2Korin 6 - Matu Chin New Testament 2006

¹ Tedawngah kaimi tah Pathen oen bii aka bi haih la ka awm u dawngah Pathen kah lungvatna aka dang nangmi lawng te lungvatna te apoeila coeng sak u boel tila reenna kavan bih u.

² Pathen awlthui he hutung u lah: ‘Nangmi te kan reenna atue atang a pha vengah nangmi awl te ka hutung poen; nangmi te thlawnna khawhin a pha vengah kan bawm u” tila a thui. Hutung u lah! Pathen kah reenna te dangna atue tah tahe poen ni; tihin he thlawnna khawhin poen ni!

³ Kaimi kah biibi he a-u lawngkhaw a cawtt abauh ham te ka ngaih u nawh dawngah a-u kah lawngpui ah khaw kanghalhna khat khaw ka khueh pe u nawh.

⁴ Te tila te sai ohla khawdeng mingna, raina, patang khangna boeih he kawdaw thinsan oen ka ueh u tih soeprep boeih ka saina dawngah Pathen kah tuihyoeihthlaang la ka awmna te ka tueng sak u.

⁵ Kaimi he cungpoelh oen n'bawh u, thong ah n'thlaak u tih rangpui kah awlpuung kaacaan la saina te ka yawkk u. Kaimi he duemdawng ohla bii n'bi sak u tih ih mueh ih naai la, buh mueh buh pawng la n'khueh u.

⁶ Kaimi lawng thinkaw ciimna, cuihhoena, kawdawna, reenna oen ah khaw, Ciim Muithla rang oen ah, lungna tang tang oen ah khaw,

⁷ awltak awlthang te phawngna oen, Pathen kah huham tharana oen ah Pathen kah tuihyoeihthlaang la ka awmna te ka tueng sak u. Kaimi lawng raal teekna ham khawseh, kamami pum thloetna ham khawseh, doengna te awva angla ka hawna u.

⁸ Kaimi lawng hinyahna khaw ka tawng u tih thekhana khaw ka tawng u; sal-aphaamna khaw ka tawng u tih koehna khaw ka tawng u. Kaimi he thlaangthaipalat la n'ngaai u de awltak ka thui u;

⁹ a-u lawngkhaw a ming nawh thlaang angla n'sai u de, thlaang boeih lawng m'ming u; thlaang duek angla n'poek u de, nan huh u angla ka hing u hun. Dan tah n'tat u de n'ngawn u nawh;

¹⁰ Kaw avan the sak u de ka awmngaih u yoeyah; kaimi khawdeng thlaang angla ka awm u de, thlaang yahawh te ka bawi sak u, thaihu khat khaw khueh nawh angla ka awm u de, atak tang atah kaimi lawng soeprep ka khueh ka toen u.

¹¹ Kawrin khaaw kah ka lungna ka paya thli! Nangmi tengah acairaula kavan thui u poen; kaimi lawng lungbui thawhka akaula kavan awng u poen.

¹² Kaimi lawng nangmi ham thinkaw thawh kavan khai khoep nawh; Nangmi lawng ni kaimi ham na thinkaw thawh na khaih khoep u.

¹³ Tahe ah nangmi he kamah kah ca anau thli angla awl kavan thui u: Nangmi tengah thinkaw ka khueh u van la te kaimi tengah khueh u van lah. Na lungbui thawhka te akaula van awng uh!

Oeng Nawh Hue Kah Liw-alanna Nagithuen Uh

¹⁴ Nangmi lawng aka oeng nawh thlaang thli oen avan at la bii te bi haih ham yawm u boel, te tila bii haih ham te coeng thai nawh. Metila aka soeng oen ah aka soeng nawh te a yok u haih thai ai? Metila aangna oen yiinna te a awm haih thai ai?

¹⁵ Metila Khrih oen Raaibawi te a kaw a vai hih thai ai? Aka oeng thlaang pakhat lawng aka oeng nawh thlaang pakhat oen ah a khueh haih n'tu aka awm?

¹⁶ Metila Pathen kah tempal bok-im te aka oeng nawh kutsai mueime oen a roep hih thai ai? Metihtiah mami tah aka hing Pathen kah tempal bok-im ni! Pathen amah lawngah, “Kai lawngah ka awmna im te ka thlaang thli oen ka sak vetih ahimi tim ah ka awm ai; Kai tah ahimi kah Pathen la ka awm vetih ahimi te kai kah thlaang la awm u ai,” ti.

¹⁷ Tedawngah Bawipa lawng, “Nangmi lawng ahimi te ceh taak u lang ahimi teng kalawng athloekla thloeng uh. Nangmi lawng aka ciim nawh te ahimi oen sai haih u boel, te atah nangmi te kan do ai.

¹⁸ Kai tah nangmi kah na pa la ka awm vetih, nangmi tah ka canu oen capa la na awm u ai, tila Thara koek Bawipa lawng a thui,” ti.