1Thessalonika 5 - Matu Chin New Testament 2006

Ngaithuen Oepsoeh Uh

¹ Maya manau thli, he ang thaihu a thoengna ham atue atang oen khawhin kawng he nangmi tengah ca thut ham ngoe nawh.

² Metihtiah Bawipa a lawna Khawhin tah khawyiin ah thlaanghuuen angla law ai tite nangmi lawng atheenla na ming u.

³ thlaang thli lawngah, “Soeprep boeih tah ding asuek tih ngaimawng ngaitoela awm,” a ti u vengah bawtbet khawlai maiah raina lawng ahimi te a tlaak thil ai! Tattloel hutaa ca-awm tlawhna lawng kawlkalh ah a pha angla te awm vetih a-u thlaang khaw deem manawh.

⁴ Tede, maya manau thli, nangmi tah yiinna khuiah na awm u nawh dawngah te khawhin lawngah nangmi te thlaanghuuen angla n'let sak manawh.

⁵ Nangmi boeih tah aangna dawngkah thlaang, khawthaih thlaang la na awm u. Mami he tah khawyiin thlaang, yiinna thlaang nawh ni.

⁶ Tedawngah mami tah thlaangtloe angla ihdut ham awm nawh, mami lawng hinghang u silang huertuela awm u sih.

⁷ Thlaang he tah khawyiin ah ni a ih u, khawyiin ah ni ahimi yuu a ruui u.

⁸ Tede mami tah khawthaih thlaang ni, huertuela awm u sih. Mami lawng oengna oen lungna te kahkawng rangphaw la daan u silang tah mami kah ngaiuep thlawnna te thiilumuek la muek u sih.

⁹ Pathen lawng amah kah thinsana patang khang sak hamla mami he n'tuek nawh, mami kah Bawipa Jesuh Khrih rang oen thlawnna te paang ham ni n'tuek u;

¹⁰ amah a law vengah mami lawng duek ah khaw-seh, hing ah khaw seh amah oen hing haih ham ahih tah mami ham duek.

¹¹ Tedawngah nangmi lawng tahe ah na sai u angla te khat oen khat thaphawh u langtah khat oen khat bawmcem uh.

Hukhueng Thuituenna Oen Toeina

¹² Maya manau thli, khrihca hingna oen nangmi thuituen tih lawngpui aka nueh, nangmi tim ah bii aka bi thlaang thli te na hinyah u ham reenna kavan bih.

¹³ Ahimi kah biibina dawngah te asangla hinyahna lang lungna uh. Nangmi khat oen khat roeproeicala awm uh.

¹⁴ Maya manau thli, nangmi lawngah thayong thlaang te ngaithuenna pe uh, riyawp thlaang te thincakna pe uh, tha aka yoek thlaang te bawmcem uh, thlaang boeih tengah na kaw daw sak ham kan uen u.

¹⁵ A-u lawngkhaw athe te athe van oen thung u boel, khat oen khat sawah khawseh, thlaang boeih sawah khaw seh theenna te sai hamla poek yoeyah uh.

¹⁶ Awmngaih poepa u lah,

¹⁷ boet ohla thangthui uh,

¹⁸ soeprep boeih ah awmngaih ciil thui uh, Khrih Jesuh oen pumkhatla na hingna dawngah he tila hing hamla Pathen lawng a ngaih.

¹⁹ Ciim Muithla te kanghalh u boel;

²⁰ Muithla kah bawnghorhna oen a thui awl te ngaai lakna ohla awm boel.

²¹ Soeprep boeih te noekdak uh, atheen te lo uh,

²² athe thaihu boeih te reel-aram uh.

²³ Ngaimawngna pekung Pathen lawng soeprep ah n'ciim sak u hawn seh, mami kah Bawipa Jesuh Khrih a law vengah nangmi kah pum boeih, na muithla, na hingna, oen pumtaksa te amah lawng kuem selang tah thawlhpalhna boeih kalawng n'loeih sak seh.

²⁴ Nangmi khuekung te tah uep-awm la a awm dawngah te tila avan sai ai.

²⁵ Maya manau thli, kaimi ham khaw thangthui uh.

²⁶ Aka oeng boeih te boenhui angla lungna oen toei uh.

²⁷ Bawipa kah saithaina aana oen ah he capat he aka oeng thlaang boeih tengah tae pe ham reenna kavan bih.

²⁸ Bawipa Jesuh Khrih kah lungvatna tah nangmi boeih sawah awm hawn seh.