MATEO 20 - Wanaadi A'deddu

Tadaawaaju tödönnamo dö’seeno

¹ “Wanaadi cajiichaanaje yeichö na edä nono de’wono tönaudäcaato töweiye naichöje. Yaawaanadaawä ñäädä cöntämä tönaudä’jödö awä töweetadaawa’cajaamo wetä.

² Töweetadaawa’cajaamo wwäiñe töwö cöneecammai ejeemato’como töwwä chääwaadäiñe tooni jödaata tooni anooto wetadaawa’cajo’jä. Tönaudä’jödö aca cönaanontoicho yaawä, etaadawa’cajo.

³ Cawä shii wä’döa’jäcä töwö cöntännea yaawä jata antaca. Yäätä soto cöneedantoicho, tötaadawaajuichemjöncomo.

⁴ Töwö cönä’döaacä chäwwäiñe: “Änwanno mmaja ojoncomoode naudä’jödö aca. Chäänönge maneejemaato’de yaawä;” quee cönä’döaacä. Tönwanno cöntonto yaawä etaadawa’cajo.

⁵ Anunnaque yeichö ñäädä tönaudäqueemö soto wetäiñe cöneiya’dea, yää ’jeje i’ya’wä yeichö mmaja.

⁶ Cho’momöödawä cöntännea jata antaca mmaja; anejjacoomo cöneedantoicho tötaadawaajuichemjöncomo. Töwö cönä’döaacä chäwwäiñe: “ ¿Ane’que’nei ano ñadäädä eetä maato etaadawa’cajo’da?”

⁷ Ñanno cönä’döa’to yaawä: “Ñaa anontänei ’je yeichöjöönö;” quee. Yääje mma yaawä ñäädä dhanwa cönä’döaacä: “Änwanno mmaja ojoncomoode naudä’jödö aca. Chäänönge maneejemaato’de yaawä;” quee cönä’döaacä.

⁸ Chööjanga’jäcä yaawä audaajä edhaajä cönä’döaacä tötaadawaajui döjoonei wwä: “Tadaawaaju dönnamo a’dejjacooto, mejeemaiyeto chaadawaajuichomo’jödö. Möcääcä’ja’como wääwaaca’jocoomo ejeemacooto awa’de, yää ’jeje awa’de’como waajänto’jocoomo;” quee cönä’döaacä.

⁹ Yaawä ñanno cho’momöödawo’como waajänto’jocoomo wä’döa’comjäcä töwaadäiñe cönääjemaajojäätöicho tooni jödaata.

¹⁰ Ñanno awa’de’como waajänto’jocoomo jooje’cä täjeemaatäiñe cöneecanö’a’to. Yaawä chäädhajootoncomo cunu’jätöi chääwaadäiñe tooni nshai jödaata mmaja.

¹¹ Yää cönaajoicho tönwanno yaawä, töwaacö’comje’da. Audaajä edhaajä jäcä cönenta’me’ca’to;

¹² cönä’döa’to: “ ¿Aaquene canno eduuwaiche mma nääwaacaichodö ejeema’jocoomo ’cäwa’cä mmaja ñaa mejeemai chea, ano ñadäädä ñaa wetaadawa’cajo’jödö weichaame ta’nato awä?” quee cönä’döa’to.

¹³ Yääwä ñäädä audaajä edhaajä cönä’döaacä ijimmotoncomo wwä: “Weichacoono, adhennanö’cadööcomoojönö mädä öwwä. ¿Tooni jödaata que täjeemaamöje jönca määwaacai?

¹⁴ Ajöödatai tödööcä; äjääne. Adheejema’jödö nönge mmaja wejeemaato dea canno möcääcä’ja’como wääwaaca’jocoomo.

¹⁵ ¿Umjummadö woije u’jai’cha ja ca’ wanä jöödatai? ¿Awaacö’je’da nai aashicha weichö?” quee cönä’döaacä ñäädä audaajä edhaajä.

¹⁶ Mädääje na. Ñanno wentumja’como’jödö täneejuque naato’de. Ñanno täneejuca’como’jödö mmaane ema’jödööje naato’de. Jooje a’dejja’como naatoodö’je; e’ta’como jaiñoone äächädä mma; quee cönä’döaacä. Jesuuquidiito.

Töwäämatoojo jäcä Jesuuquidiito necammajäätö’jödö mmaja

¹⁷ Yaawä Jeduusadén ña töötädaawäiñe Jesuuquidiito töudäje cönaadoicho tönoowanoomadö, ñanno amoojadooto de’wä aaco’como. Töwö cönä’döaacä chäwwäiñe:

¹⁸ —Jeduusadén ña cöötaato eduuwa. Iiña Soto nnedö nä’tuja’de Wanaadi wwä töwa’deuwaamo edhaajotoncomo wwäiñe, judhío owaanomannamo wwäiñe mmaja. Tönwanno emaadö na’de’taato’de.

