MATEO 21 - Wanaadi A'deddu

Jeduusadén ña Jesuuquidiito wä’dö’jödö

¹ Yaawä Wetaajé ña töwä’döa’comjäcä, Jeduusadén ñano jäcä amoinche’da cönä’ja’to, Odiiwo ’jödö je’taca. Yaawä Jesuuquidiito cönaanontoicho aacä tönoowanoomadö.

² Töwö cönä’döaacä chäwwäiñe: —Ojoncomo jataaca, mädä cöje’tacaiñe nääneaadö aca. Iiña cawaayu i’wadö’taajä medantaato’de tönnedö’cä acä. I’wadööcatääcä’de, sadäädä mene’täiye.

³ Anejja wwä adheecamma’ja’comjäcä, yääje caichäcä’de: “Ñaa edhaajä nijummaato; eduuwa mma nene’jaato dea;” quee caichäcä’de; quee cönä’döaacä Jesuuquidiito ñanno aaco’como wwäiñe.

⁴ Yää cönä’jaacä Wanaadi wa’deuwödö ecammanei nimennä’jödö nönge yeichö wetä, yää edääje yä’dödö naichö:

⁵ Edääje caichäcä’de Siyon ñancomo wwäiñe: “Eneetäcä’ma acaajichaanaichomo ne’aadö, cawaayu nnedö’cä de’wä, mösooma adäänei nnedö’cä de’wä. Dho’noncomo tö’tajäätödö töwö; quee imennaajä wä’dödö na.

⁶ Ñoowanoomadö cöntonto yaawä. Jesuuquidiito wwä tanonto’jocoomo nönge cönnöicho.

⁷ Cawaayu cönnejooto yaawä, iiñedö’cä mmaja. Töwoomöcoomo cönnöicho ye’wäiñe. Yaawä Jesuuquidiito cönäncui ye’wä.

⁸ Ñanno jooja’como soto töwoomöcoomo cönaajujiiñajäätöicho ääma tai, yäätajaatojooje. Anejjacoomo chuu adö cönaacä’jätöicho; yää mmaja aama tai cönnöicho dea.

⁹ Awa’de’como wötäädö, möcääcä’ja’como mmaja, cöncä’tömjä’a’to; cönä’döa’to: —Aashichaato määdhä cajiichaana Dawí weichö. Aashichaato määdhä Cädhaajotoncomo eetö joiño we’ajä. Aashichaato ñäädä Wanaadi; quee cönä’döa’to.

¹⁰ Jeduusadén ña Jesuuquidiito wä’döa’jäcä tameedä iiñancomo cönaatansu’doicho; edääje cönä’döa’to: —¿Änääcö mä’dä? quee cönä’döa’to.

¹¹ Anejjacoomo soto cönä’döa’to yaawä: —Jesuuquidiito määdhä, Naasade ñano, yää Caadideea ñano jata. Wanaadi wa’deuwödö ecammanei töwö; quee cönä’döa’to.

Wanaadi weichojo tacanno töwäätätöijaamo ija’canö’jo’jödö

¹² Yääje mma yaawä Jesuuquidiito cönoomomöi Wanaadi weichojo taca, chaacancomo ija’canö’jodööje mma, ñanno töwäätätöijaamo. Jödaata chamjiyaacannamo meesaichomo cönaawotönnäcaajäätöi, jaduuma ejeemajonnamo a’täichomo mmaja.

¹³ Töwö cönä’döaacä chäwwäiñe: —Wanaadi a’deddu imennaajä jäcä yääje nä’döa: “Ömmai nätä’täja’de Wanaadi wwä wa’deutojooje;” quee nä’döa imennaajä. Änwanno ’quene mödööato tämeena’como weicho’comooje; quee cönä’döaacä Jesuuquidiito.

¹⁴ Yäätä Wanaadi weichojo taca tänuuquemjöncomo cöneejoto Jesuuquidiito wwadäädä, secumja’como mmaja. Töwö cönaadoncaicho yaawä.

¹⁵ Ñanno Wanaadi wwä töwa’deuwaamo edhaajotoncomo, judhío owaanomannamo mmaja, cöneenea’to yääje tödöödö chäwwä. Mudeeshi’chä cä’tömjätöödöcoomo cöneeta’to dea Wanaadi weichojo taca: “Aashichaato määdhä Dawí weichö;” quee yä’dödödööcomo. Yääje yeijäcä tönwanno cönäätömaicho;

¹⁶ cönä’döa’to Jesuuquidiito wwä: —¿Näätaanä jönca äwwä canno wa’deuwödööcomo? quee cönä’döa’to. Jesuuquidiito cönä’döaacä: —Ee, wetaanä. ¿Mädä jäcä imennaajä wä’dödö ana’de’tä’da ca meiya’quene? Edääje nä’döa yää imennaajä: Amäädä aashicha yeecanta’ñoto’como mu’ne mudeeshi’chä wwäiñe, shemeiña’como’cä wwäiñe; quee imennaajä wä’dödö na; quee cönä’döaacä Jesuuquidiito judhío owaanomannamo wwäiñe.

