1Thessalonika 1 - Matu Chin New Testament 2006

¹ Pawl, Silas oen Timote lawngah Pa Pathen oen Bawipa Jesuh Khrih kah thlaang la aka awm Tesalon khaw kah khrihcabu tengah ca kavan pat u. A lungvatna, ngaimawngna tah nangmi tengah awm hawn seh.

Tesalon thlaang thli Kah Hingna Oen Oengna

² Nangmi boeih ham Pathen tengah awmngaih ciil ka thui u poepa tih ka thangthuina u vengah khaw nangmi te kan poek u yoeyah.

³ Metihtiah, nangmi lawng na oengna te biibina dawngah na tuengsakna, namami kah lungna lawngah bii ruh m'bi sakna, mami Bawipa Jesuh Khrih ah aka cak ngaiuepna na khueh u te Pa Pathen haiah ka hilh u nawh.

⁴ Maya manau thli, Pathen lawng nangmi n'lungna tih amah kah thlaang la awm ham n'tuek u poen.

⁵ Metihtiah Awlthang Theen te nangmi tengla kavan khuen u vengah awl bueng nawh tih huham tharana oen Ciim Muithla khaw, awltak asoengna te asoepa kavan khuen haih poen. Nangmi tengah ka awm u vengkah kaimi kah khawsakna te na ming u poen; te tah nangmi lawng na theenna ham ni.

⁶ Nangmi lawng kaimi oen Bawipa kah moeiboe te na oett u, patangraina yahawh hlang na tawng u vengah khaw, Ciim Muithla tengkah aka law awlthang te awmngaih oen na do u.

⁷ Tedawngah nangmi tah Macidonia oen Akhaia khaw kah aka oeng thlaang boeih ham oett koeila na awm u poen.

⁸ Metihtiah nangmi teng kalawng aka cet Bawipa kawng awlthang te Macidonia oen Akhaia ram pum bueng ah nawh tih nangmi lawng Pathen na oengna kawng awlthang lawng te peng tawm ah cet khok poen. Tedawngah kaimi lawng thui ham ngoe tlaih nawh.

⁹ Nangmi tengah kamyin la ka law u vengkah kaimi metila nan do nan dan u kawng te khaw, kutsaimuei te na hoett u tih Pathen te metila na pan u tite khaw, aka soeng tih aka hing Pathen kah bii te bi ham oen ah,

¹⁰ Vaan kalawng aka law ham a Capa na lamtoen u te khaw ahimi boeih lawng a thui u. A Capa Jesuh tah duekna kalawng a thawh sak tih aka law ham koei Pathen thinsana kalawng mami loeihsakkung ni.