1Thessalonika 4 - Matu Chin New Testament 2006

Pathen Kawtawng Hingna

¹ Aboetna ah maya manau thli, Pathen kawhoena ham metila na hing u ham a awm tite kaimi tengah na cang u poen. Kaimi tengkah na cang u angla te na hing u hamla awm tih yahawh ngaaila na hingna tare ham Bawipa Jesuh miing oen ah kan ceel u.

² Bawipa Jesuh kah saithaina aana oen thuituenna kan peek u te na ming u.

³ Pathen lawng nangmi te ciim sak ham oen ah hutaa tawngpa thawlhna cipp muelmang sak ham a ngaih.

⁴ Nangmi tawngpa boeih lawngah aka ciim tih hinyah koei la na yu oen benbaw benpang ham te ming uh,

⁵ Pathen aka ming nawh thlaang hurthok angla pumsa hue-ngaihna oen hing u boel.

⁶ Tecoengah he kawngah he a-u lawngkhaw khrihca paya laikoei sawah thawlhpalhna sai boel seh, koeih vaih nawh la proeih mak boel seh. Te tila aka sai boeih tah Pathen lawng dan a peek ai tite kavan thui u tih nangmi te ngaithuenna kan peek u poen.

⁷ Pathen lawng mami he cuk-halhna dawngah bawlneeng sak hamla n'khue nawh tih aciim acaihla awm ham ni n'khue u.

⁸ Tedawngah a-u khaw he kah cangpueina he aka vai nawh tah thlaanghing te hoett nawh, tede amah kah Ciim Muithla pekung Pathen te ni a hoett poen.

⁹ Nangmi lawng aka oeng na paya laikoei thli lungna ham a kawng te capat kavan thut ham ngoe nawh. Nangmi khat oen khat lung u ham Pathen lawng namami te n'cang puei u poen.

¹⁰ Nangmi lawngah ataktangla Macidonia rampum kah maya manau boeih te na lungna u poen. Tedawngah maya manau thli, te tila na lungna u tare ham kan coep kan ceel u.

¹¹ Kavan thui u poen angla acuep amueihla khawsak ramsak ham poek uh, namami kah bungkhutna dang ham na bii na lawh te tluep ngaithuen uh.

¹² Te atah aka oeng nawh thlaang thli lawngah n'hinyah u vetih na ngoena boeih ah te thlaangtloe sawah pangtung ham ngoe manawh.

Bawipa A Lawna

¹³ Maya manau thli ngaiuepna aka khueh nawh thlaang thli angla nangmi na kaw a the nawh ham aka duek thli kawng awltak te nangmi ming sak hamla ka ngaih.

¹⁴ Jesuh tah duek tih tho koep tite mami lawng n'tangna u, tedawngah amah te oeng ruila a ka duek boeih tah Jesuh oen haih ah Pathen lawng avan khuen koep ai tite mami lawng n'tangna.

¹⁵ Tahe ah nangmi kan cang puei u he tah Bawipa kah cangpueina ni. Bawipa a lawna khawhin ah mami aka hing hue lawngah he aka duek thli te n'khall lettat manawh.

¹⁶ Metihtiah, awlpeekna paang awl, vanthlaang ukkung kah paang awl, Pathen kah pengsara awl oen Bawipa amah te vaan kalawng va rum thuk ai Khrih oeng ruila aka duek thli te lamhala tho u vetih,

¹⁷ tecoengah teveng tue ah aka hing mami tah khawhi ah Bawipa oen huh u hamla muui dawngah ahimi oen n'tun haih ai. Te tila te mami tah Bawipa oen n'awm haih poe poen ai.

¹⁸ Tedawngah he awl oen ah he nangmi pakhat oen khat thaphawh uh.