¹⁹ Judhíojöncomo wwäiñe nu’aato’de yaawä enno’jätöödö wetä chäwwäiñe, aiju’jätöödö wetä mmaja, cuduusa jäcä ajoijodö wetä mmaja. Yaawä aaduwaawä anoototo ai töwö naadonca’de; quee cönä’döaacä Jesuuquidiito.

Jacoowo, Juan dhenöötoncomo ne’catä’jödö

²⁰ Yääje mma yaawä Seewedheeo nnacoomo dhenö cöneejä Jesuuquidiito wwadäädä tönnacoomo jadä, ñanno Jacoowo, Juan. Tä’mudhe cönä’döi ije’taca, chäwwä e’catäädö wetä.

²¹ Jesuuquidiito cönä’döaacä chäwwä: —¿Ane’cäämö mijummaanä? Ñäädä wodi cönä’döaacä yaawä: —Cajiichaanaje äwä’döa’jäcä canno önnacoomo aacä naatoodö ännäcä nataajima’ña’to’de, ääjato; quee cönä’döaacä.

²² Jesuuquidiito cöneccujä’acä; cönä’döaacä: —Odhoowanoojöncomo me’ca’ato. ¿Öwö neenödööje töweiyemööje naadö emjai maato dea änwanno, yää wäntunaanö’tojo? ¿Öwö wautisaaje wä’döjootojo que mmaja ca wautisaaje ä’döjoojai maato dea? Tönwanno cönä’döa’to: —Ee, ä’döjai mmaja.

²³ Yaawä Jesuuquidiito cönä’döaacä chäwwäiñe: —Yääje dämma na. Öwö neenödö mmaja mengato’de; öwö wautisaaje wä’döjootojo que mmaja wautisaaje mä’döjaato’dede. Yääje yeichaame önnäcä awaatajiimato’como ecammajai’cha wa äwwäiñe. Ñanno wwäiñe mmaane yää nä’tua’de, chääjäcäinchädäiñe Jaaja nishoomadö naadö wwäiñe; quee cönä’döaacä Jesuuquidiito chäwwäiñe.

²⁴ Yää eta’jäcä ñanno amoojado’como Jesuuquidiito nowaanomaadö wwäiñe tönwanno cone’da cönä’ja’to Jacoowo, Juan jäcäiñe.

²⁵ Jesuuquidiito tönoowanoomadö cöna’dejjaicho yaawä; cönä’döaacä: —Änwanno odhoowanääcäiñe Wanaadi dhowaanojöncomo edhaajotoncomo o’jodhe töwei’she yeichöcoomo. Ñanno cajiichaanacoomo tösootoichomo jäduuje tönaanontäjä’e weneeneto.

²⁶ Änwanno mmaane yääje eijai’cha maato. Ñäädä adhantawäiñe o’jodhe töwei’shato töjimmä anoonöcoomoje eijai ña.

²⁷ Ñäädä adhantawäiñe cajiichaanaje töwei’shato töjimmä wwäiñe tödööjä’neije nei’ñojo.

²⁸ Soto nnedöödä cöneejäne’, soto anontäneichomooje’da, chäwwäiñe tödööneije mmaane, töwä’tudu wetä mmaja jooje soto wääwanaacato’comooje; quee cönä’döaacä Jesuuquidiito.

Aacä tänuuquemjöncomo enu’tä’jödö

²⁹ Yääje mma yaawä Jeedicó ñanno iichädaawäiñe, jooje soto chääjadäiñe cönta’to.

³⁰ Aacä tänuuquemjöncomo yäätä cönä’ja’to, äämä taawä yaatajiima’como. Töwwäiñe eta’jäcä tödö’täcäiñe Jesuuquidiito wötäädö tönwanno cöncä’tömöicho yaawä: —Wentumje ñaa eneecä Cajiichaana, amäädä Dawí weichö; quee cönä’döa’to.

³¹ Ñanno jooja’como soto cöneeta’jöichaja’to. Yääje yeichaame tönwanno jooje’cä mma cöncä’tömjä’a’to: —Wentumje ñaa eneecä Cajiichaana, amäädä Dawí weichö; quee.

³² Yaawä Jesuuquidiito cöneedennai; ñanno tänuuquemjöncomo cöna’dejjaicho; cönä’döaacä chäwwäiñe: —¿Aaquene äwä’döjo’se maato öwwä?

³³ Tönwanno cönä’döa’to chäwwä: —Äwwä töwäänu’tojo’se ñaa na, Cajiichaana; quee cönä’döa’to.

³⁴ Jesuuquidiito wentumje cöneenea’to; chäänuduucomo cönaajojoi. Yaawä dea mma tönwanno töneene cönä’döicho. Jesuuquidiito jadä cönta’to yaawä.