MATEO 8 - Wanaadi A'deddu

Woi ’jano ejiichö’tä’jödö

¹ Jöö de’coiño’jödö Jesuuquidiito wä’ta’jäcä jooje soto cönä’ja’to chääjadä.

² Yaawä dhanwa cöneejä, woi ’jano. Tä’mudhe cönä’döi Jesuuquidiito je’taca; cönä’döaacä chäwwä: —Cajiichaana, yeejichö’tä’se aweiya’jäcä yeejichö’täjai ma; quee cönä’döaacä.

³ Yaawä Jesuuquidiito tamäädö que cönaajojoi; cönä’döaacä chäwwä: —Adheejichö’tä’se wa; nännamjö’ñojo mädä owoichö; quee cönä’döaacä. Yaawä dea mma yoichö cöne’jöi.

⁴ Yaawä Jesuuquidiito cönä’döaacä chäwwä: —Eneecä’ma, soto wwäiñe maneecammajäätöi’che mädä; Wanaadi wwono wa’deuwödö wwä mmaane äänejoota. Moisé necamma’jödö nönge Wanaadi wwä tu’emö änu’cä’de, soto dhowaanäcäiñe yeichö wetä yaawä töwääjichö’tä aweichö; quee cönä’döaacä Jesuuquidiito.

Suddau edhaajotoncomo anoonö adonca’jödö

⁵ Cajeedamu ña Jesuuquidiito wä’döa’jäcä suddau edhaajotoncomo chäwwadäädä cöneejä; domaanoje töwö cönä’jaacä.

⁶ Töwö cönä’döaacä Jesuuquidiito wwä: —Cajiichaana, yaanonö ä’saca na tä’wötö jo; secumje na; jooje näntunaanö’a.

⁷ Jesuuquidiito cönä’döaacä chäwwä: —Wadoncata’ñojo; quee.

⁸ Yaawä ñäädä suddau edhaajotoncomo cöneccujä’acä: —Cajiichaana, aashichaatojöönö öwö; ye’saca omomjai’cha ma. Töwa’deuwe mmaane adha’deucwä, yaanonö aadoncaiye.

⁹ Tädhaajäcaato mmaja öwö dea. Yaanonö mmaja töweiye naicho dea, suddau. “Äjääne;” ca’jäcä öwwä anejja wwä, töötä yaawä ñäädä. “Ä’cäde;” ca’jäcä, töwe’e yaawä, “Mädä tödööcä;” ca’jäcä öwwä yaanonö wwä, tönnöe yaawä töwö; quee cönä’döaacä ñäädä suddau edhaajotoncomo Jesuuquidiito wwä.

¹⁰ Jesuuquidiito wacö’je cönäätaacä yääje ya’deuwödö. Yaawä töjaadoncomo wwä cönä’döaacä: —Chäänönge yääje wä’döa äwwäiñe, mädääjato ecaanö’nei aneene’da wäänene, iisadaaediitacoomo jadä’jödöödä.

¹¹ Yääje wä’döa äwwäiñe, jooje soto ne’aato’de shii weja’catoojo dö’senno, shii womontojo dö’senno mmaja. Tönwanno Wanaadi jataacäi nääwashinchaato’de Aawadán jadä, Isaaca jadä mmaja, Jacoowo jadä mmaja.

¹² Ñanno Wanaadi sotoije eijai’chomo’jödö mmaane jödo’na nätäämajaato’de tööjano’taca. Iiña naamoaato’de; jooje cone’da naato’de; quee cönä’döaacä Jesuuquidiito töjaadoncomo wwäiñe.

¹³ Yaawä Jesuuquidiito cönä’döaacä suddau edhaajotoncomo wwä: —Äjääne adhe’saca; aneecamjödö nönge neja’dä’a’de; quee. Yäätä shii weichö dea mma ñäädä suddau edhaajotoncomo anoonö cönaadoncai.

Peedhodo wo’jödö adonca’jödö

¹⁴ Yaaje mma yaawä Peedhodo mmai chaca Jesuuquidiito womonga’jäcä, yo’jödö cöneedantäi tä’wötö jo, wedö’näje.

¹⁵ Yaawä Jesuuquidiito dhamäädö cönaajojoi. Eccö’da Peedhodo wo’jödö cönä’döi yaawä. Töwö cönammöi; chääwanshiñööcomo cöneejodöi yaawä.

Jooje soto adonca’jocoomo

¹⁶ Yaawä cho’momöödawä Jesuuquidiito döiña soto cönnejooto odo’sha ’ja’como. Töwö cömja’canö’joicho odo’shancomo tooniye töwa’deuwö’jödö que mma. Tameedä cädäija’como mmaja cönaadoncaicho dea.

¹⁷ Mädääje cöneeja’dätäi chäänönge Isaía nimennä’jödö yä’dödö wetä, ñäädä Wanaadi wa’deuwödö ecammanei: “Töwö dea cöcäädäichöcoomo cöneejichö’täi, jäduuje’da cöweichöcoomo mmaja;” quee immennä’jödö naadö.