¹⁷ Töwö cönnämäicho yaawä; cöntämä yaawä Wetaaniya ña. Iiña cönnöcöi.

Waju’nä täjössemjönö euwö’jödö Jesuuquidiito wwä

¹⁸ Yää jenamma naadöje, jataaca töwennacaadawä, Jesuuquidiito ämiije cönä’jaacä.

¹⁹ Ääma dö’tä waju’nä ñaatö’taajä cöneedantäi. Cöntämä yaawä chäwwadäädä. Täjösse’da cöneedantäi yaawä, dhadö’jödö mma jooje. Töwö cönä’döaacä waju’nä wwä: —Ejössata’da ma’de yeichöje; quee cönä’döaacä. Yääje ya’deuwö’jödö ncäcäädä mma yää waju’nä cuiñu’tai yaawä.

²⁰ Yää eneea’jäcä töwwäiñe Jesuuquidiito nowaanomaadö cönääcatoncaicho; cönä’döa’to. —¿Aaquene mädä wa’cä jadheedä niyu’tai chea mädä waju’nä? quee cönä’döa’to.

²¹ Jesuuquidiito cöneccujä’a’to; cönä’döaacä chäwwäiñe: —Chäänönge yääje wä’döa äwwäiñe, chäänönge ecaanö’a’jäcä äwwäiñe, mädä waju’nä wödöichöje mmaja tödööjai maato änwanno, mädä e’jodhaato’cä jaiñoone mmaja. “Dama ’cwaca ääsecaacä;” quee äwä’döa’comjäcä mädä jöö wwä, töwö nääseca’de yaawä.

²² Tameedä ecaanö’ancädä Wanaadi wwä ane’catäädöcoomo äwwäiñe nä’tua’de; quee cönä’döaacä Jesuuquidiito tösootoi wwäiñe.

¿Änääcö woije mädä tönnöe määnene?

²³ Jesuuquidiito cönoomomöi yaawä Wanaadi weichojo taca. Chäwwä soto owaanomaadawäiñe Wanaadi wwä töwa’deuwaamo edhaajotoncomo cöneejoto yöiña, judhío edhaajotoncomo mmaja, ñanno inchoncomo. Tönwanno cönä’döa’to: —¿Änääcö woije mädä tönnöe määnene? ¿Änääcö cuntui mädä tödöötojo äwwä? quee cönä’döa’to.

²⁴ Jesuuquidiito cöneccujä’a’to; cönä’döaacä chäwwäiñe: —Öwö maneecamma’joto’ñojo awa’de. Äwwäiñe yeccujä’a’jäcä öwö wecamma’de yaawä mädä dödö jäcä yaanontänei’jödö.

²⁵ ¿Änääcö woije Juan wautisaaje soto tönnöeiñe cönä’jaacä? ¿Wanaadi woije ’ja, soto woijeene? quee cönä’döaacä Jesuuquidiito. Yaawä ñanno judhío tönwannoje dea cönäätäccujä’a’to; cönä’döa’to. —Wanaadi woijato cönä’jaacä; ca’jäcä cöwwäiñe, töwö yääje ä’döjai ña yaawä: “ ¿Ane’que’nei dha’deddu aneecamjö’da meiya’quene, yääje yeiya’jäcä?” quee.

²⁶ Dha’da ’quene, soto woijato mma cönä’jaacä; ca’jäcä cöwwäiñe soto quiiñontaato, tameedä soto Wanaadi wa’deuwödö ecammaneije Juan ecaanö’ajä; quee cönä’döa’to ñanno judhío edhaajotoncomo.

²⁷ Yaawä tönwanno cönä’döa’to Jesuuquidiito wwä: —Ñaa owaanäcä’da na. Jesuuquidiito cönä’döaacä chäwwäiñe: —Öwö mmaja aneecamma’da wa dea edä tödöödö jäcä yaanontänei’jödö; quee cönä’döaacä.

Aacä ääjömannamo wei’jocoomo dö’seeno

²⁸ Yaawä Jesuuquidiito cönä’döaacä: —¿Aaquene nichö’taanä äwwäiñe edä wecammaadö? Dhanwa cönä’jaacä, aacä iiñacoomo. Töwö cönä’döaacä yui wwä: “Audaajä aca eneeta, dhanwa;” quee cönä’döaacä.

²⁹ Ñäädä cöneccujä’acä; cönä’döaacä: “Ng’jn, öötä’se’da wa.” Yää ’jeje yaawä tötö’tajäätödö cönsa’duminchai; cöntämä yaawä audaajä aca etaadawa’cajo.

³⁰ Dhacoono daja yuumö cönaanontäi chea yaawä. Ñäädä cöneccujä’acä yaawä; cönä’döaacä: “Ee, weneeta mma’ne;” quee; tä’da töweichaame.

