2Johan 1 - Matu Chin New Testament 2006

¹ Ahaamca teng kalawng- Ka lungna hinyah koei Nutakhong oen a ca thli tengah: Kai bueng lawng kan lungna nawh tih awltak aka ming boeih lawngtah n'lungna,

² Metihtiah awltak tah mami khuiah awm tih mami tengah ayoeyah awm ai.

³ Pa Pathen oen Pa kah Capa Jesuh Khrih lawng lungvatna, reenna oen ngaimawngna te m'pe selang awltak oen lungna tah mami tengah awm yoeyah seh.

Awltak Oen Lungna

⁴ Pa lawngah mami awl m'peek angla na ca thli khatsut tah awltak dawngah a hing u te ka huh vengah ka awmngaih tangkiik.

⁵ Tedawngah ka lungna Nutakhong pakhat oen khat boeih lung u sih. He he awlpeek thaai kavan thut moe nih; he tah acuekca veng kalawng yaak tangte awlpeek te ni.

⁶ He kah lungna tila ka thui ngaihna tah Pathen kah awlpeek te vai tih mami lawng hing ham awm ti ngaihna ni. Te awlpeek te tah acuekca veng kalawng boeih na yaak u poen angla lungna oen awm boeih uh ti he ni.

⁷ Jesuh Khrih tah thlaanghing pumsa la law tila aka tangna nawh thlaang, thlaangthaipalat thli dilai pum ah cet khonghak poen. Te ang thlaang te tah thlaangthaipalat oen Khrih kah raal ni.

⁸ Tedawngah nangmi lawng ngaiuepna oen na bi u te sungdeuh nawh ham oen ah na mami kah kutdo te asoepla na dang thaina ham ngaithuen lang awm uh.

⁹ A-u khaw Khrih kah cangpueina dawngah aka awm nawh tih te voel ah aka cet lawngtah Pathen te khueh nawh. A-u khaw cangpueina dawngah aka awm khak tah pahih bokla Pa oen Capa te a khueh.

¹⁰ Tedawngah a-u khaw pakhat khat nangmi tengah law tih he kah cangpueina he avan khuen nawh atah na im ah pah sak u boel; “Na sawah ngaimawngna awm seh” tila khaw tina boel.

¹¹ Metihtiah a sawah ngaimawngna awm seh tila aka ngaih tah ahih kah thaihu the saina dawngah bii bi puei la aka thuum van poen ni.

Boetna Awl

¹² Nang tengah awl thui ham yahawh tangkiik awm de caram dawng catui cahaang oen ka thut nawh vetih mami awmngaih kawhoena asoepna ham ah nangmi oen pumpakla awlthui ham kamyin la nangmi teng law ham ka cai.

¹³ Na lungna na nau kah a ca thli lawng nang te n'toei u.