SANTIYAACO 1 - Wanaadi A'deddu

Yaajäntä’jödö

¹ Öwö Santiyaaco, Wanaadi anoonö, Cajiichaana Jesuuquidiito anoonö mmaja, ya’deujödö wadääja äwwadäädäiñe, änwanno iisadaaediitacoomo, amoojadooto de’wä aacä adhaadai’choncomo naadö, tameedä nono weichö wa’cä äwäämecanta’como maatoodö.

Wanaadi nutuudu sejje

² Jimmä, jooje ta’cwaiñe eichäcä aneejejaiñe äwä’yunaacaja’comjäcä,

³ odhoowanääcäiñe yeijäcä aneecamjödööcomo oneejatoojoje yeichö, aashicha shinchädö jäcä owoowanoomadööcomo wetä.

⁴ Chäänönge oowanoomatääcä aashicha shinchädö jäcä, chäänönge maatö’nä’täiye yaawä, ane’cä’cä ojoona’daiñe eiye.

⁵ Anejja adhantawäiñe tösejjeque’da tötö’ta’jäcä, Wanaadi wwä nane’cato’ñojo, ä’tuiye chäwwä. Töwö Wanaadi tameedä soto wwäiñe tunu’e, ewontancädä’da, euwancädä’da mmaja.

⁶ Yaawääne’, ecamjödö que deaane ñäädä e’ca’jai ña, aneecamjö’da’daane. Ñäädä aneecanö’jönö dama madaatacai’chädö nönge na, jejeichä nemannäjöödöje mma.

⁷ Ñäädä yääjato Cajiichaana Jesuuquidiito wwä ane’cä’cä eijai’cha töweichö dhowaanäcä eijai ña.

⁸ Ñäädä aacono tö’tajäätödö masuuduije töweiye nai tameedä töweichö jäcä.

⁹ Ñäädä quedeiyente tönsomaaquemjönö ta’cwaiñe eijai ña Wanaadi wwä o’jodhe töwä’döjootojo weijäcä.

¹⁰ Ñäädä quedeiyente tönsomaacato mmaane ta’cwaiñe eijai ña dea dho’noncomooje töwä’döja’jäcä daja. Tönsomaaque weiñä töweiye nai woi ejeedödö nönge mma.

¹¹ Chuuta naadö naane’, shii ta’ne yeeja’ca’jäcä tuyu’ta yaawä; chääjedöödö nä’mea yaawä; iiñataaje yei’jödö nännanö’a dea. Mädääje mmaja ñäädä tönsomaacato nödöödö nataamea’de.

Tuyuunacaadö shinchädö

¹² Ta’cwaiñe eijai ña ñäädä tuyuunacaadö shinchänei. Chäänönge toneejadö shincha’jäcä chäwwä, chaana’nadiiyö nä’tua’de yaawä, yää töweichö eneetojo, tameedä tujummannamo wwä Wanaadi necamma’jödö.

¹³ Töwä’yunaacajoodawä anejja mma Wanaadi wwä tuyuunacaadöje ane’täi’che. Conemjönö que ä’yunaacajoojai’cha Wanaadi ña, soto äiñunaaca’da mmaja töwö.

¹⁴ Soto töwä’yunaacajo töweiye nai conemjönö tödö’se töweichö woije; yää nencu’tädö woije töwä’sadiijannä’cajo yaawä.

¹⁵ Conemjönö tödö’se weiñä namoodeta yaawä conemjönööje. Yaawä conemjönö waatö’nä’a’jäcä, wäämatoojoje noowonö’jaca.

¹⁶ Jimmä umjummadö, mätäncu’tojootäi’che.

¹⁷ Tameedä aashichaato u’ajä, tameedä chäänöngato u’ajä mmaja, caju ñanno ne’a, Wanaadi nutuudu woije, ñäädä tawaanato tödöönei’jödö. Chäänöngeedä töwö weneene, enwacaama’da.

¹⁸ Töwö tötö’tajäätödö woije cöweichöcoomo cuntui, chäänöngato wätunnä ecammajäätödö etaadö que cöwwäiñe, tönnacoomoje cöweichöcoomo wetä, awa’deenato chääjedöödö acä’ajä töweiye naichöje.

Chäänönge Wanaadi ecamjödö

¹⁹ Yääje yeijäcä, jimmä umjummadö, etaacoije eichäcä, a’deucoije’daane, äätömaacoije’da mmaja.

²⁰ Ñäädä töwäätömaajä’ato Wanaadi woijato ännö’da na.

²¹ Yääje yeijäcä e’nomjatääcä tameedä chäänöngemjönö, yää conemjönö äjääcäiñe töweejange weneenedö. O’jodhe ätö’tajä’ancädäiñe’da Wanaadi a’deddu woije eichäcä, yää ñaatö’tädö nönge ätö’tajäätödööcomo aca cönä’natö’täichö. Yää Wanaadi a’deddu jäduuje na adheewanaacadööcomo jäcä.

²² Tödööeene tödöötäcä yää Wanaadi a’deddu necammadö; täta mma maneetatäi’che. Äwwäiñe etaataame ännö’da aweiya’comjäcä, äwwäädäiñe dea mätäncu’taato yaawä.

²³ Ñäädä Wanaadi a’deddu töwwä etaataame ännöjöönö soto chö’tajä’jönö töweiye naichöje na.

²⁴ Ñäädä soto jecuude aca töjeedö ene’jödö weichaame chö’taque’coije na töwääne’jödö jäcä.

²⁵ Ñäädä töneeta’jödö jäcä chö’taque’jönö mmaane chäänönge tönnöe weneene Wanaadi waanontädö, yää jedeeso nönge cöweichöcoomo jonno cu’caneichomo’jödö; ñäädä yääjato ta’cwaiñe eijai ña, yää töneeta’jödö woije tönnöe töweijäcä.

²⁶ Ñäädä ecamjödö jäcä chäänöngato wa’cä tö’tadö tunuudu aneedennanö’jo’da töweichaame, töwwäädä nätäncu’ta; töwäädämma ñeecamjödö na.

²⁷ Edä yää Cumöötoncomo Wanaadi owaadäädä chäänönge töneecanö’e weiñä: Yeenö wääma’jödö i’wa’tädö, yuumö wääma’jödö mmaja, iiño wääma’jödö mmaja, tameedä yäntunamjödööcomo jäcä. Edä nono de’wono conemjönö jäcä chaadota’da weiñä mmaja yää dea chäänönge töneecanö’e weiñä.