MATEO 27 - Wanaadi A'deddu

Pidaato je’taca Jesuuquidiito wei’jödö

¹ Yaawä tööjanaacadä tameedä Wanaadi wwä töwa’deuwaamo edhaajotoncomo tujummä cöna’deuwöicho inchoncomo jadä, ñanno judhío edhaajotoncomo. Jesuuquidiito emaadö cöna’de’toicho.

² Tönwanno tömööe Jesuuquidiito cönaadoicho yaawä; acu’shänä Pidaato wwä cuntuicho.

Juudha wääma’jödö

³ Emaajodö wetä Jesuuquidiito adäädö eneea’jäcä Juudha wwä, ñäädä u’nei’jödö wwä, töwö cone’da cönä’döjoi yaawä. Yää tooni sotooto de’wä amoojadä jödaata cöniiñacai yaawä Wanaadi wwä töwa’deuwaamo edhaajotoncomo wwä, inchoncomo wwäiñe mmaja.

⁴ Töwö Juudha cönä’döaacä chäwwäiñe: —Conemjönö wödööne. Dhanwa aashichaato wu’ne; quee cönä’döaacä. Tönwanno cönä’döa’to: —Amäädä ’cä, owoijato dajaane mädä; quee.

⁵ Yaawä Juudha jödaata cömjajoi Wanaadi weichojo tawä. Cöntämä yaawä töwä’jöncö’cadööje mma.

⁶ Wanaadi wwä töwa’deuwaamo edhaajotoncomo yää jödaata cönancuicho yaawä; cönä’döa’to: —Amoi mädä jödaata; Wanaadi weichojo choonecaatojooje tödööjai’cha caato, soto eje’jödööje yeijäcä; quee cönä’döa’to.

⁷ Töwa’deuwödööcomo’jo nono cöneejemaicho yää jödaata que; Ädiiñä Tödönei’jödö ñano täätö yää nono cönä’jaacä. Yää tönwanno cönnöicho aneiñajancomo we’a’como ewaadöcoomo weichojooje.

⁸ Yääje yeijäcä eduuwa naadö jona tödööene yää nono eetö na Munu ñanooje.

⁹ Mädääje chäänönge cönä’döi Jeedemía nimennä’jödö, ñäädä Wanaadi wa’deuwödö ecammanei. Edääje Jeedemía cömmennäi: “Yää tooni sotooto de’wä amoojadä jödaata cöneicho; yää cönä’jaacä soto täje yeichö iisadaaediitacoomo necamma’jocoomo.

¹⁰ Yää que cöneejemaicho nono, Ädiiñä Tödöönei’jödö ñano täätö, Cajiichaana öwwä cöneecammaichöje dea;” quee Jeedemía cömmennäi.

Jesuuquidiito ecamma’jo’jödö Pidaato wwä

¹¹ Yaawä Jesuuquidiito cönä’jaacä acu’shänä je’taca. Ñäädä cöneecamma’joi: —Judhío cajiichaanaichomo amäädä? quee cönä’döaacä. —Ee, ñäädä öwö, mecammaadö; quee cönä’döaacä Jesuuquidiito.

¹² Yaawä Wanaadi wwä töwa’deuwaamo edhaajotoncomo wwäiñe tämentädaawä, inchoncomo wwäiñe mmaja, töwö Jesuuquidiito aneccujäätö’daiñe cöneiyacä.

¹³ Yaawä Pidaato cönä’döaacä chäwwä: —¿Aneeta’da ca manä äjääcä jooje cone’da na’deuwaatoodö?

¹⁴ Jesuuquidiito aneccujäätö’da dea cöneiyacä. Yääje yeijäcä ñäädä acu’shänä cone’da cönä’döjoi. “ ¿Aaqueneeto mädä;” quee cöntö’tajä’acä.

Tämaamöje Jesuuquidiito ecamma’jödö

¹⁵ Yää comjedensiyai’chädö tödöödawä acu’shänä weichö cönä’jaacä tooni jedeeso tunu’ca, ñäädä soto nijummadööcomo.

¹⁶ Yaawä jedeesoje iiñödööcomo cönä’jaacä dhanwa tacaadato, Wadaawa täätö.

