TIITO 3 - Wanaadi A'deddu

Quedeiyente weicho’como

¹ Quedeiyente chö’tamme’jocooto acu’shäna woije yeichöcoomo wetä, cajiichaanacoomo woijeiñe mmaja, ñaanontädööcomo woije yeichöcoomo wetä, tameedä aashichaato tödööemö tödö’se yeichöcoomo wetä mmaja.

² Cone’da a’deuwö’da eijai ñaato anejja jäcä; töjimmotoncomo äntu’de’tä’da eijai ñaato dea. Ta’cwaiñeene eijai ñaato tameedä soto jäcäiñe, tumjunne’da a’deuwö’da mmaja.

³ Cönwanno mmaja cujeeje cä’ja’quennea jenaadä, Wanaadi woije’da mmaja. Töwännanö’e cä’ja’quene, tameedä conemjönö tödö’se cöweichöcoomo aca töwaatashiichuudä cä’ja’quennea. Conemjönö aca töweiye cä’ja’quene, tö’neiñe mmaja. Anejjacoomo wwä töwä’quimmajo cä’ja’quene, cönwanno mmaja anejjacoomo tönquiiñeme’que cä’ja’quennea.

⁴ Yaawä Cäwaacanaaneichomo Wanaadi wwä aashicha töweichö ecaademe’ja’jäcä, töwwa soto jummadööcomo ecaademe’ja’jäcä mmaja,

⁵ töwö cäwaanacaatäne. Aashicha cönnö’jocoomo jäcäinchädä’da töwö cäwaanacaatäne, töwwä wentumje cäne’jocoomo weijäcääne. Töwö Wanaadi cäwaanacaatäne cöcoccadööcomo que, yää eduuwaatoje cöwennuduucomo cu’tädööje naadö. Epíiditu Santo ai cäwaanacaatäne, ñäädä eduuwaato cöweichöcoomo u’nei.

⁶ Cäwaanacaaneichomo Jesuuquidiito jäcäinchädä töwö Wanaadi Epíiditu Santo cuntui cöwwäiñe, ewontancädä’da.

⁷ Aashicha töweichö woije Wanaadi töjaadonooje cödöötäne, töwaatamemjönö cöweicho’como cöwwäiñe yeichö wetä, yää quiiyomo’catoodö.

⁸ Chäänöngato mädä; yääje yeijäcä jäduuje töneecammajä’e awei’she wa mädä jäcä, ñanno Wanaadi ecaanö’nnamo aashichaato tödönnamooje yeichöcoomo wetä. Yääje weiñä aashicha na, tujunne mmaja, tameedä soto wwäiñe.

⁹ Tödööto’jönö wätäccujä’nä jäcä mmaane eijai’cha ma amäädä, jenaado’jocoomo wätunnäichomo jäcä eijai’cha mmaja. Jenaado’jä waanontänä jäcä mmaja ätäccujä’jai’cha ma dea, yää Moisé nimennä’jödö. Mädääje weiñä dötä’da na, täje’da mmaja.

¹⁰ Ñäädä änwannoje dea ätu’de’täjonnamo yäätuujacä, aacäde jeiñe mma. Aneeta’da yeiya’jäcä u’cacä’de ajaadäiñe yeichö jonno,

¹¹ owaanäcä yeijäcä ñäädä tö’tajäätödö tösaadijange yeichö. Choone’nadiiyö que dea täne’ju’dhe na conemjönööje yeichö.

Tiito wwä tödööemö ecamma’jödö

¹² Adöiña Aadeteema anonta’jäcä öwwä, Tíiquico jeiñe mma, yaawä dea mmaane ääma’täcä’de Nicóopodi ña. Iiña tu’que yeichö wija’dä’ja’de.

¹³ Seena i’wa’täcä’de, ñäädä jenaado’jä waanontänä ecammajä’nei, Apoodo mmaja, yäämannäjöödöcomo jäcä, ane’cä’cä imjummadööcomo a’que’da’da eiye.

¹⁴ Quedeiyentecoomo näämu’ca’ña’to aashichaato tödöödö jäcä, a’ca’como i’wa’tädööcomo jäcä mmaja, tödööneije’da mma ei’ñoto.

Yä’ca’jödö

¹⁵ Tameedä jaadoncomo ta’dedducoomo nadääjaato äwwadäädä. Quedeiyentecoomo a’dejjacooto öwö yeetö joi, ñanno cöjimmotoncomo. Wanaadi nutuudu aashichaato äwwäiñe yei’she wa. Amén.