SANTIYAACO 4 - Wanaadi A'deddu

Edä nono de’wono ijummajai’cha cöweichöcoomo

¹ ¿Ane’cäämö ewoonö’jödööje töwä’tu’de’tä määnetääne, töwäätäuwe mmaja? Ajuunucoomo woije tötö’tajä’e aweijäcäiñe mädääje määnetääne, yää ätö’tajäätödööcomo jadä töwä’tu’de’tä weneenedö.

² Ane’cä’cä äwwäiñe ijummadaawä, eijai’cha aweiya’comjäcä, yää e’nei soto töneema määnetääne yaawä. Täneejuque awei’sheiñe määnetääne, eijai’cha aweichaameiñe; yää jo’tädööje wä’tu’de’tänä noojodööa yaawä, wätäunä mmaja. Ämjummadööcomo äwwäiñe ä’tu’da weneene Wanaadi wwä ane’catä’da aweijäcäiñe.

³ Aneedawä äwwäiñe e’ca’taame ä’tu’da dea weneene, chäänönge’da töne’ca’e aweijäcäiñe; ajuunucoomo nijummadö woije tödöödö wetä yää töne’ca’e määnetääne.

⁴ Masuuduija’como änwanno. ¿Odhoowänääcäiñe’da ca’ nai edä nono de’wono tumjumma weiñä Wanaadi tu’dedööje yeichö? Ñäädä edä nono de’wono ijummanei Wanaadi tu’dedööje na.

⁵ ¿Töwäädämma ca äwwäiñe nichö’taanä Wanaadi a’deddu imennaajä? Edääje nä’döa yää: “Ñäädä Epíiditu Santo, cödo’tacaiñe Wanaadi nijaata’täjo’jödö, jooje cujummaato, tö’neimmaane;” quee nä’döa Wanaadi a’deddu imennaajä.

⁶ Töwö Wanaadi aashicha töweichö woije cö’wa’tätäiñe weneene. Edääje dha’deddu imennaajä jäcä nä’döa: “Wanaadi nä’jädu’ta o’jodhaato tö’tajäätödö jäcä; o’jodhe chö’tajä’jönö mmaane töwö töni’wa’tä weneene, aashicha töweichö woije;” quee nä’döa.

⁷ Yääje yeijäcä Wanaadi wwä ä’tutääcä. Odo’sha mmaane ijo’matääcä, äänejeiye ojonnoiñe.

⁸ Wanaadi wwadäädä ä’täcä, äwwadäädäiñe eejöiyede töwö. Änwatöötäcä änwanno conemjönö dönnamo. Ätö’tajäätödööcomo sha’duminchatääcä, änwanno aaco’como tö’tajäätödö, Wanaadi jadä edä nono de’wono ijumma’sa’como.

⁹ Cone’da ä’döjootäcä; wentumje eichäcä, töwaamoone. A’seuwö’daane eichäcä; töwaamoone aamotääcä. Ta’cwaiñe’da eichäcääde, wentumje mmaane.

¹⁰ O’jodhe chö’tajäätö’da eichäcä Cajiichaana emjataawä, töwö o’jodhe ayöödötäiye yaawä.

Töweichacoono emmencadö

¹¹ Jimmä, ajimmotoncomo änquimmajäätö’daane eichäcä. Ñäädä töweichacoono chiimajä’nei, töweichacoono a’de’tänei mmaja, Wanaadi waanontädö nichiimajä’a; Wanaadi waanontädö nemmenca dea. Waanontä’jä emmenca’jäcä äwwä, waanontä’jä tödööneijönö yaawä amäädä, emmencanei mma.

¹² Tooni töweiye nai waanontä’jä ecammanei, ñäädä waanontä’jä u’nei’jödö dea, ñäädä soto ewaanacaajaicho, ennanö’cajaicho mmaja. ¿Änääcöömäje ätö’taanä amäädä, aweichacoono emmencadö wetä äwwä?

Jenamma weichojo jäcä wä’wa’deme’nä

¹³ Edääje dhantai töwä’döe määnetääne: “Eduuwa jeiñe mma, jenamma jeiñe mma, jataaca ñaa nöta’de. Iiña ñaa na’de tooni wedu, wätäätöijanääje, jödaata cana’cadööje;” quee töwä’döe määnetääne. Edääje wä’dö’se wa äwwäiñe, änwanno yääja’como wä’dödö.

¹⁴ Odhoowanääcäiñe’da dajaane na jenamma aweicho’como. ¿Ane’cäämö nönge cöweichöcoomo töweiye nai, quee ’ja? Wedeinchä nönge mma caato, a’dhe’cä mma yäänejoodö, yaawä dea mma yännamjödö.

¹⁵ Edääjeene ä’döjai maato: “Cajiichaana woije yeiya’jäcä nudä ñaa na’de. Mädä ñaa nödööa’de yaawä, yää jeiñe mma;” queene ä’döjai maato.

¹⁶ Yääje’daane määnetääne; jäduuje töwääcamma määnetääne, töwä’wa’deme’que mmaja. Chäänönge’da yää nöngato wä’wa’deme’nä.

¹⁷ Ñäädä aashichaato tödööemö towaanäcä yeichaame ännöjöönö, conemjönö nödööa ñäädä.