¹⁷ Yaawä soto we’jumma’comjäcä Pidaato cöneecamma’joicho: —¿Äshono u’cajo’se maato öwwä, Wadaawa ’ja, Jesuuquidiitoone’, ñäädä Äwaanacaaneije tä’täämööne’ ? quee cönä’döaacä Pidaato soto wwäiñe.

¹⁸ Töwö yääje cönä’döaacä towaanäcä yeijäcä tö’neniiyöcoomoje Jesuuquidiito utu’jödööje yeichö.

¹⁹ Yaawä äcamma’jonei a’täi ye’wä Pidaato weichö ijiiñamo tanoonö cönaanontäi yöiña, edääje ecamma: “Conemjönö männöi’che ñäädä dhanwa aashichaato jäcä. Wäänetöödö ai weneeanä, cone’da wä’jaanä jooje;” quee ecamma.

²⁰ Yaawä Wanaadi wwä töwa’deuwaamo, inchoncomo mmaja, soto cöni’jedoicho Wadaawa u’cajoodö wetä Pidaato wwä, Jesuuquidiito emaajodö wetä mmaja.

²¹ Yaawä acu’shänä cönä’döa’dea chäwwäiñe: —¿Äshono u’cajo’se maato öwwä canno aacä naatoodö? Tönwanno cönä’döa’to: —Wadaawaane u’cacä.

²² Pidaato cöneecamma’joicho: —Yääje yeiya’jäcä, ¿aaquene Jesuuquidiito wödööanä, ñäädä Äwaanacaaneije tä’täämö? quee cönä’döaacä. Tönwanno cönä’döa’to: —Cuduusa jäcä ajoijojoocä; quee.

²³ Yaawä Pidaato cönä’döaacä chäwwäiñe: —¿Ane’cotoojo? ¿Äshono yää conemjönö iiñö’jödö? Tönwanno jooje’cä mma cöncä’tömjä’a’to yaawä: —Cuduusa jäcä ajoijojoocä; quee.

²⁴ Pidaato dhowaanäcä cönä’jaacä yaawä soto e’jodheinchäjai’chaiñe töweichö. Jooje’cä mma soto wewoodoichadööcomo cöneeneaacä. Yääje yeijäcä töwö tuna cöne’catäi. Ñeenedööcomooje cönänwatöi; cönä’döaacä: —Öwö woijemjönö mädä määdhä aashichaato emaadö; änwanno owoija’comoone; quee cönä’döaacä.

²⁵ Yaawä tameedä ñanno soto cöneccujä’a’to; cönä’döa’to: —Cone’da määdhä emaadö yeiya’jäcä ñaa näntunaanö’a’de mma’ne, ñaa nnacoomo mmaja; quee.

²⁶ Yaawä Pidaato cunu’cajoi Wadaawa. Jesuuquidiito mmaane cönaiju’jojäätöi. Cuntui yaawä suddau wwäiñe cuduusa jäcä ajoijodö wetä.

²⁷ Yääje mma yaawä acu’shänä anoonö suddau Jesuuquidiito cönaadoicho acu’shänä ewöötö taca. Yöiña cöni’jummaicho tameedä töjimmotoncomo.

²⁸ Tönwanno cönwoncaicho yaawä. Seweichato que daja cönwontoicho yaawä.

²⁹ Wesooca aca’ajä ijeemöichöje cönnöicho. Dee cönnöicho yaawä chänwawä, ämu’demjönö dö’se. Ije’taca tä’mudhe cönä’döjä’a’to enno’jätöödöje. Etaana’tädööje cönä’döa’to: —Amäädä ñäädä judhíocoomo Cajiichaanaichomo; quee cönä’döa’to.

³⁰ Tönwanno cöneeta’däjä’a’to dea. Yää dee chänwawoono’jödö que mmaja cömjana’mojä’a’to.

³¹ Yaawä enno’jätö’jeje seweichato que cönwoncaicho; yoomö neene que cönwontoicho yaawä. Cönaadoicho yaawä cuduusa jäcä ajoijodö wetä.

Cuduusa jäcä Jesuuquidiito ajoijo’jödö

³² Ääma taawä töötädääwäiñe cöneedantoicho dhanwa Sideene ñano, Simónje chäätö. Jesuuquidiito cuduusai cönaadojoicho chäwwä.

³³ Coodocoota ña cönä’döicho yaawä. Ye’caichö’jödö ñano, quee töwä’dö’se yeichö yää Coodocoota, quee naadö.

