2Korin 4 - Matu Chin New Testament 2006

Dilai-am Khuikah Muithla Ben Kaawn

¹ Pathen lawng reenna oen he kah bii he bi hamla kaimi m'peek dawngah kaimi tah ka kaw boet nawh.

² Kaimi lawng ahuepla thaihu sai boeih oen yarau saina boeih te ka hoett u poen; kaimi lawng thailatna ka sai u nawh, Pathen kah awl khaw asoeng a kam nawh la ka thui u nawh. Kaimi tah Pathen mik huh ah awltak aangna dawngah ka hing u tih thlaang boeih kah athetheen mingna kawpoek te atheenna ham kamami oen kamami he phep u ham ka yawm u.

³ Kaimi lawng ka phawng u awlthang theen he thuh la a awm atah aka auh lii thlaang thli ham ni thuh la a awm ai.

⁴ He dilai kah raaibawi pathen lawng ahimi kah thinkaw te yiinna khuiah a khueh dawngah ahimi lawngah tangna u nawh. Ahih lawngah Pathen oen aka lo u tangtang Khrih kah ruep-awmna kawng Awlthang Theen dawng kalawng aka thoeng aangna, ahimi sawah aka vangg aangna te huh nawh ham a dah khoep.

⁵ Kaimi lawng kamami kawng he ka thui u nawh; kaimi lawng Jesuh Khrih tah Bawipa ni tila ka thui u tih Khrih hamla kaimi he nangmi kah tuihyoeihthlaang la ka awm u.

⁶ Khrih kah mik-hai dawngah aka aang Pathen kah ruep-awmna te ming thaina ham mami kah lungbui khuiah amah kah aangna te aka vaang sak Pathen oen ah “Yiinna khui kalawng aangna te vaang ai!” tila aka thui te atloe nawh tih Pathen amah toeng toeng ni.

⁷ Tede Pathen tengah saithaina asang koek te awm tih mami tengah awm nawh tite a tuengna ham Muithla ben ro thaihu khuehkung mami he tah dilai-am mailai la ni n'awm mai.

⁸ Mami lawng patang raina tah n'tawng poepa de n'rek tang tang aih nawh; alak avai atah kawpoek cawm-am sut de kawpoek boet dingri aih nawh;

⁹ raal-asa broela awm de, paya khatca khaw khueh muehla tah n'awm aih nawh; mami he nganbawh tah broela n'yawkk sak u poen de a duek tah n'duek u aih nawh.

¹⁰ Mami kah pum dawngah amah kah hingna te a tueng thaina ham Jesuh kah duekna te mami kah aka duek thai pum dawngah n'khuen poepa.

¹¹ Mami kah aka duek thai pum dawngah amah kah hingna te a tueng thaina ham Jesuh hamla mami lawng hingkhui puet ah duek thlipit la n'awm u poepa.

¹² He kah thuingaihna tah kaimi pum dawngah he duekna lawng bii a bi de, nangmi pum dawng atah hingna lawng bii a bi.

¹³ Caciim lawngah, “Ka tangna tih ka thui” ti. Te ang oengna thinkaw oen ah te kaimi lawng ka tangna u dawngah ka thui van.

¹⁴ Bawipa Jesuh te duekna kalawng hingna ah aka thawh sak Pathen lawngah kaimi khaw Jesuh oen haih n'thawh sak vetih nangmi oen thik at la amah haiah te n'kuun puei ai tila mami lawng m'ming u.

¹⁵ He ang thli boeih he tah nangmi hamla ni, Pathen lungvatna lawng thlaang yahawh tengah a pha tare van angla Pathen ruep-awmna hamla ahimi lawng awmngaih ciil a thui khaw yahawh van ai.

Oengna Oen Hingna

¹⁶ He tila a awm dawngah metuek vengah khaw kaimi tah ka kaw boet nawh. Mami kah pumtaksa he voehvoeh ah tlum ahonn ngoen cakhaw, mami kah muithla hingna tah hin at coeng hin at athaaila coengg tare hang.

¹⁷ Tecoengah mami lawngah raina tehca kawlkalh ah n'tawngna lawngah he, he kah raina lak ah abo ngaai dungyan ruep-awmna te apueh asawmla m'peek ai.

¹⁸ Metihtiah mami lawngah mik huh thai thaihu te miktakna nawh tih mik huh nawh thaihu te ni m'miktakna. Mik huh thaihu tah kawlkalh ni a cak, tede mik huh nawh thaihu tah yoeyahla cak.