Jesuuquidiito jadä töwei’sha’como’jödö

¹⁸ Tawoodhecääcä soto we’jumma’como eneea’jäcä Jesuuquidiito wwä, töwö cönä’döaacä: —Ma’chomo; cöötätäiye chu’jä mänsemjo; quee.

¹⁹ Yaawä dhanwa cöneejä chäwwadäädä; judhío owaanomaaneichomooje cönä’jaacä. Töwö cönä’döaacä Jesuuquidiito wwä: —Ajaadä wötäiye, Owaanomaanei. Äätäjäätödö waadäi täjä’jai wa ajaadä; quee cönä’döaacä.

²⁰ Jesuuquidiito cönä’döaacä chäwwä: —Que’cweedu täwö’que töweiye naicho, tadiiñaamo mmaja taiñanque töweiye naicho dea. Soto nnedö mmaane iiñö’tojo ’je’da na; quee cönä’döaacä Jesuuquidiito.

²¹ Yääje mma yaawä anejja Jesuuquidiito nowaanomaadö cöna’deuwöi; cönä’döaacä chäwwä: —Cajiichaana, jaaja weneeta’ñojo awa’de, yääma’jäcä wewaacaiye’de; quee cönä’döaacä.

²² Jesuuquidiito cönä’döaacä: —Ma’che jaadä. Yä’ja’a’como dea mmaane newaaca’ña’to töwä’ja’a’como; quee cönä’döaacä.

Jesuuquidiito wwä jejeichä edennanö’jo’jödö

²³ Jesuuquidiito wä’ta’jäcä cudiiyada aca ñoowanoomadö mmaja cönä’toicho inchäcä. Cönääma’toicho yaawä.

²⁴ Yääje mma yaawä jejeichä cönaajäntäi, joojato. Cudiiyada cönaadö’taacä madaataca que. Jesuuquidiito mmaane wönö’näje cönä’jaacä.

²⁵ Ñoowanoomadö conemjacaicho yaawä; cönä’döa’to: —Cajiichaana, ñaa ewaanacaacä; cönnadöödöcoomo dajaane mädä.

²⁶ Jesuuquidiito cönä’döaacä: —¿Ane’que’nei tösaade maato dea? ¿She’caasa mma ca aneecamjödööcomo nai? quee. Yääje mma yaawä töwö cönammöi. Jejeichä cöneedennanö’joi, tuna mmaja. Tameedä uncwe’da cönä’jaacä yaawä.

²⁷ Ñanno chääjadoncomo cönääcatoncaicho yaawä; cönä’döa’to: —¿Änääcöömääne määdhä? Jejeichä jadä’jödöödä dha’deddu töneeta, tuna mmaja; quee cönä’döa’to.

Odo’sha ’ja’como Cadhaada ñancomo adonca’jocoomo

²⁸ Yaawa chu’jä mänsemjona cönä’döicho, Cadhaada ña. Yaawä aacä dhanwaacomo odo’sha ’ja’como cöneeja’caicho Jesuuquidiito wwadäädä, äwa döiñanno. Ñanno dhanwaacomo tönoiñe cönä’ja’to, yää ai weja’do’to’me’da tödööjoone.

²⁹ Tönwanno töcä’de cöna’deuwa’to Jesuuquidiito wwä; cönä’döa’to: —¿Ane’cotoojo ñaa maquiimaanä, amäädä Jesuuquidiito, Wanaadi nnedö? ¿Ñaa mamincha ca meejä chu’nädö aca ä’dö’dadä mmädä? quee cönä’döa’to.

³⁰ Yäätä amoinche’da jooje cuushi cönääwashincha’to.

³¹ Yaawä ñanno odo’shancomo cönä’döa’to Jesuuquidiito wwä: —Ñaa ja’canö’ja’jäcä äwwä, cuushi acaiñe ñaa amonno’jocä; quee cönä’döa’to.

³² —Ojoncomoone ’quene; quee cönä’döaacä Jesuuquidiito chäwwäiñe. Odo’shancomo cöneeja’caicho yaawä ñanno dhanwaacomo acannoiñe; cuushi acaiñe cönoomomöicho. Ñaano cuushi cöneeca’tömöicho yaawä yaataca’jödö wwadäädä. Chu’jä aca cönä’meicho yaawä, na’cwaca töwä’jajoodöcoomoje mma.

³³ Cuushi edai’chännamo’jödö cönäänejeicho yaawä tösaadöcoomoje. Jataaca cöntonto. Tameedä yää cöneecammajäätöicho, odo’sha ’ja’como jäcäiñe yeeja’dätä’jödö mmaja.

³⁴ Yääje mma yaawä tameedä yää jataawoncomo cöntonto Jesuuquidiito ene. Tönwanno Jesuuquidiito cönenno’ja’to yaawä töjaatawonnoiñe.