna u nawh mai cakhaw, a Pa tah kai ah awm tih kai khaw a Pa ah ka awm te na mingna u hamla ka sai thaihu thli he tah na tangna u ham awm.” a tina.

³⁹ Ahimi lawngah Jesuh te tuuk hamla koekthoek a yawm u de ahih lawng a thuh u taak vik tih ahimi kah kut dawng kalawng loeih.

⁴⁰ Tecoengah Jesuh tah Jordan tuiva ah te kaa phai, Johan lawng baptisma a peekna huen la te cet tih te ah te awm.

⁴¹ Thlaang yahawh hlang a tengla te law u. Ahimi lawngah “Johan lawng kawpoek rai miknoek khat khaw sai nawh, tede ahih kawng a thui boeih boeih te tah soeng.” ti u.

⁴² Te kah aka awm thlaang broe lawngah ahih te a tangna u.