SANTIYAACO 5 - Wanaadi A'deddu

Tönsomaaca’como wätuujadööcomo

¹ Etaatäcä änwanno tönsomaaca’como. Aamotääcä; adheecadaujä’täcä äwwäiñe yeetunu eneetojo jäcä.

² Onsomaadöcoomo tödha’du’ta na; owoomöcoomo täu’cwe mmaja na dea cödhaucwä wwäiñe.

³ Ajöödataichomo, oodo ännödööcomo mmaja, töwe’cutaajä’e na. Yää ye’cutaajätö’jödö cone’da aweichöcoomo nene’ju’ja’de. Ajuunucoomo niyau’cwa’dede wa’to niyau’cwadö wa’cä. Änwanno onsomaadöcoomo mi’jummatääne anooto wataamedaawotooje.

⁴ Etaatäcä’ma anaudädööcomo awoncomo wetaadawa’cajo’jocoomo wwä täje’jocoomo encano’tädö, yää encu’tancädäiñe ennanö’ca’jocoomo äwwäiñe. Ñanno tadaawaaju dönnamo’jödö wa’deuwödööcomo töwääta na ñäädä amoode Edhaajotoncomo wwä.

⁵ Edä nono de’wä aweichöcoomo wwadaadäädä ämjummadööcomo a’que’da’da weneene; tameedä ämjummadööcomo woije tönnöe määnetääne. Jaaca töweejuiye naichöje töweejuiye määnetääne. Amiiñä’cadö cu’nädö amoinche’da nä’döi eduuwa.

⁶ Chäänönga’como conemjönööje töne’tä määnetääne, tömja’eiñe mmaja. Yääje yeichaame oojo’tä’da weneeneto äjääcäiñe.

Aashicha tönshinchä weiñä

⁷ Yääje yeijäcä jimmä, aashicha tönshinchä eichäcä, Cajiichaana weejödö jonaane. Tönaudäcaato töweiye naichö naane’; töwö töquinchancädä’da conoojo wiiñadö jäcäinchädä tu’que yeichö waajäntädö niyoomo’ca, yä’cadö mmaja, yaawä jeene tönaichödö wau’cwangajä shoomadö wetä.

⁸ Ñäädä töweiye naichöje mmaja eichäcääde änwanno; ejääduqueejö’da eichäcä, Cajiichaana we’tojo amoinche’da yeijäcä.

⁹ Jimmä, ajimmotoncomo änquimmajä’tä’daiñe eichäcä, conemjönööje mma mätä’täjooto’no. Ñäädä Wanaadi, Ämmencanei, amoinche’da nä’döi eduuwa, mönaatajo weiñä töweiye naichöje.

¹⁰ Jimmä, Wanaadi a’deddu ecammannamo’jödö wei’jocoomo chö’tamme’täcä, ñanno Cajiichaana eetö joi töwa’deuwe cönä’ja’todö, ñanno nöngeiñe mmajaane meichäiye.

¹¹ ¿Ta’cwaiñe jönca töwäntunamjödö shinchänei töne’tä cäänetääne? ¿Töneeta jönca maato Joowo aashicha tönshinchä yei’jödö? Yää ’jeje yei’jödö mmaja töneeta maato dea, yää Cajiichaana nödöödö chäwwä. Wentumje äneetä töweichö Cajiichaana cöneenejoi yaawä chäwwä, tumjunne töweichö mmaja.

¹² Jimmä, aashicha etaatäcä edä wä’wätuujanä. Jäduuje mma määcammatäi’che. Caju ñano joi määcammatäi’che, edä nono joi jeiñe mma, anejja joi jeiñe mma. Sa’donna mmaane ääcammatääcä, “Ee”, quee mmaane, “Ng’jn,” quee jeiñe mma, conemjönööje mma mätä’tojooto’no Wanaadi wwä.

¹³ Anejja adhantawäiñe yäntunaanö’a’jäcä Wanaadi wwä na’deuwö’ñojo ñäädä. Anejja ta’cwaiñe yeiya’jäcä Wanaadi wwä necanta’ño’ñojo.

¹⁴ Cädäijato adhantawäiñe yeiya’jäcä ansiyaano na’dejja’ña’to, ñanno quedeiyente edai’chäneichomo, Wanaadi wwä a’deuwöiyeto tönwanno, shimi che ijaawä ajoojancädä Cajiichaana eetö joi.

¹⁵ Ecamjödö que ya’deuwa’comjäcä cädäijato nääwanaaca’de; Cajiichaana nadonca’de. Choone’nadiiyö töweiye yeiya’jäcä nätäncwannä’ja’de.

¹⁶ Yääje yeijäcä ocoone’nadiiyöcoomo töneecamma eichäcä ajimmotoncomo wwä; Wanaadi wwä adha’deutäcä ääjäcäiñe, täjiichö’tääne meichäiye. Ñäädä soto chäänöngato Wanaadi wwä sa’donna ya’deuwödö jäduuje na.

¹⁷ Edía cönä’ja’dö naane’, cönönga’como dea mma töweichaame töwö conoojo iiña’da yeichojo cöne’catäi Wanaadi wwä. Iiña’da cöneiyacä yaawä aacäicheeato weduuto annai.

¹⁸ Yää ’jeje cöna’deuwöi chea yaawä; conoojo cöniiñai yaawä. Nono de’wono äwanshi cöna’tajäätöi yaawä.

¹⁹ Jimmä, anejja adhantawäiñe shaadijanga’jäcä, yeichacoono sha’duminchajai ña yaawä.

²⁰ Ñäädä tösaadijange yeichö jonno conemjönö tödöönei sha’duminchanei yäämatoojo jonno soto newaanaca; jooje conemjönö wätäncwanno’jotoojo nejoodöja ñäädä.