1Timothy 1 - Matu Chin New Testament 2006

¹ Mami kah Thlawnkung Pathen oen mami kah ngaiuepna Khrih Jesuh rang oen ah Khrih Jesuh kah celtuih la aka awm Kai Pawl lawngah:

² Oengna ah ka capa tangtang la aka awm Timote nang hamla ca kavan pat. Pa Pathen oen Bawipa Jesuh Khrih lawngah lungvatna, reenna oen ngaimawngna te m'pe hawn seh.

Aka Soeng Nawh Cangpueina Ngaithuen

³ Macidonia ram la ka ceh vengkah awl kan uen angla te Efesa khaaw ah na awm hamla ka ngaih. Thlaang khatsut lawng Efesa khaaw ah asoeng nawh oengna a cang puei u tih ahimi te na toeng sak ham awm.

⁴ Awlpuungna bueng aka thoeng sak ciil awl thli oen aka boet nawh nukaw pakaw patuer thli thoepna te ang thli te a toengna u ham thui peh; te ang thli oen ah te oengna oen ming ham koei la aka awm Pathen khawkhanna te n'sai thai nawh.

⁵ He tila awl kan peek he mengtengna tah athetheen mingna kawpoek ciim oen oengna tangtang oen ah thinkaw ciim dawng kalawng lungna te a thoengna ham thaphawhna ni.

⁶ Thlaang khatsut lawngtah he he a hoett u tih alawng ala nawh awlpuungna benla cet u.

⁷ Ahimi lawngah Pathen kah phungawl cangpueikung la coengg ham tah a ngaih u, tede ahimi lawngah amami kah awl-thui te khaw yaakming u nawh tih aka ming ceet angla a thui thaihu kawng te khaw ming u nawh.

⁸ Phungawl he atawng aleengla hawna koei ah n'hawna atah theen tite mami lawng m'ming u.

⁹ Ming ham tah phungawl he thlaang theen thli hamla sai nawh tih phungawl phekung thli oen lumlai aka hu thli, Pathen aka ming nawh thli oen thlaangthawlh thli ham, bokna ben oen muithla ben tu la aka sak nawh thli ham, a manu oen ana pa aka ngawn thlaang thli ham, thlaang aka ngawn thli ham,

¹⁰ Khawboe the thlaang thli ham, hutaa tawngpa thawlhna aka sai thlaang thli ham, tlangsum caak ngaih ah thlaang aka tu thli ham, hoem thui thli oen asoeng nawh sausi la aka pai thli ham, asoeng oengnakungpui te aka kalh thlaang thli ham ni a sai pe.

¹¹ Te ang cangpueina te tah kai lawng ka thui ham koei la m'peek awlthang theen dawngah te awm tih, ruep-awm oen theenduet Pathen tengkah Awlthang Theen ni.

Pathen Kah Reenna Dawngah Awmngaihna

¹² Bii ka bina dawngah tharana pekung Khrih Jesuh mami kah Bawipa tengah awmngaih ciil ka thui. Kai he amah kah bii bi hamla tueng aleng tila a poek tih bii m'peek dawngah ka uem tangkiik.

¹³ N'cui vengah ahih te kai lawng athela ka thui, ka heem ka tek tih thekha la ka sai, kai lawng oengna ka khueh nawh dawngah n'tu ka sai ti khaw ka ming nawh, tede Pathen lawngtah kai he n'reen.

¹⁴ Mami kah bawipa lawngah amah kah lungvatna te yahawh hlang la ka sawah avan lun tih oengna oen lungvatna te m'peek. Khrih Jesuh oen pumkhat la awmna rang oen ah te ang thli te mami kah koe-ava la awm poen.

¹⁵ Khrih Jesuh tah thlaangthawlh thlawn ham dilai la va law ti he tah aka soeng tangtang awl la awm tih lawh koeloe ham koei oen tangna koei ni. Kai tah thlaangthawlh boeih lak ah athe khuet ni;

¹⁶ tede Pathen lawng kai he n'reen tih thlaangthawlh boeih lak ah kai aka the khuet sawah kawdawna a khueh he tah hailam ben ah amah aka oeng tih dungyan hingna aka dang ham koei thlaang boeih kah miknoekna ham ni.

¹⁷ Dungyan Sengpahrang, aka duek thai nawh oen mik oen huh thai nawh pakhat bueng la aka awm Pathen tengah hinyahna oen ruep-awmna tah ayoeyah la awm hawn seh! Amen.

¹⁸ Ka ca Timote, n'hu vengah tawngha lawng nang kah kawng a thui angla te na tengah awl kan peek. Te awl te atheenla raal kahna ham awva la hawna lang na oengna, athetheen mingna kawpoek ciim te cak sak.

¹⁹ Thlaang khatsut lawng athetheen mingna kawpoek te n'tu la sak u nawh tih amami kah a oengna te a phe u.

²⁰ Te thlaang thli tim ah te Himanias oen Alekzandar khaw thuum hih van tih te rawi te Seitan kut ah ka tloeng tih dan ka peek poen; te tila te ahih rawi lawng Pathen thangthe la a thui te toeng hamla a cang hih ai.