MATEO 19 - Wanaadi A'deddu

Töjiiñamo e’nomjadö jäcä Jesuuquidiito nowaanoma’jödö

¹ Yääje töwa’deuwödö töwä’ca’jäcä Jesuuquidiito cönääma’täi Caadideea ñanno. Cöntämä Judheea chäcä; Joodadán mänsemjo cönä’döi yaawä.

² Jooje soto chääjadä cönäämannä’a’to. Yäätä töwö cönaadoncaicho cädäija’como.

³ Yaawä anejjacoomo jaadiseeo cöneejoto Jesuuquidiito wwadäädä. Tönwanno oneejadööje mmädä cöneecamma’joicho: —¿Aashicha ca eijai ñai dhanwa wwä töjiiñamo e’nomjadö tumjummadö woije mma? quee cönä’döa’to.

⁴ Jesuuquidiito cönä’döaacä: —¿Wanaadi a’deddu imennaajä jäcä ana’de’tä’da ca meiya’quene awa’deene soto tödö’jödö jäcä: “Wanaadi cönnöi dhanwa wodi acä;” quee naadö?

⁵ Edääje mmaja nä’döa dea Wanaadi a’deddu: “Yääje yeijäcä dhanwa tumö shancwajai ña, senö mmaja, töjiiñamo jadä töwä’dödö wetä. Yaawä aacä töweichaameiñe tooniño nönge naato’de;” quee nä’döa Wanaadi a’deddu imennaajä.

⁶ Mädääje naato’de yaawä, aacä’da, tooni mmaane. Yääje yeijäcä Wanaadi nejoodöjo’jödö soto änsancwajoi’che; quee cönä’döaacä Jesuuquidiito.

⁷ Ñoowanoomadö cöneecamma’joicho yaawä: —Yääje yeiya’jäcä, ¿ane’cotoojo Moisé jajeeda tömmenäjo cönä’jaacä töwääto’nomja töweichöcoomo ene’ju’tojo? quee cönä’döa’to.

⁸ Jesuuquidiito cönä’döaacä chäwwäiñe: —Moisé ajiiñantoncomo töne’nomjajo cönä’jaacä äwwäiñe töwäätuujacoone’da aweijäcäiñe. Yääje’da cönä’jaacä awa’deene.

⁹ Öwö yääje wä’döa äwwäiñe, ñäädä töjiiñamo e’nomjanei, imaasuduicha’da yei’jödö weichaame, anejja wodi dö’tä yä’döa’jäcä yaawä, conemjönö nödööa. Ñäädä e’nomjaajä dö’tono wä’dödö mmaja conemjönö nödööa dea; quee cönä’döaacä Jesuuquidiito.

¹⁰ Ñoowanoomadö cönä’döa’to chäwwä: —Mädääje wodi acä weiñä yeiya’jäcä aashicha’da tö’dhe weiñä na; quee cönä’döa’to.

¹¹ Yaawä Jesuuquidiito cönä’döaacä: —Anejja etaajai’cha na mädä ecammaajä. Chäwwonooje ecammaajä naadö mmaane etaajai ña, Wanaadi nutuudu woije.

¹² Töweiye dhanwa töjöötamjönö. Anejja mädääje na töwennu’jödö jonnoto’jödöödä. Anejja ’quene, soto nemuuca’jödö. Anejja ’quene, Wanaadi tadaawaajui jäcäinchädä daja. Mädä etaatojo töweiye yeiya’jäcä anejja wwä, ñäädä neta’ñojo; quee cönä’döaacä Jesuuquidiito.

Mudeeshi’chä jäcäiñe Wanaadi wwä Jesuuquidiito wa’deuwö’jödö

¹³ Yääje mma yaawä soto cönne’a’to mudeeshi’chä Jesuuquidiito wwadäädä, ye’cäcäiñe tamäädö tödöödö wetä chäwwä, chääjäcäiñe Wanaadi wwä ya’deuwödö wetä mmaja. Ñoowanoomadö cömjiiyeme’jä’a’to ñanno mudeeshi’chä edhaamo.

¹⁴ Yaawä Jesuuquidiito cönä’döaacä: —Neejö’ña’to mudeeshi’chä öwwadäädä; monoowatäätäi. Canno nönga’como ñanno Wanaadi sotoi; quee cönä’döaacä Jesuuquidiito tönoowanoomadö wwäiñe.

¹⁵ Yaawä tamäädö cönnöi mudeeshi’chä de’cäcäiñe. Yäätonno cöntämä yaawä.

