MATEO 17 - Wanaadi A'deddu

Jesuuquidiito wenwacaama’jödö

¹ Tooni amoojato anoototo ai Jesuuquidiito töjaadä cönaadäi Peedhodo, Jacoowo mmaja, dhacoono Juan mmaja; töjääcäjeeneiñe cöntonto jöö cawooto de’cäi.

² Yäätä töwö Jesuuquidiito anejjeja cönenwacaamai yaawä dhowaadäädäiñe. Ijeedö tawaane cönä’döi, shii wa’cä. Yoomö mmaja tajääde’de cönä’döi chea, weijotä.

³ Yaawä Jesuuquidiito nowaanomaadö owaadäädäiñe cönäänejoicho Moisé, Edía mmaja; Jesuuquidiito jadä cöna’deujä’a’to.

⁴ Yaawä Peedhodo cönä’döaacä Jesuuquidiito wwä: —Cajiichaana, aashicha eetä caato. ¿Aaquene ämmaichomo ñaa wwä amääa’jäcä aaduwaawä, tooni amäädä ämmai, tooni mmaja Moisé mmai, tooni mmaja Edía mmai?

⁵ Yääje ya’deutaame dea ca’dutu tawaanato cöneejä immai’chäiñe. A’deu cönäätaacä yaawä ca’dutu do’taca: —Määdhä ñäädä Önnedö umjummadö, ta’cwaiñe chääjäcä waadö. Dha’deddu etaatäcä; quee cönäätaacä a’deu.

⁶ Yää a’deu eta’jäcä töwwäiñe ñoowanoomadö cönääcatoncaicho; tä’mudhe cönä’döicho yaawä nono jo, tösaccomje.

⁷ Yaawä Jesuuquidiito cöneejä chäwwadäädäiñe; cönaajojoicho. Töwö cönä’döaacä: —Aanöntäcä. Tösaade’daane eichäcä.

⁸ Töwe’je’duca’comjäcä Jesuuquidiito mma cöneedantoicho yaawä töjääcäjeene.

⁹ Jöö daca töwä’tädaawäiñe Jesuuquidiito cönä’döaacä chäwwäiñe. —Soto wwäiñe maneecammajä’täi’che yää meneeatoodö Soto nnedö waadoncadö wa’cä töwäämaajo jonno; quee cönä’döaacä.

¹⁰ Ñoowanoomadö cöneecamma’joicho yaawä: —¿Ane’que’nei owaanomannamo awa’de Edía we’tojo töneecamma weneeneto? quee cönä’döa’to.

¹¹ Jesuuquidiito cöneccujä’a’to; cönä’döaacä: —Chäänöngato mädä; Edía ne’a’de. Töwö tameedä nichooneca’de.

¹² Yääje yeichaame yääje wä’döa äwwäiñe, Edía mmaja cöneejä deeade’, soto aneene’jutu’da cöneiya’to ñäädäje yeichö. Tumjummadööcomo woije mma cönnöicho. Mädääje mmaja Soto nnedö nimaaminchaato’de; quee cönä’döaacä Jesuuquidiito.

¹³ Yaawä Jesuuquidiito nowaanomaadö cöntö’tammecöicho Juan Wautiita jäcä ecammajäätödööje yeichö.

Mude’cä’cä änönnä’jano adonca’jödö

¹⁴ Yaawä ñanno jooja’como soto döiñaiñe Jesuuquidiito wä’döa’comjäcä, dhanwa cöneejä Jesuuquidiito wwadäädä. Tä’mudhe cönä’döi ije’taca; cönä’döaacä:

¹⁵ —Cajiichaana, wentumje önnedö eneecä. Änönnä’je töwö na. Jooje töwäntunaanö’e weneene; wa’to nwaca töweejucca aneedawä, na’cwaca mmaja.

¹⁶ Onoowanoomadö wwadäädäiñe weneejädö’je; adoncajai’cha nä’janto tönwanno; quee cönä’döaacä ñäädä dhanwa Jesuuquidiito wwä.

