2Korin 7 - Matu Chin New Testament 2006

¹ Ka lungna paya thli, he awlkam boeih he mami tengah ni a sai. Tedawngah pumtaksa khawseh, muithla khawseh, aka ciim sak nawh soeprep boeih dawng kalawng mami he ciimcaih u silang Pathen hinyahna oen aciimsuekla hing u sih.

Pawl Kah Awmngaihna

² Nangmi thinkaw khuiah kaimi hamla ahuen van khueh u van lah. Kaimi lawng a-u khaw ka thena u nawh; a-u khaw ka rawk sak u nawh, a-u kah thaihu khaw atuueng nawh la lawh ham ka yawm u nawh.

³ He tila ka thui he nangmi te sal-aphaamna ham ka thui moenih; kaimi lawngah nangmi oen duek haih hing haih hamla ka thinkaw ah kan tleng-elh u tite n'hu vengah kavan thui u poen.

⁴ Nangmi te kan uep kan pangna tangkiik; Nangmi kawngah ka pawmsang u! Kaimi lawng raina soeprep ka tawng cakhaw thincak oen ka awm; Awmngaih kawhoena oen ka betoet.

⁵ Macidonia ka pha u vengah pateng khaw, ading asuek la ka awm u nawh. Khaw tawm ah raina awm, thlaangtloe hue oen tawhsina awm, ka kaw khuiah thluep ka luekueng.

⁶ Tede kawmoetkawma la aka awm thlaang thli te thathlue thakaw la aka awm sak Pathen lawngah kaimi tengah aka law Titas rang oen tha avan thlue sak.

⁷ Titas a law dawngah kaimi he awmngaih sak te bueng nawh tih ahih te nangmi lawng tha navan peek u dawngah khaw ka awmngaih u. Nangmi lawng kai he huh hamla na ngaih u tangkiik, metihtlukla na kaw a the u tih nangmi lawng kai he nan pai puei u tite Titas lawng kaimi tengah avan thui tih tahe ah ka awmngaih tare ngai.

⁸ Metihtiah ka capat lawngah nangmi te na kaw van the sak mai cakhaw te capat te kavan thut dawngah ka kaw the nawh. Te capat lawng kawlkalh ah nangmi na kaw avan the sak te ka ming vengah ngaaithe laat la ka awm.

⁹ Tede, tahe tah ka awmngaih poen, nangmi te kaw kavan the sak dawngah nawh tih na kawthena lawng nangmi te thinkaw avan thaw dawngah ni. Te kawthena te Pathen lawng ni a hawna, kaimi lawng nangmi te nganbawh kan peek aih moenih.

¹⁰ Pathen lawng ahawna kawthena lawngtah thlawnna ah aka ceh puei thinkaw thawna a thoeng sak tih te ang kawthena dawngah yutlawina ngoe nawh! Tede thlaanghing kah kawthena mai atah duekna te a thoeng sak.

¹¹ Nangmi kah kawthena te Pathen lawng metila a hawna tite ming u lah: nangmi te tha avan thlue sak poen; na thawlh u nawh tite tueng sak ham metihtlukla na kaw a thluembuek u! Na thin sa u, na lakueng u, nan ngaai tangkiik u poen, doengna te sai ham na ngaih u poen; sai thawlhna te dan peek ham oepsoehla na awm u! He thaihu boeih dawngah he nangmi tah thawlhpalhna awm nawh tite namami lawng na tueng sak u poen.

¹² Tedawngah te kah capat nangmi tengah ka thut te tah thlaang pakhat kah thawlhna, tihnawhtah, thlaang pakhat kah saithawlhna dawngah kavan thut nawh ni. Pathen mik huh ah kaimi ham ataktang la nangmi lawng pum na peek u tite tueng sak ham ni kavan thut.

¹³ Te tah kaimi kah tha-awmna ni. He dawng bueng ah ka tha thlue u nawh; Nangmi boeih lawng Titas te navan bawm u, a kaw navan hoe sak u tih ahih kah kawhoena lawngah kaimi he kaw avan hoe sak tare!

¹⁴ Kai lawng nangmi kawng te ahih tengah ka oekthloenna u poen, nangmi lawng kai he tha nan the sak u nawh. Kaimi lawng nangmi tengah awltak te ka thui yoeyah u tih te tila Titas tengah ka oekthloen u te khaw soeng.

¹⁵ Ahih kah thuituenna awl te ngaai hamla nangmi te oepsoehla na awm u tih nangmi lawngah ahih te rihna oen na thuen u tih lakueng lalapla na do u te a poek vengah nangmi n'lungna te tlo tare.

¹⁶ Nangmi te kan uepna rapcaat thai poen dawngah ka awmngaih tangkiik.