Ääjömaanö tönsomaacato wei’jödö

¹⁶ Yääje mma yaawä dhanwa cöneejä Jesuuquidiito wwadäädä; cönä’döaacä: —Owaanomaanei aashichaato, ¿ane’cäämö aashichaato tödööjai wanä weichö töwaatamemjönö chaana’catoojoje?

¹⁷ Jesuuquidiito cönä’döaacä chäwwä: —¿Ane’cotoojo aashichaatoje cä’taanä? Aashichaato ’je’da na soto. Wanaadi mma ñäädä aashichaato. Aweichö ene’se aweiya’jäcä, waanontänä woije eichä; quee cönä’döaacä.

¹⁸ Ñäädä dhanwä cönä’döaacä yaawä: —¿Äshono waanontänä? Jesuuquidiito cönä’döaacä: —Yää: “Soto maneemai; mä’masuuduijai; adheememöi; jönaawä soto maneementäi;

¹⁹ oomo aashicha tödööcä, aanö mmaja; aweichacoono ijummacä amäädä äwä’jummadö nönge dea;” quee naadö; quee cönä’döaacä Jesuuquidiito.

²⁰ Yaawä ñäädä ääjömaanö cönä’döaacä chäwwä: —Tameedäädä mädä waanontä’jä woije wäänene, mude’cä’cäje weichö jonnoto’jödöödä. ¿Ane’cäämö mmaja tödööemö nai chea öwwä? quee cönä’döaacä.

²¹ Jesuuquidiito cönä’döaacä chäwwä: —Chäänönge jeene awei’she aweiya’jäcä, tameedä äwwono ejeemajoota, änsomaadö, anaudädö mmaja. Chääje’jödö u’jä’cä yaawä a’ca’como wwä, caju ñaane tönsomaaque meiye. Ä’cäde’de yaawä, jaadä meiye; quee cönä’döaacä Jesuuquidiito.

²² Yää a’deu töwwä etaadö’jo ñäädä äjömaanö wentumje cöntämä yaawä, jooje tönsomaaque töweijäcä, jooje tönäudäque töweijäcä mmaja.

²³ Yaawä Jesuuquidiito cönä’döaacä tönoowanoomadö wwäiñe: —Chäänönge yääje wä’döa äwwäiñe, tadaawaajuje na tönsomaacato wwä Wanaadi töcaajichaanaije tödöödö, tönaudäcaato wwä chäänönge mmaja.

²⁴ Yääje wä’döa äwwäiñe, macuusa dha’tadö tai wa’shadi omonque’jönö töweiye naichö naane’; töwaacö’je mma tönsomaacato wwä Wanaadi töcaajichaanaije tödööque’jönö na; quee cönä’döaacä Jesuuquidiito tönoowanoomadö wwäiñe.

²⁵ Yää eta’jäcä ñoowanoomadö cönääcatoncaicho. Tönwannoje dea cönä’döa’to: —¿Änääcööne ääwanaacajai ñai, yääje yeiya’jäcä?

²⁶ Jesuuquidiito tönoowanoomadö cöneene’ma’to; cönä’döaacä chäwwäiñe: —Soto woije mma ääwanaacajai’cha weiñä nai, Wanaadi mmaane tameedäädä tödööjai ña; quee cönä’döaacä.

²⁷ Yääje mma yaawä Peedhodo cönä’döaacä: —Ñaa mmaane tameedä ñaa cöne’nomjai ajaadä töweichö wetä. ¿Ane’cäämö ñaa wwä töweiye nai’che?

²⁸ Jesuuquidiito cönä’döaacä chäwwäiñe: —Chäänönge yääje wä’döa äwwäiñe, yaawä tameedä eduuwaatoje yenwacaama’jäcä, Soto nnedö tumuudei ye’wä nataajima’de o’jodhaatoje. Yaawä änwanno, jaadoncomo’jödö, mude de’wä mmaja mataajimaato’dede iisadaaediitacoomo cajiichaanaichomooje, ñanno amoojadooto de’wä aacä iju’jä naatoodö.

²⁹ Ñäädä öwö jääcäinchädä tömmai ñännei, tacontomo, tuduichomo jeiñe mma, töjaadui’chomo jeiñe mma, ñäädä tumö, senö ñännei jeiñe mma, töjiiñamo, tönnacoomo jeiñe mma, tönaudädö jeiñe mma, öwö jääcäinchädä yää ñänga’jäcä, ñäädä wwä yää nöngato mmaja nä’tua’de jooje’cä jeene; yeichö töwaatamemjönö mmaja Wanaadi nu’a’de chäwwä.

³⁰ Eduuwa täneejuque naatoodö dhantai ema’jödööje naato’de. Ñanno eduuwa wentumje naatoodö mmaane dhantai töneejuque naato’de.