³⁴ Yäätä chääjedöödö eccudu Jesuuquidiito wocöödöje cunu’a’to, tutuunato äji jadä oimaajä. Yää oneeja’jäcä Jesuuquidiito wwä aneenö’da cöneiyacä.

³⁵ Cuduusa jäcä Jesuuquidiito ajoijo’jeje ñanno suddau yoomö’jödö töwaadäiñe cöneemecantoicho, wä’cana’canä tödöödö’jo. Mädääje chäänönge cönä’döi Wanaadi wa’deuwödö ecammanei nimennä’jödö: “Woomö’jödö töwaadäiñe cönnöicho; wä’cana’canä cönnöicho chääjäcä;” quee imennaajä wä’dödö.

³⁶ Yaawä ñanno suddau cönaatajiimaicho yäätä, edai’chädööje.

³⁷ Jesuuquidiito ju’jä ejoodhe imennaajä ajoijaajä cönä’jaacä, edä jo’tädööje määdhä näämai, quee ene’ju’tojooje. “Määdhä ñäädä Jesuuquidiito, judhíocoomo Cajiichaanaichomo;” quee imennaajä cönä’jaacä.

³⁸ Aacä tämeena’como cuduusa jäcä cönaajoijoicho dea iiñäcä, ääjato.

³⁹ Yäätoncomo weja’dätäädö Jesuuquidiito cönincha’me’ca’to, etaana’tädööje.

⁴⁰ Edääje cönä’döa’to: —Amäädä Wanaadi weichojo emajjojaicho wätä’tädö’jödö, aaduwaawä anooto amääjaicho tö’ta’jödö mmaja; amäädä dea ääwanaacacä. Wanaadi nnedööje aweiya’jäcä ädhä’täcä cuduusa jäconno; quee cönä’döa’to.

⁴¹ Mädääje mmaja Wanaadi wwä töwa’deuwaamo edhaajotoncomo cönenno’jä’a’to dea, judhío owaanomannamo mmaja, jaadiseeocoomo mmaja, inchoncomo mmaja. Tönwanno cönä’döa’to.

⁴² —Anejjacoomo töneewanaacaiñe cönä’jaacä; töwö dea ääwanaacajai’cha na eduuwa. Iisadaaediitacoomo Cajiichaanaichomooje yeiya’jäcä, cuduusa jäconno nä’to’ñojo eduuwa, ñaa ecamjöiye yaawä.

⁴³ Wanaadi ecaanö’nei töwö. Wanaadi wwä ijumma’jäcä, töwö newaanaca’ñojo, Wanaadi nnedööje yäätä’täätö’da; quee cönä’döa’to.

⁴⁴ Yääje mmaja ñanno tämeena’como cöneetana’ta’to dea, ñanno iiñäcä ajoija’como.

Jesuuquidiito wääma’jödö

⁴⁵ Yaawä anunnaque yeichö tameedä nono weichö wa’cä cöntööjamöi, i’ya’wä tödööene.

⁴⁶ I’ya’wä yeichö Jesuuquidiito töcä’de cöncä’tömöi: —Edí, Edí, ¿dama sawaacataani? quee cönä’döaacä. Jaaja Wanaadi, ¿ane’que’nei co’nomjai? quee töwä’dö’se yeichö.

⁴⁷ Yää eta’jäcä anejjacoomo yäätoncomo wwä, tönwanno conä’döa’to: —Edía na’dejja, ñäädä Wanaadi wa’deuwödö ecammanei’jödö; quee cönä’döa’to.

⁴⁸ Yääje mma yaawä anejja cöneeca’tömöi yaawä camiisha’cä wetä. Casamjato aca cönennöichai yaawä; dee jo’wä cöneenejoi Jesuuquidiito wwadäädä, shuumajoodö wetä chäwwä.

⁴⁹ Yaawä anejjacoomo cönä’döa’to: —Äcuude mma, queenetäiye ewaanaca Edía weejödö, eejö’da yeichö jeiñe mma; quee.

⁵⁰ Jesuuquidiito töcä’de cöncä’tömöi chea yaawä; cönaatacoichai yaawä.

