MATEO 9 - Wanaadi A'deddu

Secumjato adonca’jödö

¹ Yääje mma yaawä Jesuuquidiito cönä’täi cudiiyada aca. Chu’jä mänsemjona cöne’dätäi yaawä; töjaatacäi cönä’döi.

² Yaawä secumjato cönnejooto chäwwadäädä, ä’wato jo. Chäwwäiñe täcamjödö eneea’jäcä Jesuuquidiito cönä’döaacä cädäijato wwä: —Cone’da’da eichä, dhanwa. Ocoone’nadiiyö täncwanno’jo na; quee cönä’döaacä.

³ Yää eta’jäcä anejjacoomo judhío owaanomannamo cöntö’tajä’a’to: “Määdhä cone’da Wanaadi jäcä na’deuwa mädääje töwa’deuwödö que;” quee cöntö’tajä’a’to.

⁴ Jesuuquidiito dhowaanäcä cönä’jaacä yääje chö’tajäätödööcomo. Töwö cönä’döaacä: —¿Ane’que’nei cone’da ätö’tajä’ato dea?

⁵ ¿Äshono ätääcammacoije’cä nai: “Ocoone’nadiiyö täncwanno’jo na;” quee’ja? ¿Edääjeene’: “Aanöncä, oojoimacä;” queene’ ?

⁶ Edä wödööa odhoowanääcäiñe yeichö wetä Soto nnedö soto cone’nadiiyö encwanno’jojai yeichö edä nono de’wä; quee cönä’döaacä Jesuuquidiito. Yaawä töwö cönä’döaacä secumjato wwä: —Aanöncä; adhe’wötö adääcä; ämmai chaca äjääne; quee cönä’döaacä.

⁷ Yaawä ñäädä dhanwa cönammöi; tömmai chaca cöntämä.

⁸ Yää eneea’jäcä soto cönääcatoncaicho. Aashicha cöna’deuwa’to yaawä Wanaadi jäcä, yää nöngato adoncatoojo utu’jödö weijäcä soto wwä.

Mateo a’dejja’jödö

⁹ Yääje mma yaawä Jesuuquidiito cöntämä yäätonno. Dhanwa cöneejodöi yaawä, Mateo täätö. Shuucu ñäädä cönä’jaacä acu’shänä jödaatai i’jummannamo weicho’como taca. Jesuuquidiito cönä’döaacä chäwwä: —Ma’che jaadä. Mateo cönammöi yaawä, chääjadä töötädööje mma.

¹⁰ Yaawä Jesuuquidiito maa taca cönääwashinchaacä tönoowanoomadö jadäiñe. Jooje acu’shänä jödaatai i’jummannamo mmaja cönoomomöicho dea yaawä, jooje conemjönö dönnamo mmaja. Cönääwashincha’to yaawä Jesuuquidiito jadä, ñoowanoomadö jadäiñe mmaja.

¹¹ Yää eneea’jäcä jaadiseeo wwäiñe tönwanno cönä’döa’to Jesuuquidiito nowaanomaadö wwäiñe: —¿Ane’que’nei mmaja odhoowanoomaneichomo nääwashinchannea acu’shänä jödaatai i’jummannamo jadäiñe mmädä, conemjönö dönnamo jadäiñe mmaja? quee cönä’döa’to.

¹² Yääje yä’dödööcomo eta’jäcä töwwä Jesuuquidiito cönä’döaacä chäwwäiñe, —Cädäijemjönö täjiichö’tänei ämjumma’da töweiye nai; cädäijato mmaane tumjumma.

¹³ Edä Wanaadi a’deddu imennaajä chö’tamme’täcä: “Wentumje äneetä weiñä tujunne na öwwä, saaquidiijiisiyo tödöödö tujunne’da mma;” quee naadö. Chäänönga’como a’dejja’da we’ne, conemjöncomoone, tötö’tajäätödööcomo sha’duminchaiyeto; quee cönä’döaacä Jesuuquidiito.

Wäänemaanä jäcä Jesuuquidiito ecamma’jo’jödö

¹⁴ Yääje mma yaawä Juan nowaanomaadö cöneejoto Jesuuquidiito döiña; cönä’döa’to: —¿Aaquene töwäänema ñaa weneene, jaadiseeo mmaja töwäänema weneeneto dea; amäädä onoowanoomadö mmaane äänema’da?

¹⁵ Jesuuquidiito cönä’döaacä chäwwäiñe: —¿Aaquene mmaja jötaanä enennamo aamodööto deeade’ töjöötaamö töjaadäiñe yeichaame? Aneedawä anooto na’de choojonnoiñe töjöötaamö wataadojootojo; yaawä näänemaato’de.

¹⁶ “Töwoomö jenaado’jä ana’tä’da weiña nai eduuwaato sedei’jödö que. Eduuwaato que a’ta’jäcä eduuwaato töwaacö’ca yaawä jenaado’jä shiichajoodöje. Töwaataucwa’cä jeene yaawä yeeshiicha’jödö.

¹⁷ Eduuwaato chääjedöödö eccudu döaajä anacca’da weiñä nai chääwötö jenaado’jä iji’jä döaajä aca. Mädääje tödööa’jäcä iji’jä neshiicha yaawä; chääjedöödö eccudu töweemacuudä yaawä, iji’jä mmaja. Eduuwaato iji’jä acaane chääjedöödö eccudu eduuwaato döaajä shoomadö. Mädääje a’nädä emaacudä’da eijai ña, chääjedöödö eccudu, iji’jä mmaja; quee cönä’döaacä Jesuuquidiito.