¹⁷ Jesuuquidiito cöneccujä’acä; cönä’döaacä: —Mädä wa’cä aneecamjö’da maato, chäänönge’da mmaja. ¿Ä’waasa’cäne mma numa ajaadäiñe wei’she maato? Numa dajaane wä’döi ashinchädööcomooje. Sadäädä ene’täcä mä’dä mude’cä’cä; quee cönä’döaacä Jesuuquidiito.

¹⁸ Yaawä Jesuuquidiito odo’sha cöneuwöi; odo’sha cöneeja’cai yaawä. Yaawä dea mma cönaadoncai ñäädä dhanwa’cä.

¹⁹ Yääje mma yaawä ñoowanoomadö töudäje Jesuuquidiito cöneecamma’joicho: —¿Ane’que’nei ija’canö’jojai’cha ñaa nä’jaanä? quee cönä’döa’to.

²⁰ Jesuuquidiito cönä’döaacä chäwwäiñe: —Chäänönge aneecamjö’da aweijäcäiñe. Chäänönge yääje wä’döa äwwäiñe, wishu adöödö ’cäwa’cä aneecamjödööcomo weichaame, edääje ä’döjai maato mädä jöö wwä: “Unwa ääsecaacä;” quee ä’döjai maato; yää jöö ääsecaajai ña yaawä. Ä’döjaichojöönö ’je’da eijai ña yaawä äwwäiñe.

²¹ Yaawääne’ yääjato odo’sha töweeja’ca nai Wanaadi wwä wa’deuwö’jä queede, wäänema’jä queede mmaja; quee cönä’döaacä Jesuuquidiito.

Töwäämatoojo jäcä Jesuuquidiito necammajäätö’jödö mmaja

²² Caadideea ña töwäämannäjöödawäiñe Jesuuquidiito cönä’döaacä tönoowanoomadö wwäiñe: —Soto nnedö nä’tuja’de soto wwäiñe.

²³ Tönwanno nemaato’de yaawä. Aaduwaawä anoototo ai töwö naadonca’de; quee cönä’döaacä Jesuuquidiito. Yää etaadö’jo jooje wentumje cönä’ja’to ñanno ñoowanoomadö.

Wanaadi weichojo choonecaatojooje jödaata utuudu

²⁴ Yaawä Cajeedamu ña yä’döa’comjäcä, Wanaadi weichojo edhaamo sotoi Peedhodo cöneejodöicho. Tönwanno cönä’döa’to: —¿Odhoowanoomaneichomo jödaata äntu’da ’ja Wanaadi weichojo choonecaatojooje? quee cönä’döa’to.

²⁵ —Ee, tunu’e; quee cönä’döaacä Peedhodo. Ä’saca Peedhodo womonga’jäcä chäwwä Jesuuquidiito cöna’deuwöi awa’de; cönä’döaacä: —¿Aaquene nichö’taanä äwwä, Simón? ¿Änääcö wwä jödaata töne’ca’e weneeneto acu’shänä? ¿Tösootoichomo wwä ’ja, anejjacoomo wwääne? quee cönä’döaacä Jesuuquidiito Peedhodo wwä.

²⁶ —Anejjacoomo wwä ’cännä; quee cönä’döaacä Peedhodo. Jesuuquidiito cönä’döaacä yaawä: —Yääje yeiya’jäcä shootoichomo aneejema’da eijai ñaato yaawä.

²⁷ Yääje yeichaame, cone’da yeichöcoomo queiñe, chu’jä aca o’täta. Ñäädä awa’deeto ono’tädö inchajoocä’de, jödaata adai’joto medantäiye inchaca. Yää jödaata u’ta’de yaawä ädö’sennotooje, öwö dö’sennotooje mmaja, Wanaadi weichojo choonecaatojooje; quee cönä’döaacä Jesuuquidiito Ceedhodo wwä.