⁵¹ Yääje mma yaawä Wanaadi weichojo aca’jaajä a’dutu cöneeshiichai annai, yujuudacanno yo’waca tödööene. Nono cönäätu’mei yaawä; täjuucomo cöneesaucwajäätöi.

⁵² Äwa cöna’ta’ducaajätöi chea. Jooje Wanaadi sotoi’jödö wä’jajo’jocoomo conaadoncaicho yaawä.

⁵³ Ñanno cöneeja’caicho täwaadöcoomo acanno Jesuuquidiito töwäämaajo jonno yaadonca’jäcä. Tönwanno cöntonto yaawä jata aashichaato aca, yää Jeduusadén ñano; jooje soto wwäiñe cönäänejoicho.

⁵⁴ Nono wätu’medö eneea’jäcä, tameedä yääje yeeja’dätäädö eneea’jäcä suddau edhaajotoncomo wwä, Jesuuquidiito edai’chännamo wwäiñe mmaja, tönwanno jooje cönääcatoncaicho; cönä’döa’to: —Wanaadi nnedö dämma määdhä nä’jaanä; quee cönä’döa’to.

⁵⁵ Yäätä cönä’ja’to jooje wodiiñamo, amoinchenno ene’madööje, ñanno Caadideea ñanno Jesuuquidiito jadä ye’a’como’jödö, töwö i’wa’tännamo’jödö.

⁵⁶ Chääjadäiñe cönä’jaacä Madía Maacadeena, yää ’jeje Madía mmaja, ñäädä Jacoowo, José dheenöötoncomo; Seewedheeo nnacoomo dhenöötoncomo mmaja cönä’ja’dea.

Jesuuquidiito ewaaca’jödö

⁵⁷ Yaawä cho’momöödawä cöneejä dhanwa tönsomaacato, Aadimaatea ñano, José täätö. Jesuuquidiito ecaanö’nei cönä’jaacä töwö.

⁵⁸ Töwö cöntämä Pidaato döiña Jesuuquidiito equeejödö e’ca’e. Yaawä Pidaato cönaadojoi chäwwä.

⁵⁹ Chääquejöödö eiya’jäcä ñäädä José wwä, töwö cönaiñantäi yaawä saawana tajääde’dato que.

⁶⁰ Töwö täwaadöje töweiyemööjato’jödö tödööenö aca cöneewaacai yaawä, täju töncajoodö aca. Äwa nata’tajo täju adai’joto i’wodiiñacaajodö’jo cöntämä yaawä.

⁶¹ Yäätä cönä’ja’to yaawä Madía Maacadeena, ñäädä yeichacoono Madía mmaja. Shuucu cönä’ja’to äwa je’taca.

Jesuuquidiito ewaadö edai’chä’jödö

⁶² Yää jenamma naadöje, wäädeetatoojo anooto owaajo choonecaajä’tojo anootoi’chädö jenamma naadöje, Wanaadi wwä töwa’deuwaamo edhaajotoncomo, jaadiseeo mmaja, tujuumä cöne’jummaicho Pidaato döiña;

⁶³ cönä’döa’to chäwwä: —Cajiichaana, tötö’ta ñaa na ñäädä töwä’dunaato wä’dö’jödö nudä töweichö: “Aaduwaawä anoototo ai waadonca’de;” quee yä’dö’jödö.

⁶⁴ Yääje yeijäcä äwa edai’chädö jäcä anontocooto osootoi aaduwaawä anooto, Jesuuquidiito nowaanomaadö mma chääquejöödä ememme’que coijai eejö’noto, edääje soto wwäiñe ecammajäätödö wetä: “Töwäämaajo jonno Jesuuquidiito cönaadoncai;” quee töwä’dödööcomo wetä yaawä. Ätäncu’tojoojai ñaato yaawä soto, awa’deene töwei’jocoomo e’jodhe’cä jeene; quee cönä’döa’to jaadiseeo Pidaato wwä.

⁶⁵ Yaawä Pidaato cönä’döaacä chäwwäiñe: —Suddau wanontaato, canno naatoodö; aashicha edai’chäjootäcä’de chäwwäiñe; quee Pidaato cönä’döaacä.

⁶⁶ Yääje mma yaawä ñanno jaadiseeo cöntonto. Äwa cömmadaaca’ñoicho yaata’duca’jödö ene’ju’tojooje. Yäätä suddaucoomo cönnämäicho, edai’chädööje.