TIITO 1 - Wanaadi A'deddu

Yaajäntä’jödö

¹ Öwö Paudo, Wanaadi anoonö, Jesuuquidiito nanontädö mmaja. Töwö yaanontäne Wanaadi neichö necamjödööcomo yoomanö’neije, Wanaadi woije weiñä jäcä owaanomaaneichomooje mmaja,

² töwaatamemjönö weichojo chäwwäiñe töweiye yeichö wetä yaawä. Edä nono woojodö’jödö owaajodä töwö Wanaadi cöneecammai yää töwaatamemjönö weichojo; ätäncu’täjöönö ñäädä Wanaadi.

³ Eduuwa chäänönge yä’döa’jäcä töwö ta’deddu cöwwäiñe cöneecadeeme’joi. Yää jäcä ecammajä’neije dea Cäwaanacaaneichomo Wanaadi yaanontäne.

⁴ Äwwadäädä wimenna, amäädä Tiito. Önnedö chäänöngato amäädä, cöneecamjödööcomo jäcäinchädä. Aashichaato äwwä yei’she wa Cumöötoncomo Wanaadi nutuudu, Cajiichaana Jesuuquidiito nutuudu mmaja, ñäädä Cäwaanacaaneichomo; wentumje mmaja adheene’se wa chäwwäiñe; täncanoode’da aweichojo äwwä yei’she wa dea.

Quedeeta ña Tiito wetaadawa’cajo’jödö

⁵ Öwö männänne Quedeeta antadö ña cötaadawaajui acoichaneije, jata waadäi ansiyaano ewaacaneichomooje mmaja, manaanontäneedöje dea.

⁶ Mäcö mmädä aneewaaca’daane eichä’de ansiyaanoje. Dhanwa conemjönö chääcadööjönööne ansiyaanoje eijai ña, tooniño ijiiñamoone. Iiñacoomo quedeiyenteje eijai ñaato, ewoodoicha’da, tumö, senö a’deucwe’da’da mmaja.

⁷ Conemjönö chääcadööjönö ansiyaano eijai ña, Wanaadi tadaawaajui tödööneije yeijäcä. O’jodhe chö’tajä’jai’cha na töwö, äätömaacoije eijai’cha mmaja. Ä’dacu’da eijai ña töwö, ataiju’jätö’da mmaja. Soto ennanö’cadö que jödaata chaana’cadö ijummajai’cha na töwö.

⁸ Tödöiña yä’döa’como ewanshinchäneichomooje töwö eijai ña. Aashichaato tödööneije eijai ña dea, towaadoodoto mmaja, chäänöngato mmaja, Wanaadi woijato mmaja, acu’shämjato mmaja.

⁹ Ansiyaano chäänönge ajäijai ña Wanaadi a’deddu chäänöngato, towaanoma’jödö nönge dea, ämu’de’da soto owaanomaadöcoomo wetä yaawä töwwä, chäänöngato woowanoomanä que, quedeiyenteje weiñä chimmajä’nnamo chaana’cadööcomo wetä mmaja.

¹⁰ Joojeene yeiya’como ñanno Wanaadi a’deddu ijo’mannamo. Cujeeje ñoowanoomadööcomo, soto tönencu’täiñe mmaja. Ñanno judhío mädääje weneeneto.

¹¹ Töjo’que’nojomje naato ñanno. Tönwanno jooje soto nishaadijannä’caato, yä’jimmä’tädööcomo jadä’jödöödä, täcammajä’emjönö que owaanomancädäiñe, jödaata chaana’cadö wetä töwäätäncu’tädööcomo que.

¹² Yäätono dea, Quedeeta antadö ñano dea, edääje cönä’döaacä töjaatawoncomo jäcäiñe: “Ñanno Quedeeta ñancomo töwä’dune weneeneto, tääde’cwadeiñe mmaja. Ämiije’jödö mma tönwanno, töquiiñeiñeene;” quee cönä’döaacä.

¹³ Chäänönge yääje yä’dö’jödö na; yääje yeijäcä tumjunne’da yäätuujacooto’de, chäänönge töneecamjödööcomo tödöiyeto.

¹⁴ Yäätuujacooto’de judhío wätunnäichomo jäcä ijaanata’da yeichöcoomo wetä, aneeta’da yeichöcoomo wetä mmaja ñanno chäänöngato wätunnä ijo’mannamo a’dedducoomo.

¹⁵ Ñäädä aashichaato tö’tajäätödö wwä tameedä aashicha na; aneecanö’jönö wwä mmaane aashichaato ’je’da na, tameedä nossaje töweijäcä, chö’tajäätödö jadä’jödöödä.

¹⁶ Tönwanno Wanaadi ecaanö’nnamooje yäätä’tädööcomo; iiñödööcomo que mmaane täne’ju’dhe naato yeeshi’jodööcomooje yeichö. Töweecone’ma naato, töwäätuujacoone’da mmaja; she’caasa aashichaato tödööjai’cha mmädä naato.