Caeltueih 15 - Matu Chin New Testament 2006

Jerusalem Tunpui

¹ Thlaang khatsut tah Judia kalawng Antiok la law u tih, “Nangmi lawngah Mosi kah Phungawl lawng a kuek angla yahhuivuen na reet u nawh atah thlawnna na dang thai manawh.” tila a cang puei u.

² Pawl oen Barnabas tah he kawngah ahimi oen oelh ataih u tih awl puung u. Tedawngah Pawl oen Barnabas he Antiok kah thlaang khatsut oen Jerusalem la cet u selang tah he kawng he celtuih thli oen ahaamca thli te doet u seh tila awl a thui u.

³ Khrihcabu lawng ahimi te yawh a thak u; Fonicia oen Samaria ram ben kalawng poe cet u tih Pathen ben ah Gental thlaangphun thli kah kawthawna kawng te ahimi lawng a thui u tih he kah awlthang lawngah oengca boeih te a awmngaih sak.

⁴ Jerusalem te ahimi a pha veng atah khrihcabu oen celtuih thli oen ah ahaamca thli lawng ahimi te a do u tih ahimi rang oen Pathen lawng thaihu a sai boeih te a thui pe u.

⁵ Tede Farasi benla aka awm oengca thli khatsut lawng pai u tih, “Gental thlaangphun lawng yahhuivuen reet u selang tah Mosi kah Phungawl he vai u seh tila thui pe ham awm” tila a thui u.

⁶ Celtuih thli oen ahaamca thli tah he kah awldoetna he poek hamla tun huh u.

⁷ Asan hlang a thui khiing u coengah Piter lawng pai tih, “Maya manau thli, Gental thlaangphun lawng Awlthang Theen te a yaak u tih a tangna u thai ham n'hu vengah Pathen lawng nangmi timkah kai he aka thuikung la n'tuek te nangmi lawng na ming u.

⁸ Thlaang boeih kah poekna mingkung Pathen lawngah Ciim Muithla te mami m'peek van angla Gental thlaang thli khaw a peek van tih ahimi te a do poen tite a tueng sak.

⁹ Ahih lawngah mami oen ahimi laklaw ah pekbona sai nawh; ahimi lawng a tangna u dawngah ahimi kah thawlhna te khawdawp a ngaai pe.

¹⁰ Tedawngah, n'tu hamla nangmi kah patuer thli lawngkhaw, mami nawn lawngkhaw phueih thai nawh thalrih te oengca thli na phueih sak rang oen tahe ah Pathen te noekdak ham na ngaih u?

¹¹ Tetih moenih ta! Ahimi angla mami lawngkhaw n'tangna u van tih Bawipa Jesuh kah lungvatna rang oen thlawnna n'dang u.” a tina.

¹² Barnabas oen Pawl lawng, ahih rawi rang oen Gental thlaangphun tengah Pathen lawng kawpoekrai miknoekna oen kawpoekrai thaihu a sai kawng te a thui hih vengah thlaangping lawng sap a hutung u.

¹³ Ahimi lawng awl a thui boeih u coeng atah Jeem lawng ah: “Maya manau thli, ka awl hutung u lah!

¹⁴ Simon lawng a thui angla Pathen lawng Gental thlaang thli te amah hamla a lawhna rang oen metihtluk la ahimi a thintlawhna tite lamhala a tueng sak poen.

¹⁵ Tawngha thli kah awl thui khaw he kah awl oen vai u. Caciim lawng a thui angla,

¹⁶ ‘Bawipa lawngah, he coengah koep kava meel vetih Devid kah ram te ka thawh koep ai. Aka rawk thli te ka sak koep vetih acakla ka pai sak koep ai.

¹⁷ Tecoengah thlaangphun boeih lawng ka tengla law u vetih kamah kah thlaang la awm hamla ka khue Gental thlaang thli khaw law u ai.

¹⁸ Te tila yan veng kalawng he awl aka mingsakkung Bawipa lawng a thui.’ a tina.

¹⁹ Jeem lawngkhaw a thui pe tih, ‘Pathen benla kaw aka thaw Gental thlaang thli he mami lawng raina peek ham awm nawh tila ka poek.

²⁰ Te lak atah, kutsaimuei bokna ah a nawn u dawngah phung alam ben ah aka caih nawh caak awkk te caak nawh ham; hutaa oen tawngpa thawlhna dawngah kuemsuem ham, rawn khak ramsa te caak nawh ham, sathi khaw caak nawh hamla ca mah pat pe u sih.

