SANTIYAACO 3 - Wanaadi A'deddu

Soto nudu weichö

¹ Jimmä, jooje’da owaanomannamooje eichäcä. Jooje’cä jeene Wanaadi wwä cä’mencajaato’de cönwanno owaanomannamo.

² Tameedä cönwanno conemjönö tönnöe caato aneedawä. Ñäädä cone’da a’deujönö chäänöngato ñäädä. Ñäädä yääjato dhowaanäcä mmaja na dea tameedä töweichö e’se’tädö.

³ Sejaadadi cawaayu ntaca töneewaaca cäänetäänedö naane’, cöwoijeiñe yeichö wetä. Tameedä chääjö que’se’taato yaawä yää sejaadadi che.

⁴ Chäänönge mmaja jidaawa; adai’jä yeichaame, joojato jejeichä nadäädöje yeichaame mmaja, she’coto’cä que e’se’tädö nai, e’se’tänei woije mma.

⁵ Mädääje dea soto nudu töweiye nai; she’caasa yeichaame adai’joto tönnöe. Wa’to cadainchudu’cä naadö naane’; she’caasa yeichaame joojato wa’to emjannäjai ña.

⁶ Wa’to nönge soto nudu töweiye nai, tameedä conemjönö o’wadööje. Cöjääconcomo dea yeichaame cöcoone’matäiñe weneene. Yää cunuuducoomo que töwa’deuwe cäänetäänedö ätöömajootä weneene, töwemjangeene yeiyajä jiyooto comootödö ñano que.

⁷ Tameedä odoocoja’como äcöönöje töweiye naicho, tadiiñaamo mmaja, äcääyu mmaja, na’cwacancomo mmaja. Soto tääde’cwadeiñe’da töneemu’ca weneeneto ñanno.

⁸ Tunuudu mmaane tääde’cwade’da emu’cajai’cha na soto. Conemjönö töwö, ätäädennanö’jojai’cha na. Joojato jönaatamoi dha’me na.

⁹ Cunuuducoomo que Cumöötoncomo Wanaadi jäcä aashicha ca’deuwato; yää que dea soto töneuwe cäänetääne, ñanno Wanaadi weichö nönge amoode’na’como.

¹⁰ Yää möta ai chea a’nädäncädä neja’ca, aashicha wa’deunä, wätäunä mmaja. Yääje weicho’me’da na, jimmä.

¹¹ Tuna töweiye naichö naane’, yää wätunnacaichadö ai chea aacä chaadodö eja’ca’da töweiye nai, aneedawä caadö, aneedawä tutuune, que ei’cha.

¹² Jimmä, cujeedi ejeedödööje eijai’cha na waju’nä ejeedödö. Waju’nä ejeedödööje eijai’cha na dea anejja dee ejeedödö. Chäänönge mmaja tuna, yää wätunnacaichadö ai chea äänönge’da eja’ca’da töweiye nai, saayu ’je aneedawä, aashicha aneedawä, quee ei’cha.

Caju ñano sejje weichö

¹³ ¿Änääcö adhantawäiñe towaanojo’ne nai, töseedujä’ne mmaja? Yääje yeiya’jäcä ñäädä tösejjedö neneejo’ñojo aashicha töweichö que, o’jodhe chö’tajäätö’da töweiyancädä, töseedujä’nato neene töweiye naichöje.

¹⁴ Caado’da aweiya’comjäcä mmaane, tö’neiñe aweiya’comjäcä mmaja, amäädä mma awei’she aweiya’jäcä mmaja, tösejjeca’comooje ätä’täjai’cha maato yaawä, äncu’tännamoojeene, chäänönge ännöjöncomooje mmaja.

¹⁵ Caju ñanoojönööne yää yääjato sejje, edä nono de’wono mma, ajuunucoomo woijato mmaja, odo’sha dö’sennoto mmaja.

¹⁶ Yää tö’neiñe weiñä, töwö mma töwei’she weiñä mmaja, noowonö’jaca wewoodoichanääje, tameedä aneejejaiñene’jödöödä conemjönööje mmaja.

¹⁷ Dha’daane ñäädä caju ñano sejje ’jano. Masuuduije’da töwö, ätäuwö’da mmaja, aashicha soto tönnöe mmaja, soto jäcäiñe ta’cwaiñe mmaja, töweichacoono wa’deuwödö eta’se’da’da mmaja, wentumje äneetä mmaja, aashichaato tönnöe mmaja, ätäncu’tä’da mmaja. Yääjönö wa’cä äänejo’da mmaja na dea ñäädä caju ñano sejje ’jano.

¹⁸ Ñäädä töwäätäuwö’semjönö ätäuwö’da weiñä nejannä’ca, ñaatö’tädö töweiye naichöje. Yaawä chäänönge weiñä nääcatu’naca chäwwä.