Hebrew 6 - Matu Chin New Testament 2006

¹ Tedawngah haila cawh u sih, lamhacuek kah khrihca kawng cangna te ceh taak u poen silang tah aka soep cangna ben la te cawh u sih. Aphu aka awm nawh bii ceh taak tangte te khaw, Pathen oengna te khaw, akung kalawng tong koep tlaih boel sih;

² baptisma kawng cangna oen kuttloengna kawng, thlaang-duek thawhkoepna kawng oen dungyan awlcekna kawng thli te akung kalawng tong koep tlaih boel sih.

³ Haila cawh u sih! Pathen lawng sai a ti atah: te ang boeih te n'sai badai.

⁴ Amami kah oengna aka hoett thli te metila thawlhna a yut koep ai? Ahimi tah Pathen kah aangna khuiah awm u poen, vaan kutdo te khaw ateng alai u poen tih ahimi lawng a huh koei Ciim Muithla khaw a dang u poen;

⁵ Ahimi lawngah Pathen awl a tuui-athlim khaw a ming tih aka law ham koei atue atang san kah tharana te khaw a ming u poen.

⁶ Te tila a ming u lal maiah ahimi lawng oengna te a hoett u! Ahimi te thawlh yut sak koep ham coengg thai tlaih nawh, metihtiah ahimi lawng Pathen capa te thinglam dawng a ngawn koep u tih thlaangtim paalak ah yah a pawh sak u.

⁷ Rawtui khawtlan a yawn tih lotoen thlaang thli hamla aphu aka awm cangphung aka tawi sak dilai te tah Pathen lawng yotheen kam-awmna a peek.

⁸ Tede, thliing-ahang oen bel hawng aka po sak dilai te tah aphu awm nawh; Pathen lawng a tap avoep vetih hai dawngah a phum ai.

⁹ Ka paya thli he tila nangmi tengah awl kavan thui de nangmi kawngah ka ngai mawng, nangmi lawng yotheen kam-awmna atheen ngaai thlawnna na khueh u te kaimi lawng ka ming.

¹⁰ Pathen he atuueng aleeng nawh Pathen aih nawh ni. Nangmi lawng bii na bi u te khaw, amah na lungna u te tueng sak ham Khrihca na puei na paw bawmna na peek u tih tahe toe ah na do na dan u te khaw Pathen lawng hilh manawh.

¹¹ Nangmi lawng na ngaiuep u te ataktang la acoenggna ham nangmi lawng bawmcem ngaihna thinkaw thluembuekna te aboettoe khueh poe uh tila ka ngaih.

¹² Thayong thlaang la na awm u ham ka ngaih nawh, tede oengna, reenna a khueh tih Pathen lawng a kam pe te aka dang thlaang thli angla ni awm sak ham ka ngaih u.

Aka Thlauh Nawh Pathen Awlkam

¹³ Pathen lawng Abraham tengah awlkamna a sai vengah amah awlkam te sai hamla awl a taap. Te tila awl a taap vengah te amah lak ah alenduet khat khaw a awm nawh dawngah amah miing te a hawna.

¹⁴ Ahih lawngah Abraham nala, “Nang tengah awl ka kam, yotheen kam-awmna kan peek vetih na cadil nauha ka puung ka daw sak ai” a tina.

¹⁵ Abraham lawng kawdaw thinsan oen a ring tih Pathen lawng awl a kam te a dang.

¹⁶ Thlaang pakhat lawng awl a taap vengah amah lak ah aka lenduet thlaang pakhat khat kah miing te a hawna atah te awltaapna lawng awlpuungna boeih te a dip a der sak.

¹⁷ Pathen lawng a mengtengna te thlauh tlaih nawh tite amah kah awlkamna aka dang ham koei thlaang thli tengah aciimphanla tueng sak ham a ngaih, tedawngah a awlkam te awltaap oen a cak sak.

¹⁸ Tecoengah, he thaihu pahih awlkamna oen awltaap he tah thlauh thai koei nawh tih he kawngah Pathen lawng a hoem thui thai nawh. Tedawngah amah tengah ngaimawng ngaitoela aka awm mami lawng, mami haiah avan toen ngaiuepna te acakla phoeih ham n'tha thlue u.

¹⁹ He ngaiuepna tah mami lawng hingna hamla thiilungdue angla awm. Te ngaiuepna tah mami ham kuepyingna oen ngaimawngna la a awm dawngah vaan tempal bok-im kah baiyaan te a pooengvoelh tih huen ciim koek alungkir la te kuun.

²⁰ Te kah huen ciim koek te mami m'pha thlan ah mami yuengla Jesuh lawng a pha poen tih Melkhizedek kah bii tomthlepkung la dungyan khawsoeih bawi la awm poen.