TIITO 2 - Wanaadi A'deddu

Aashicha weiñä jäcä woowanoomanä

¹ Amäädä awa’deuwödö mmaane eijai ña aashicha weiña jäcä dea. Edääje owaanomaacoto’de:

² Ñanno inchoncomo eijai ñaato towaadäädäiñe, nontätä mmaja, chäänönge töneecanö’e mmaja. Chäänönge eijai ñaato dea wä’jummanä jäcä, aashicha shinchädö jäcä mmaja.

³ Chäänönge mmaja ñanno no’sancomo, nontätä mmaja eijai ñaato dea, wätunnä dha’me’da mmaja, ä’dacu’da mmaja. Aashicha weiñä jäcä owaanomannamooje eijai ñaato,

⁴ wodiiñamo mudeeshi owaanomaiyeto yaawä töiñonootoncomo ijummadö jäcä, tönnacontoncomo ijummadö jäcä mmaja.

⁵ Towaadäädäiñe wodiiñamo mudeeshi eijai ñaato, masuuduije’da mmaja, tä’sacooneiñe mmaja, ta’cwaiñeiñe mmaja, töiñotoncomo a’deucwe mmaja, Wanaadi a’deddu cone’da täcammamje’da yeichö wetä.

⁶ Dhanwaacomo mudeeshi mmaja yäätuujacooto towaadäädäiñe yeichöcoomo wetä.

⁷ Amäädä mmaja aashicha eichä’de, aweichö eneiyeto, anönge mmaja yeichöcoomo wetä yaawä. Acu’shämje owaanomaacoto, wätäncu’tänä que’da,

⁸ aashicha awa’deuwancädääne, äjääcä cone’da anejja ya’deuwödö queiñe. Töjöiye naato’de yaawä ñanno Wanaadi a’deddu tu’de’tännamo, aneejodö’da töweijäcäiñe cone’da töwa’deuto’como äjääcäiñe.

⁹ Tädhaajäca’como yäätuujacooto tädhaajotoncomo woije yeichöcoomo wetä, tädhaajotoncomo a’cwaimaiyeto, äccujä’tä’da yeichöcoomo wetä mmaja.

¹⁰ Tämeene’daane nei’ña’to. Chäänönge tödööjai ñaato tameedä tötaadawaajuichomo, tameedä soto eneiyeto yaawä Cäwaanacaaneichomo Wanaadi a’deddu aashicha yeichö.

¹¹ Töwö Wanaadi cöjääcäiñe aashicha töweichö cöneenejoi tameedä soto wääwanaacato’como tödöödö que töwwä.

¹² Yää cöjääcäiñe aashicha Wanaadi weichö que cönwanno oowanoomajai caato conemjönö tödöödö e’nomjadö jäcä, conemjönö tödö’se weiñä e’nomjadö jäcä mmaja, chäänönge weiñä jäcä mmaja, towaadäädä weiñä jäcä mmaja, Wanaadi woije weiñä jäcä mmaja edä nono de’wä cöweichöcoomo.

¹³ Yääje yeijäcä ta’cwaiñe quiiyomo’cato töwö ñeecamma’jödö aashichaato weja’dätäädö, yää tawaanato töjääcä Cäwaanacaaneichomo Jesuuquidiito weejödö, Cöwaanadiiyöcoomo täneejucaato weejödö.

¹⁴ Töwö Jesuuquidiito töwäämaamöje cönä’tui cöjääcäinchädäiñe tameedä conemjönö jonno cäwaanacaadöcoomo wetä, cöcoccadööcomo wetä mmaja tösootoije cöweichöcoomo wetä, aashichaato tödöödö encano’tännamooje cöweichöcoomo wetä mmaja.

¹⁵ Mädääje owaanomaacoto; ijäädu’täcooto; jäduuje yäätuujacootode. Äwä’quimmajoojo’tojo mma maneejodööjoi’che.