³¹ ¿Äshono tumö waanontä’jödö cönnöi ñanno aacä cönä’ja’todö? quee cönä’döaacä Jesuuquidiito. Ñanno judhío edhaajotoncomo cönä’döa’to yaawä: —Ñäädä awa’deeto. Yaawä Jesuuquidiito cönä’döaacä chäwwäiñe: —Chäänönge yääje wä’döa äwwäiñe, ñanno acu’shänä jödaatai i’jummannamo mmaja, masuuduija’como mmaja, Wanaadi sotoije nä’döaato odhoowajoiñe.

³² Ñäädä Juan Wautiita töneecammajä’e cönä’jaacä äwwäiñe aashicha weiñä jäcä. Änwanno aneecamjö’da meiya’quene. Ñanno mmaane cöneecamjöicho, acu’shänä jödaatai i’jummannamo, masuuduija’como mmaja. Yää eneetaame äwwäiñe äto’tajäätödööcomo änsa’dumincha’da meiya’quene yää ’jeje ecamjödö wetä.

Conemjöncomo töweetadaawa’cajaamö’jödö dö’seeno

³³ “Etaatäcä anejja yö’seeno ai chaja wa’deuwödö eduuwa. Dhanwa cönä’jaacä tönaudäcaato. Töwö chääjedöödö cönnatö’täi. Tönaudädö cuncudaadai’chäi yaawä. Chääjedöödö eccucaatojo cönnöi chea. Edai’chänei weichojo cönaamäi chea. “Yaawä anejjacoomo wwäiñe edai’chojoodö’jo anejja nono de’cäi cöntämä.

³⁴ Yaawä yeejössetaatojo cu’nädö aca yä’döa’jäcä töwö tanoonö cönaanontoicho tönaudä’jödö edai’chännamo wwadäädäiñe, tönaatödö ejeedödö wetä.

³⁵ Ñanno edai’chännamo dhanoonö cönaajoicho; tooni cönaiju’jätöicho yaawä. Tooni ’chene cömjajoicho; tooni täju que cönwäjäätöicho.

³⁶ Yää ’jeje audaajä edhaajä anejjacoomo tanoonö daja cönaanontoicho dea yaawä, wanna’cä jeene. Ñanno yääje mmaja cönä’döjoicho dea audaajä edai’chännamo wwäiñe.

³⁷ “Yaawä yä’cadööje tönnedö cönaanontäi. “ ¿Önnedö jaiñoone ca ñontäjai ñaicho?” quee cöntö’tajä’acä.

³⁸ Ñäädä iiñedö eneea’jäcä audaajä edai’chännamo wwäiñe, tönwannoje dea cönä’döa’to: “Määdhä ñäädä tumö ca’semjödö töwwä tödöönei. Queematäiye ja, cönaudädööcomooje eiye yaawä edä;” quee cönä’döa’to.

³⁹ Tönwanno cönaajoicho yaawä. Audaajä tö’cäi cönaadoicho yaawä emaadöje mma.

⁴⁰ “ ¿Aaquene ñanno edai’chännamo tödööjai ñaicho ñäädä audaajä edhaajä, yöiñaiñe töwä’döa’jäcä? quee cönä’döaacä Jesuuquidiito judhío edhaajotoncomo wwäiñe.

⁴¹ Tönwanno cönä’döa’to chäwwä: —Töja’e ’cännä töja’jai ñaato ñanno conemjöncomo, wentumje aneene’daiñe. Anejjacoomo wwäiñe audaajä edai’chojoojai yaawä, ñanno chu’nädö waadäi tönaatödö ejeedödö u’jai’chomoone; quee cönä’döa’to ñanno judhío edhaajotoncomo Jesuuquidiito wwä.

⁴² Yaawä Jesuuquidiito cönä’döaacä chäwwäiñe: —¿Ana’de’tä’da ca meiya’quene Wanaadi a’deddu imennaajä? Edääje nä’döa: Yää täju, maa amännamo cönquiiñemeecöichodö, anno’tojooje na eduuwa. Cädhaajotoncomo mädääje cönnöi; aashicha cöwwäiñe chö’tadö na; quee imennaajä wä’dödö na.

⁴³ Yääje yeijäcä edääje äwwäiñe wä’döa: Wanaadi ayu’caato’de tösootoije aweichöcoomo jonno. Anejjacoomo tösootoije nödööaato’de, töwoije tödönnamoone.

⁴⁴ Ñäädä yää täju jonaano wejuccadö näätunui’cha’de. Ñäädä mmaane ye’coiño yää täju wejuccadö mmaane nataaji’ja’de; quee cönä’döaacä Jesuuquidiito.

⁴⁵ Yö’seeno ai Jesuuquidiito wa’deuwödö eta’jäcä Wanaadi wwä töwa’deuwaamo wwäiñe, jaadiseeo wwäiñe mmaja, dhowaanäcäiñe cönä’jaacä töjääcäiñe ya’deuwödö.

⁴⁶ Tönwanno ajäi’she cönä’ja’to. Yaawääne’ soto cönnonta’to, töneecanö’e yeichomjäcä Wanaadi wa’deuwödö ecammaneije Jesuuquidiito weichö.