²¹ Metihtiah sinakok bok-im ah n'cui veng kalawng Mosi kah Phung awl te Sabbath khawhin roekk ah a tae poepa u tih khaw tawm ah ahih awl te khaw a phawng u poen.” a tina.

Gental Oengca Thli Tengah Capat

²² Tecoengah celtuih thli, ahaamca thli oen khrihcabu lawng Pawl oen Barnabas oen ah Antiok khaaw la tuih haih ham amami bu khuikah thlaang khatsut te tuek hamla awl a tloek u. Ahimi lawngah oengca boeih lawng a hinyah u thlaang pahih Barnabas a ti u Judas oen ah Silas te a tuek u.

²³ Ahih rawi kut ah te a dangkah angla ca a pat pe u: “Nangmi kah maya manau la aka awm kaimi celtuih thli oen ahaamca thli lawng Antiok, Siria oen Cilicia ah aka awm Gental phun maya manau thli te kan toei u.

²⁴ Kaimi tim-kah thlaang khatsut aka law lawngah nangmi te raina m'peek u tih ahimi kah awlthui lawngah ngaihangtum la nangmi te n'khueh u tite ka yaak u. Tede ahimi te kaimi kah mingpueina awm nawh.

²⁵ Tedawngah kaimi tun ka huh u tih laipai tuek u silang tah mami lawng n'lungna Barnabas oen Pawl oen ah nangmi tengla tuih haih sih tila boeih ka kaw vai u.

²⁶ Pawl oen Barnabas tah Bawipa Jesuh Khrih kah bii dawngah duek oen hing khaw aka maa nawh thlaang ni.

²⁷ Tedawngah ca oen kavan thut u he nangmi tengah thui pe hamla Judas oen Silas he kavan tuih u.

²⁸ He kah angoe phung alam coengah atloe thalrih khatca khaw nangmi sawah tloeng nawh hamla Ciim Muithla oen kaimi ka kaw vai u poen:

²⁹ kutsaimuei tengah a nawn caak awkk te ca u boel; sathi ca u boel; rawn khak ramsa te ca u boel; hutaa oen tawngpa thawlh u boel. He ang thaihu boeih he nangmi lawng sai nawh ham na kuemsuem u atah theen mai poen. Na sa ding u seh.” tila a thut pe u.

³⁰ Laipai thli te a tuih u tih Antiok khaaw la te cet u, tela te a pha u atah oengca thli te vai at la a tun sak tih capat te ahimi kut ah a peek u.

³¹ Ahimi lawng ca te a tae u vengah thathlue thakawna awl dawngah te a kaw hoe u tangkiik.

³² Judas oen Silas khaw tawngha la a awm hih dawngah ahimi tengah thathluena awl oen thapeekna awl asanhlangla a thui pe hih.

³³ Ahih rawi tah te ah te akhoek anoen a awm hih coeng atah oengca thli lawng sading ngaimawng la a thak u tih aka tuihkung thli tengla koep meel hih.

³⁴ (Tede Silas tah te ah te awm hamla kamthlah.)

³⁵ Pawl oen Barnabas tah Antiok khaaw ah asanhlang awm hih tih thlaangtloe hue oen Bawipa awl te a phawng u tih a cang puei u.

Pawl oen Barnabas Pek Hih

³⁶ Te ah te a awm ran hih coeng atah Pawl lawng Barnabas nala te, “Bawipa awl mahih lawng n'thuina khaaw boeih ah te cet silang tah maya manau thli te hip lah sih, metila nuem a awm kai, hiil-adawng lah sih.” a tina.

³⁷ Barnabas lawngtah Johan Mark te ceh puei ham a ngaih,

³⁸ Tede ahih tah te rawi kah biibina aboet toe ah baang poe nawh tih ahih rawi te Pamfilia ah a ceh taak tih a meel koep dawngah Pawl lawngtah ahih te ceh puei hamla theen nawh tila a poek.

³⁹ Te kawngah awl puung hih tih ahih rawi tah pek ahih: Barnabas lawng Mark te a khue tih Saipras la tuisangphaw oen cet hih.

⁴⁰ Pawl lawngah Silas te a tuek tih oengca thli lawng Pathen kah lungvatna dawngah a nawn u coengah cet hih van.

⁴¹ Ahih tah Siria oen Cilicia ben kalawng poe cet tih khrihcabu thli te tha a thlue sak.