3Johan 1 - Matu Chin New Testament 2006

¹ Ahaamca teng kalawng- Ka lungna Kaia, ataktangla ka lungduet tengah:

² Ka lungna ka puei, soeprep boeih te anepnoeila a awmna ham oen sadingla na awm thaina ham ka thangthui. Muithla ben ah sadingla na awm tila ka ming.

³ Nang tah awltak ben ah ueppangla na awm tih awltak dawngah na awm yoeyah tila khatsut Khrihca maya manau thli a law u vengah avan thui u tih ka awmngaih tangkiik.

⁴ Ka ca thli te awltak dawngah awm u tila ka yaak thloei ah kai awmngaih sak tare ngai atloe awm nawh.

Kaia Koehna

⁵ Ka lungna ka puei, Nang tah na pueipaw Khrihca thli ham Bii na bina ah ahimi mingtung mingnawh mai ham khaw ueppang tangtang la na awm.

⁶ Nang kah lungna kawng te ahimi lawng he kah Khrihcabu tengah a thui u poen. Ahimi khawlawng la poe a cehna u ham Pathen kah kawtlaakla bawmcem u de.

⁷ Ahimi lawng Khrih kah bii bina ah khawlawng ceh a tongcuek u vengah aka oeng nawh thli tengah bawmcemna thaihu khat khaw lawh ohla khawlawng cet u.

⁸ Tedawngah ahimi kah awltak bii he aka bi puei thlaang la awm van ham mami Khrihca thli lawng khaw he ang thlaang hue he tah bawmcem ham awm.

Diotrifi Oen Demetrias

⁹ Khrihcabu tengah ca atoica kavan thut; tede ahimi kah mawtkung la awm ham aka ngaih Diotrifi lawngtah ka awlthui he n'tu la khaw ngaai manawh.

¹⁰ Tedawngah kai ka law atah a sai thaihu boeih oen mami kawng a thui boeih te oen a hoem thui boeih te ka daih pe badai. Tecoengah he bueng muehla Khrihca maya manau thli a law ah khaw ahih lawng do nawh, ahimi te do ham aka ngaih thli te khaw a khang pe tih Khrihcabu khui kalawng ahimi te hek hamla a yawm mangkhak.

¹¹ Ka lungna ka puei, athe thaihu te oett boel lang atheen thaihu te oett lah. A-u khaw thaihu theen aka sai tah Pathen thlaang la awm; A-u khaw thaihu the aka sai tah Pathen te hu nawh.

¹² Demetrias kah theenna he thlaang tawm lawng a thui; awltak roe lawng ahih kah theenna he a thui. Mami lawngkhaw atheenna te n'thui u tih kai lawng ka thui he soeng tila na ming u.

Aboet Lam Toeina

¹³ Nang tengah awl thui ham yahawh tangkiik awm, tede caram dawng catui cahaang oen thut ham ka ngaih nawh.

¹⁴ Nangmi te ayuela huh ham ka ngaih, tevengah pumpakla mami lawng awl n'thui u badai.

¹⁵ Nangmi tengah ngaimawngna awm hawn seh. Kaimi kah paya boeih te pumpakla rip van toei.