MATEO 28 - Wanaadi A'deddu

Töwäämajo jonno Jesuuquidiito waadonca’jödö

¹ Wäädeetatoojo anooto ’jeje, semaana waajäntädö anooto wawaanadaawä, Madía Maacadeena, yeichacoono Madía mmaja cöneejoto yaawä äwa ene.

² Yääje mma yaawä nono cönäätu’mei jooje. Cajiichaana amoodedö caju ñanno cönä’täi. Täju cöneesecai; ye’wä cönaatajiimai yaawä.

³ Ñäädä amoode jedö cönä’jaacä tawaane, yäncuduudu wa’cä. Tajääde’de yoomö cönä’jaacä, wadeecuje.

⁴ Ñäädä nontädööje suddau cöntätä’nönga’to. Yäämaajä nönge cönä’döicho yaawä.

⁵ Yaawä amoode cöna’deuwöi ñanno wodiiñamo wwäiñe; cönä’döaacä: —Määcatoncatäi. Yoowanääcä na Jesuuquidiito ujiiyö äwwäiñe, ñäädä cuduusa jäcä yaatajoijojo’jödö.

⁶ A’que na sadä; töwaadonca na, äwwäiñe cönääcammaichöje dea. Eneetantäcä’ma chääquejöödö iiñödööcomo wei’jödö.

⁷ Tamjä’ne ojoncomo; ñoowanoomadö wwäiñe ecammajä’tantäcä töwäämaajo jonno yaadonca’jödö. Töwö nöta Caadideea ña odhoowajoiñe; iiña meneeato’de. Mädääje mma wä’dö’se wä’jaanä äwwäiñe; quee cönä’döaacä ñäädä amoode wodiiñamo wwäiñe.

⁸ Yääje mma yaawä ñanno wodiiñamo cöneeja’caicho äwa tacanno. Tösaade cönä’ja’to, ta’cwaiñe mmaja. Cöneeca’tömöicho Jesuuquidiito nowaanomaadö wwäiñe ecammajä’e.

⁹ Iichädaawäiñe Jesuuquidiito cönäänejoi chäwwäiñe; töwö cöna’dejjaicho: —¿Äsha mötaato? quee cönä’döaacä. Tä’mudhe cönä’döicho yaawä ije’taca; i’judu jäcä cönaajoicho; cönwa’deme’ca’to.

¹⁰ Yaawä Jesuuquidiito cönä’döaacä: —Tösaade’da eichäcä. Jimmä wwäiñe ecammajä’tantäcä, Caadideea ña täiyeto; iiña yeeneaato’de; quee cönä’döaacä.

Suddau wätäncu’to’jocoomo

¹¹ Yaawä ñanno wodiiñamo wöta’comjäcä, suddau cöntonto jataaca. Tameedä töneene’jocoomo cöneecammajäätöicho Wanaadi wwä töwa’deuwaamo edhaajotoncomo wwä.

¹² Ñanno cöne’jummaicho yaawä inchoncomo jadä; jooje jödaata cuntuicho suddaucoomo wwäiñe;

¹³ cönä’döa’to: —Edääje soto wwäiñe ecammajä’täcä’de: “Ñoowanoomadö cöneejoto coijai; chääquejöödö cöneememmecöicho, ñaa wönö’taame;” quee caichäcä’de.

¹⁴ Acu’shänä owaanäcä yä’döa’jäcä ñaa nemuunä’a’de mma’ne, äjääcäiñe cone’da yeichö queiñe; quee cönä’döa’to ñanno inchoncomo suddau wwäiñe.

¹⁵ Ñanno suddau yää jödaata cönnöicho, töwäätuuja’jocoomo nönge dea töneecammajä’e cönä’ja’to yaawä. Yää wätunnä töneecammajä’e dea weneeneto judhíocoomo, eduuwa anooto naadö jona tödööene.

Tönoowanoomadö anonto’jocoomo Jesuuquidiito wwä

¹⁶ Yääje mma yaawä ñanno amoojadooto de’wä tooni’chomo Jesuuquidiito nowaanomaadö Caadideea ña cöntonto, jöö de’cäi, Jesuuquidiito necamma’jödö döiña.

¹⁷ Jesuuquidiito eneea’jäcä töwwäiñe tönwanno cönwa’deme’ca’to. Yääje yeichaame dhantai aneecamjö’daiche dea cönä’ja’to.

¹⁸ Yaawä Jesuuquidiito yöiñaiñe jeene cöneejä; cöna’deuwöi chäwwäiñe; cönä’döaacä: —Tameedä tödöötojo öwwä tu’e na, caju ña mmaja, edä nono de’wä mmaja.

¹⁹ Yääje yeijäcä ojoncomo. Soto owaanomaatantäcä tameedä jata weichö wa’cä. Wautisaaje tödöötäcä’de Jaaja eetö joi, Iiñedö eetö joi mmaja, Epíiditu Santo eetö joi mmaja.

²⁰ Owaanomaatäcä’de tameedä äwwäiñe manaanontätäänedö tödöödö jäcä. Öwö ajaadäiñe wa’de yeichöödäje, anooto wataamedö jonaane; quee cönä’döaacä Jesuuquidiito. Amén.