Hebrew 12 - Matu Chin New Testament 2006

Mami kah Pa Pathen

¹ Tedawngah he yoeh aih la sausi yahawh lawng mami he n'yaawl khoep poen dawngah mami cehna lawngpui ah kanghalhkung thaihu soeprep boeih oen mami pum ah aka bat mangkhak thawlhna boeih te dul u silang tah mami haiah avan khueh lansak benla te loehlang u silang heng u sih.

² Mami kah oengna atongna kalawng aboetna toe apangtungna thinglam dawng duekna te rih nawh! Te thinglam dawng duekna voel ah awmngaihna lawng a ring poen dawngah thinglam dawng duekna te yahpawhna tila poek nawh tih tahe ah Pathen kah bawi ngawlhcoen bantang ben ah te ngawl poen.

³ Patang a khangna boeih te poek u lah; Thlaangthawlh thli kah thina a ueh roe te mah! Tedawngah nangmi lawng kawboetna oen thathepak la awm u tlaih boel.

⁴ Metihtiah nangmi lawng thawlhna oen na khoelh u vengah he tahe toe atah duekna tangtang oen tah na maneng u thlan.

⁵ Pathen lawng a ca-anau thli nangmi tengah thapeekna awl avan thui te na hilh u poen aw? “Ka ca, Bawipa lawng nang n'siim vengah ngaithuen lah, nang te n'toelthaam vengah na kaw boet sak boel.

⁶ Metihtiah Bawipa lawngtah a lungna boeih te a siim tih a ca la a pawm boeih te tah dan a peek.” tila a thui.

⁷ Nangmi lawng patang na khang te na Pa kah dantatna tila poek hawn; nangmi kah patang khangna lawng nangmi te Pathen lawng a ca thli la a poek poen tite a tueng sak. Ana pa lawng dan a peek nawh a ca khat khaw awm kai aw?

⁸ A ca-anau boeih te dan a peek tih nangmi te dan m'peek nawh atah nangmi tah a ca tangtang nawh tih halhca ni tila thuingaihna awm.

⁹ Mami kah thlaanghing m'pa kawng te poek u lah; ahimi lawng mami te m'phep u de mami lawng n'hinyah u, tedawngah mami kah muithla ben ah m' Pa te metihtlukla a awl ngaai pe tare tih hinyah ham a awm!

¹⁰ Mami kah thlaanghing m'pa lawngtah amami lawngah soeng a ti angla mami te kawlkalhca ah dan m'peek u; tede Pathen lawngtah mami theenna ham oen amah kah ciimna te mami lawng dang van hamla ni dan m'peek.

¹¹ Mami he dan n'tat tih patang khang vengah te kawhoena ohla mami te kaw avan the sak. Te cakhaw dantatna oen thuituen la aka awm thli lawng ahu la tah thlaangdoeng la hingna dawngkah ngaimawngna kutdo te a dang u.

Thuinuetna Oen Ngaithuen Peekna

¹² Tedawngah ayaihoella aka awm na baan thli te asaw la thueng hang langtah thloet aka thuen na tankhuk thli te cak sak u lah!

¹³ Lawngpui doeng ah cet poe u lah, te atah na khow aka yuei te kheem poe nawh vetih hoeih lat poen ai.

¹⁴ Thlaang boeih oen roeproeicala awm ham yawm u lang aciim hingna oen hing hamla yawm uh, metihtiah aciim hingna nawh atah a-u lawngkhaw Bawipa te hu manawh.

¹⁵ Pathen kah lungvatna te a-u lawngkhaw mangthawng taak nawh ham ngaithuen uh. Thingkha thing lawng roeng hang tih asue oen thlaang te raina boehoengla a peek angla a-u khatca khaw awm u boel.

¹⁶ A-u khaw hutaa tawngpa thawlhna sai u boel. Muithla ben te n'tu la aka sak nawh Esau angla awm u boel; Ahih lawngtah amah kah camiing la a awmna te buh vai at caak la a yoeih mai poen.

¹⁷ Na ming u angla hu-aha la ngoen tah ana pa kah yotheenna te paang koep ham a ngaih; tede paang tlaih nawh poen. Metihtiah ahih lawng mikphi baw ruila tlap cakhaw a sai tangte te thawleng thai tlaih nawh.

¹⁸ Israel thlaang thli a law u angla nangmi lawng kut oen tek thai Sinai Tlaang la te na law u nawh. Te tlaang te tah hairawng haialhna, yiin samangting oen muui a yiin riit la yaalna, thlipui thliphoe thawhna oen,

¹⁹ pengsara tum awl oen ah tuen apauna awl yaakna tlaang ni. Te kah tuenpau awl te Israel thlaang thli lawng a yaak u vengah te awl te yaak koep tlaih nawh ham a bih u,

²⁰ metihtiah, “Ramsa khaw, te tlaang te aka caawt sarui tah lungto oen de mat la awm ai” tila a thui awlthlaw te ahimi lawng a ueh thai tlaih nawh dawngah ni.

²¹ Te kah a huh u te tah saringrup la a awm dawngah Mosi lawng, “Ka rih uuet ah ka thuen!” tila a thui.

²² Tede nangmi ngoen tah Zaion Tlaang vanthlaang toeklek toekna oen a awmna, vaan Jerusalem aka hing Pathen kah khawpui la te na law u.

²³ Vaan ah miing thut la aka awm Pathen kah a ca camiing hue awmngaih kawhoe la a tunna ah nangmi tah na law u. Thlaang boeih awlcekkung oen thlaangdoeng thli kah muithla thlaangsoep la aka sai Pathen tengla te na law u.

²⁴ Abel thisen kah sai lak ah thaihu theen ngaai te a thisen dueina oen aka sai, awlkam thaai roekbahkung Jesuh tengla nangmi tah na law u.

²⁵ Tedawngah nangmi tengah awl thuikung hue kah awl te oelhtaih nawh ham ngaithuen uh. Dilai dawngah awlthang thuikung hue kah awl te hutung ham aka ngaih nawh tah loeih u nawh. Vaan kah awl aka thui te mami lawng mangthawng taak atah metila mami n'loeih pai ai!

²⁶ Tevengah te a awl lawng dilai te a hinghuen sak, tede tahe ah awl a kam tah, “Dilai bueng nawh tih vaan te khaw ka hinghuen sak koep ai,” ti.

²⁷ “Ka hinghuen sak koep ai,” tila a thui awl lawngah a tueng sak tah amah lawng a sai thaihu boeih tah hinghuen vetih thoeih kang ai, hinghuen thai nawh thaihu thli te tah cak vetih awm poe ai tite aciimphanla a tueng sak.

²⁸ Tedawngah awmngaih u lah sih, metihtiah mami lawng hinghuen thai nawh ram te m'pang u poen. Mami lawng uem u silang tah amah kawhoena koei hinyahna oen rihsakna oen ah Pathen te bok u sih;

²⁹ metihtiah mami kah Pathen tah thlaang aka phe thai tangtang hai ni.