MATEO 7 - Wanaadi A'deddu

Töweichacoono emmencadö

¹ “Ajimmotoncomo mma manemmencatäi’che, Wanaadi wwä mma mätämmencajooto’node änwanno.

² Änwanno mätämmencajaato’de anemmenca’jocoomo nönge mmaja. Änwanno mätääcamma’jajaato’de anejjacoomo anemmenca’jocoomo nönge dea.

³ ¿Ane’cotoojo aweichacoono wämmamö’jödö’cä mencano’taanä? ¿Amäädä äwämmamö’jödö adai’jä’cä yeichaame anencano’tä’da manä?

⁴ ¿Aaquene yääje mä’dödö deaade’ aweichacoono wwä: “Äwämmamö’jödö’cä wu’ca’ñojo;” quee, adai’jä yeichaame amäädä äwämmamö’jödö?

⁵ Yääjönö wa’coto wäänejoodö amäädä. Äwämmamö’jödö adai’joto u’cacä awa’de, aashichaane meneiye yaawä aweichacoono wämmamö’jödö’cä u’cadö wetä.

⁶ “Sö’na wwäiñe manu’täi’che aashichaato, adheecato’no yaawä. Cuushi wwäiñe amaayuduichomo manu’täi’chede, aneeta’jätö’noto yaawä.

Ane’ca’täcä; anuujichääcä; a’dejjatääcä

⁷ “Ane’ca’täcä, äwwäiñe Wanaadi äntuiye; anuujichääcä, maneedantätäiye; a’dejjatääcä, mönaatata äwwäiñe ata’ducaiye.

⁸ Ñäädä e’ca’nei wwä töwä’tue töweiye nai, ujiiñei wwä töwäädantojo, a’dejjanei wwä mönaatata töwaata’duca.

⁹ “ ¿Änääcö adhantawäiñe täju u’jai ñai tönnedö wwä, tudu e’catäädawä?

¹⁰ Na’cwacaano jeiñe mma e’ca’a’jäcä chäwwä, ¿änääcö äcääyu äntuduude’ ?

¹¹ Änwanno cone’da aweichaameiñe odhoowanääcäiñe aashichaato utuudu ännacontoncomo wwä. Töwaacö’je Oomotoncomo caju ñano aashichaato u’jai ña töwwä e’ca’nei wwä.

¹² “Äjääcäiñe soto yei’sheiñe maatoodöje mmaja chääjäcäiñe eichäcääde. Mädääje dea nä’döa waanontänä imennajä, yää Moisé nimennä’jödö, Wanaadi wa’deuwödö ecammannamo nimenno’jocoomo mmaja.

Mönaatata she’coto’cä

¹³ “Odhoomontäcä she’coto’cä mönaatata ai. Adai’jä mönaatata na, tucuude mmaja ääma, wännanö’tojo tacaano. Jooje yää ainchomo wötäädö naato.

¹⁴ Caju ñano wötootojo nata’tadö mmaane she’caasa na, änwacö’me mmaja chäämadö. Wanna’da naato yää ejoodönnamo.

Chääjedöödö jäcä dee ene’jutuudu

¹⁵ “Äädai’chätääcä ecammajä’nnamo chäänöngemjöncomo jäcäiñe, ñanno Wanaadi woija’como wätä’tädö. Tönwanno ne’aato’de adhencu’täiñe, oweeja nönge’jödö mma, tääde’cwademjöncomo wa’cä, madooje töweichaameiñe.

¹⁶ Iiñödööcomo jäcä ene’ju’jai maato. Tameemö ejeedödööje eijai’cha na wesooca ejeedödö; waju’nä ejeedödööje eijai’cha na dea adhaawidi ejeedödö.

¹⁷ Tameedä dee aashichaato, aashicha chääjedöödö; dee conemjönö mmaane cone’da chääjedöödö.

¹⁸ Aashichaato dee, cone’da chääjedöödö ei’cha töweiye nai. Conemjönö dee ’quene aashicha chääjedöödö ei’cha daja.

¹⁹ Tameedä dee conemjönö chääjedöödö tödaaca töweiye nai, wa’to nwaca yau’cwadö wetä yaawä.

²⁰ Yääje yeijäcä iiñödööcomo jäcä ene’ju’jai maato ñanno ecammajä’nnamo chäänöngemjöncomo.

Tameedä’da nomongaato’de

²¹ “Tameedä’da nomongaato’de caju ña: “Cajiichaana, Cajiichaana;” que’como wä’dödö. Ñannoone, Jaaja caju ñano woije tödönnamoone nomongaato’de.

²² Yää anooto awä jooje soto nä’döaato’de öwwä: “Cajiichaana, Cajiichaana, adha’deddu töneecammajä’e töweiye ñaa cönä’jaacä, adheetö joi odo’shancomo tömja’canö’jo ñaa cönä’ja’dea; adheetö joi chea jooje täneemö tönnöe ñaa cönä’ja’dea;” quee nä’döaato’de öwwä.

²³ Yaawä öwö wä’döa’de chäwwäiñe: “Yoowanääcä’da maato. Ojoncomo jonno, änwanno conemjönö dönnamo;” quee wä’döa’de.

Aacä maa amännamo wei’jocoomo

²⁴ “Yääje yeijäcä ñäädä ya’deddu töneeta’jödö tödöönei dhanwa tösejjecaato wei’jödö nönge na. Ñäädä dhanwa tömmai cönaamäi tooja de’wä. Täije cönnöi.

²⁵ Conoojo cöniiñai yaawä; jejeichä chääjäcä cönä’döi jooje. Yääje yeichaame ata’dojo’da cöneiyacä, tooja de’wä yo’wadö weijäcä.

²⁶ Ñäädä ya’deddu töneeta’jödö ännöjöönö mmaane dhanwa aneene’ju’jönö wei’jödö nönge na. Ñäädä dhanwa tömmai cönaamäi sa’dada de’wä mmädä.

²⁷ Conoojo cöniiñai yaawä; cuncumai yaawä; jejeichä chääjäcä cönä’döi jooje. Yää maa cönaata’dojoi yaawä, täta jooje; quee cönä’döaacä Jesuuquidiito tönoowanoomadö wwäiñe, soto wwäiñe mmaja.

²⁸ Yääje Jesuuquidiito wa’deuwa’jäcä ñanno soto cöneeta’jöjäätöicho,

²⁹ jäduuje owaanomaadö weijäcä chäwwä, judhío owaanomannamo nowaanomaadö nönge’da.