Ephesa 3 - Matu Chin New Testament 2006

Gental Thlaangphun Ham Pawl Kah Bii Bina

¹ He kawngah ni Khrih Jesuh kah thongtla Kai Pawl lawng nangmi Gental thlaangphun ham Pathen tengah ka thangthui.

² Nangmi kah theenna hamla Pathen lawng a lungvatna oen he bii he bi hamla kai m'peek tite ataktangla nangmi lawng na yaak u poen.

³ Pathen lawng ahuep ahella khawkhanna a sai te a tueng sak tih kai he m'ming sak poen. (He kawng he atoila ka thut poen tih,

⁴ Kai lawng ca ka thut te na tae u atah Khrih kah awlhuep kai lawng ka ming tite nangmi lawng na yaakming u thai ai.)

⁵ Yan veng atah he awlhuep he thlaang thli te ming sak nawh, tede tahe tah Pathen lawng amah Muithla oen amah kah aciim celtuih thli oen tawngha thli tengah a tueng sak poen.

⁶ Te awlhuep tah awlthang theen rang oen Gental thlaangphun lawng Judah thlaangphun oen haih Pathen kah yotheen kam awmna te a dang poen; ahimi tah pumkhat dawngah aka thuum haih van poen tih Jesuh Khrih rang oen ah Pathen kah awlkam te a dang poen.

⁷ Awlthang theen biibikung la ka awm he Pathen kah kutdo ni, he tah amah kah huham tharana oen a sai tih m'peek ni.

⁸ Kai tah Pathen kah thlaang boeih lak ah huhsit koek la ka awm de, Khrih kah thuilek thuina nawh a bawilenna kawng Awlthang Theen te Gental thlaangphun tengah thui hamla,

⁹ Pathen lawng ahuepla khaw akhan te metila ataktangla a thoeng hang tite thlaang boeih ming sak ham biitungpui te kai m'peek. Thaihu soeprep Suenkung Pathen lawng n'hu veng atah amah kah awlhuep te a thuh a elh,

¹⁰ te tila a thuh te tah khrihcabu rang oen ah vanthlaang ukkung thli oen vaan kah huham tharana boeih lawng Pathen kah cuihna soeprep cungkuem te a mingna ham ni.

¹¹ Pathen lawng amah kah dungyan kamthlahna angla a sai tih mami kah Bawipa Khrih Jesuh rang oen a coeng poen.

¹² Khrih oen pumkhatla awmna dawngah mami lawng oengna oen ah Pathen tengla uepna oen tong-aa ohla n'cet u.

¹³ Tedawngah nangmi ham patang ka khang dawngah na kaw boet sak u mai boel tila reenna kavan bih; he ang thli he nangmi kah theenna ham boeih ni.

Khrih Kah Lungna

¹⁴ He kawngah he Pathen haiah khuklu oen ka cuengkueng tih ka buekuep yoeyah,

¹⁵ ahih teng kalawng dilai oen vaan ah aka awm imkhuikaw boeih lawng amami kah miing tak te a dang u.

¹⁶ Nangmi kah akhuiben thinkaw tharana ham amah Muithla rang oen ah a ruep-awm bawilenna dawngkah tharana te nangmi m'peekna ham ka bih tih,

¹⁷ oengna rang oen ah nangmi kah thinkaw lungbui ah Khrih lawng a im te sa seh tila ka thangthui. Nangmi lawng lungna dawngah akung na liing tih thlengyung na thlaakna ham khaw ka thangthui,

¹⁸ te atah Pathen thlaang thli oen thik at la Khrih kah lungna metihtlukla adung tih asang, akau tih asan tite nangmi lawng na ming u ai.

¹⁹ Ahih kah lungna te meveng khaw asoepla ming thai koeila awm nawh de, nangmi lawng a lungna te na ming u ngai ai, tedawngah Pathen pumsa soepna boeih oen nangmi na betoet u ham ka thangthui.

²⁰ Mami kaw khuiah biibikung a huham tharana rang oen mami kah bihna oen poekna lak ah yahawh ngaai aka sai,

²¹ Pathen tengah khrihcabu rang oen Khrih Jesuh rang oen ah yoeyahla dungyan toe ruep-awmna awm hawn seh! Amen.