Hebrew 1 - Matu Chin New Testament 2006

A Capa Tengkah Pathen Awl

¹ Yan veng atah Pathen lawng patuer thli tengah voei yahawh hlang aphunphun la tawngha thli teng kalawng awl a thui.

² Tede, tahe atue boetna ben atah a capa rang oen mami tengah awl avan thui. A Capa rang oen ah khawhipuempa he Pathen lawng a sai tih aboet lam ah thaihu soeprep khuehkung la ahih te Pathen lawng a tuek.

³ Ahih tah Pathen kah ruep-awmna aangna aka tueng sak tih Pathen amah coenggna oen aka lo u taktak ni. Huham tharana aka awm awl oen khawhipuempa he a khawl acuui tih a cak sak. Thlaanghing ham thawlh khawdawp ngaaina oen thawlh ciimna a sai coengah, vaan ah Huham Thara sangkoek Pathen kah bantang ben ah te ngawl.

Pathen Capa Kah Bawilenna

⁴ Pathen lawng a Capa miing a sak he tah vanthlaang thli kah miing lak ah asang van angla a capa khaw vanthlaang thli lak ah bawilen ngai.

⁵ Pathen lawngah a vanthlaang a-u khat khaw, “Nang tah ka Ca la na awm tih tihin ah Kai tah nang kah na Pa la ka awm poen” tina vai nawh. Tecoengah me ang vanthlaang khaw “Kai tah ahimi kah ana Pa la, ka awm vetih ahimi tah ka Ca la awm ai,” tina vai nawh.

⁶ Tede Pathen lawng a Capa camiing awmthang dilai dawng avan tuih vengah, “Pathen kah vanthlaang boeih lawng ahih te a bok u ai” tila a thui.

⁷ Tede vanthlaang kawng tah, “Pathen lawng amah kah vanthlaang thli te yilh la a sai tih, a tuihyoeihthlaang thli te haialh angla a sai,” tila a thui.

⁸ A Capa kawng tah Pathen lawng: “Aw Pathen, namah kah ram tah dungyan toe cak ai! Nang lawngtah na thlaang thli te doengna oen na uk ai.

⁹ Nang lawngtah adoeng te na ngaih tih aka soeng nawh te na thina. Tedawngah nang kah Pathen la aka awm Pathen lawng nang te n'tuek tih na paya laikoei thli a peek lak ah hinyahna oen awmngaihna te nang m'peek tila a thui.

¹⁰ Tecoengah Ahih lawng “Bawipa, nang lawng acuekca ah dilai he na suen tih namah kut oen vaan khaw na sai.

¹¹ Te thaihu tah khum boeih cakhaw, nang tah na cak yoeyah ai; Te thli boeih tah himbai angla pawn boeih ai.

¹² Nang lawngah te thli te angki angla na tliim vetih himbai angla te thli tah thawleng u boeih ai. Tede nang tah amah moepoela na awm tih Na hinglung khaw boet tlaih nawh” tila a thui.

¹³ Pathen lawng a vanthlaang thli te: “Na raal thli he na khowpha huiah khowtloengna la ka khueh thlantoe ka bantang ben ah ngawl” tina vai nawh.

¹⁴ Tetih atah, vanthlaang thli he a-u te ang kai? Ahimi tah Pathen kah bii aka bi muithla la awm tih thlawnna aka dang ham koei thli te bawm hamla Pathen kah a tuih thlaang thli ni.