Jaido nnedö adonca’jödö, wodi wwä Jesuuquidiito womö ajoojo’jödö mmaja

¹⁸ Yääje chäwwäiñe Jesuuquidiito wa’deuwödaawä judhío täneejucaato cöneejä yöiña. Tä’mudhe cönä’döi ije’taca; cönä’döaacä: —Önnedö näämai eduuwa. Yääje yeichaame ma’che jaadä, adhaamädö mödöiye ye’wä, aadoncaiye.

¹⁹ Jesuuquidiito cönammöi yaawä; cöntämä chääjadä; ñoowanoomadö mmaja cöntonto dea.

²⁰ Yaawä wodi cädäijato cöneejä Jesuuquidiito ncadheedä. Töwö chäädäichö cönä’jaacä munu’je, amoojadooto de’wä aacä wedu chäädäicha’jödö. Töwö Jesuuquidiito womö a’sadö cönaajojoi.

²¹ Edääje cöntö’tajä’acä ñäädä wodi: “Yoomö ajoojodö que mma ja’ aadoncajai wanä;” quee cöntö’tajä’acä.

²² Yaawä Jesuuquidiito cönä’jedennacai. Wodi cöneedantäi yaawä; cönä’döaacä chäwwä: —Cone’da’da eichä, wodi. Äwwä ecamjödö weijäcä maadoncai; quee. Yaawä dea mma ñäädä wodi cönaadoncai.

²³ Yääje mma yaawä ñäädä täneejucaato mmai chaca Jesuuquidiito wä’döa’jäcä töwö cöneedantoicho ñanno ewaacadaawä jiichu etönnamo we’a’como, soto wewoodoichadööcomo mmaja.

²⁴ Töwö cönä’döaacä chäwwäiñe: —Adheeja’catääcä; ääma’da na mä’dä wodi’chä. Iiñöcöödö mma mädä; quee cönä’döaacä. Tonno’e mma ñanno soto cönennojöicho yaawä.

²⁵ Yaawä ñanno soto weja’ca’comjäcä äqueejö döiña Jesuuquidiito cönoomomöi. Dhamäädö jäcä cönaajäi. Ñäädä ajei’choto’jaato cönammöi yaawä.

²⁶ Yääje Jesuuquidiito nödö’jödö cöneecatai yaawä tameedä yää jata weichö wa’cä.

Aacä tänuuquemjöncomo wäänu’to’jocoomo

²⁷ Yäätonno Jesuuquidiito wöta’jäcä aacä tänuuquemjöncomo cönta’to inchäcä. Töcä’de cöna’deuwa’to; cönä’döa’to: —Wentumje ñaa eneecä, amäädä Dawí weichö; quee cönä’döa’to.

²⁸ Ä’saca Jesuuquidiito womonga’jäcä ñanno tänuuquemjöncomo cöneejoto chäwwadäädä. Jesuuquidiito cönä’döaacä yaawä chäwwäiñe: —¿Mecaanö’ato ca mädä tödööjai weichö? Tönwanno cönä’döa’to: —Ee, ñaa necaanö’a; quee.

²⁹ Yääje mma yaawä Jesuuquidiito cönaajojoi chäänuduucomo. —Äjääcäiñe nä’dö’ñojo mecaanö’atoodö nönge dea; quee cönä’döaacä.

³⁰ Tönwanno töneene cönä’döicho yaawä. Yaawä Jesuuquidiito cönwätuujaicho jooje; cönä’döaacä: —Anejjacoomo wwäiñe maneecammajä’täi’che; quee cönä’döaacä.

³¹ Yääje yeichaame yäätonno tööta’comjäcä tönwanno cöneecammajäätöicho tameedä yeichö wa’cä.

Ta’deudemjönö a’deudeme’jo’jödö

³² Tänuuquemjöncomo’jödö wöta’comjäcä anejja daja cönnejooto dea Jesuuquidiito wwadäädä, odo’sha ana’deudeme’jojöönö ’jano daja.

³³ Odo’sha ija’canö’ja’jäcä Jesuuquidiito wwä, ñäädä ta’deudemjönö cöna’deutai yaawä. Soto cönääcatoncaicho yaawä; cönä’döa’to: —Mädä nöngato aneene’da töweiye caato Iisadaaede ña; quee cönä’döa’to.

³⁴ Jaadiseeo mmaane cönä’döa’to: —Määdhä dhanwa odo’shancomo tömja’canö’jo weneene odo’sha edhaajotoncomo jäduudu que mmädä; quee cönä’döa’to Jesuuquidiito jäcä.

Soto wentumje ene’jödö Jesuuquidiito wwä

³⁵ Yääje mma yaawä Jesuuquidiito cönäämannä’acä tameedä jata weichö wa’cä, judhío we’jummato’como waadäi soto owaanomancädäiñe. Wanaadi töcaajichaanaije tödöödö jäcä töneecammajä’e cönä’jaacä. Tameedä cädäi toneejichö’tä cönä’ja’dea.

³⁶ Jesuuquidiito ñanno soto wentumje cöneene’ma’to, töwaatansu’dä yeijäcäiñe, jäduuje’da yeijäcäiñe mmaja, oweeja tädhaajäquemjöncomo eijai ñaatoodöje.

³⁷ Yääje mma yaawä töwö cönä’döaacä tönoowanoomadö wwäiñe: —Tadaawaaju jooje naadö’je, töweetadaawa’cajaamo mmaane wanna’da naato.

³⁸ Yääje yeijäcä adha’deutäcä tadaawaaju Edhaajä wwä, töwö tötaadawaajui dödö jäcä soto anaanontäiyeto; quee cönä’döaacä Jesuuquidiito.