MATEO 15 - Wanaadi A'deddu

Soto choone’majaicho

¹ Yaawä Jesuuquidiito döiña cöneejoto anejjacoomo jaadiseeo, judhío owaanomannamo mmaja, Jeduusadén ñancomo we’a’como. Tönwanno cönä’döa’to:

² —¿Ane’que’nei onoowanoomadö ei’cha naicho jenaado’jocoomo wätunnäichomo nönge? Tönwanno tamäädöcoomo amoichadööjo’da töwääwashinchä weneeneto; quee cönä’döa’to.

³ Jesuuquidiito cönä’döaacä chäwwäiñe: —¿Änwanno ’na? ¿Ane’que’nei Wanaadi waanontädö tömja’do’jo määnetääne dea änwanno äwäätunnäichomo mma tödöödö wetä?

⁴ Wanaadi yääje cönaanontäi: “Oomo aashicha tödööca, aanö mmaja. Ñäädä tumö eunei, senö eunei mmaja, tämaane emaatäcä ñäädä;” quee Wanaadi waanontädö na.

⁵ Änwanno mmaane edääje äwä’dödööcomo: Yääje soto ä’döjai ña tumö wwä, senö wwä jeiñe mma: “Ä’wa’täjai’cha wa; tameedä önnödö Wanaadi wwä tu’e na;” quee äwä’dödööcomo.

⁶ Mädääje soto wä’döa’jäcä yuumö ani’wa’täjo’da maato yaawä chäwwä, yeenö ani’wa’täjo’da mmaja. Mädääje ema’jödööje Wanaadi waanontädö mödööato, äwäätunnäichomo mma tödöödö wetä.

⁷ Yääjönö wa’co’como wäänejoodö änwanno. Chäänönge yääje Isaía cömmennäi äjääcäiñe:

⁸ Canno soto aashicha jääcä töwa’deuwe weneeneto, chö’tajäätödööcomo mmaane amoinche na jääcä.

⁹ Töwäädämma wa’deme’tä weneeneto. Tönwanno tönoowanooma weneeneto soto wätunnäichomo que mma; quee cömmennäi Isaía; quee cönä’döaacä Jesuuquidiito jaadiseeo wwäiñe.

¹⁰ Yääje mma yaawä Jesuuquidiito cöna’dejjaicho ñanno soto; cönä’döaacä chäwwäiñe: —Aashicha cätaatäcä.

¹¹ Jönaawono womongaja soto choone’majai’cha na. Mänööne, yo’tacaano weja’caajääne töncone’ma; quee cönä’döaacä Jesuuquidiito.

¹² Yaawä ñoowanoomadö cöneejoto; chäwwä cönä’döä’to: —Jaadiseeo dajaane cone’da naato yääje äwä’dö’jödö weijäcä; quee cönä’döa’to.

¹³ Jesuuquidiito cönä’döaacä chäwwäiñe: —Tameedä Jaaja caju ñano niñaatö’tädööjönö nätu’caja’de imiichö jadäädä.

¹⁴ Mädääje nei’ña’to. Tönwanno tänuuque’da naato, tänuuquemjöncomo mmaja ne’se’taato. Tänuuquemjönö wwä tänuuquemjönö mmaja adääa’jäcä, a’nädä ejuccajai ñaato yaawä sö’jato aca; quee cönä’döaacä.

¹⁵ Peedhodo cönä’döaacä yaawä: —Ñaa wwä ecammajä’cä mädä yö’seeno jäcä; quee cönä’döaacä.

¹⁶ Jesuuquidiito cönä’döaacä: —¿Änwanno jadä’jödöödä äntö’tammecö’da maato dea?

¹⁷ ¿Odhoowanääcäiñe’da nai tameedä soto ntaiño womongajä iwenwaca iichädö, wecaanawä töweeja’caamöje?

¹⁸ Soto do’tacaano weja’caajä mmaane chö’tajäätödö jonno ne’a. Mädääne yää soto cone’manei.

¹⁹ Soto tö’tajäätödö acaano weja’caajääne conemjönö weiyajä, yää cone’da tö’tajä’nä, soto emaadö mmaja, anejja jiñamo ajoojodö mmaja, masuuduichanä mmaja, wemeenönnä mmaja, jönaawä soto ementädö mmaja, wätunnä dha’me weiñä mmaja.

²⁰ Mädääne yää soto cone’manei. Tamäädö anaamoicha’da wääwashinchänä mmaane soto oncone’ma’da na; quee cönä’döaacä Jesuuquidiito.

Jesuuquidiito ecamjö’jödö wodi Canaanea ñano wwä

²¹ Yäätonno Jesuuquidiito cönääma’täi yaawä. Tiido ña cöntämä, Sidhón ña mmaja.

²² Yääje mma yaawä wodi Canaanea ñano, yää jataawono, Jesuuquidiito cöna’dejjai, cönä’döaacä: —Cajiichaana, Dawí nnedö, wentumje cäneecä. Önnedö wodi’chä näntunaanö’a jooje; odo’sha ’je na; quee cönä’döaacä.

²³ Jesuuquidiito aneccujäätö’da cöneiyaacä. Yaawä ñoowanoomadö cöneejoto chäwwadäädä; cönä’döa’to Jesuuquidiito wwä: —Enno’jacä mä’dä wodi. Cöjaanaquiimaato; quee cönä’döato.

²⁴ Yääje mma yaawä töwö Jesuuquidiito cönä’döaacä: —Oweeja sadiijanga’como jäcäinchädäiñe Wanaadi yaanontäne, ñanno iisadaaediitacoomo mma; quee cönä’döaacä Jesuuquidiito tönoowanoomadö wwäiñe.

²⁵ Yaawä ñäädä wodi cöneejä. Tä’mudhe cönä’döi ije’taca. —Cö’wa’täcä, Cajiichaana; quee cönä’döaacä.

²⁶ Jesuuquidiito cönä’döaacä chäwwä: —Cone’da mudeeshi’chä cataadöcoomo utuudu sö’na’cä wwäiñe; quee cönä’döaacä.

²⁷ Ñäädä wodi cönä’döaacä yaawä: —¿Yääjönca? Yääje yeichaame sö’na’cä mmaja tönäu’cwe weneeneto meesa o’nä tädhaamo uduucomo wä’me’jödö; quee cönä’döaacä.

²⁸ Jesuuquidiito cönä’döaacä chäwwä: —Jooje mecaanö’a. Äjääcä neja’däto’ñojo ämjummadö nönge; quee. Yaawä dea ñäädä wodi nnedö cönaadoncai.

Jooje soto adonca’jocoomo

²⁹ Yääje mma yaawä Jesuuquidiito cönääma’täi yäätonno. Caadideea cu’jäi jacääcä cönäämannä’acä; cöntämä yaawä jöö de’cäi. Yäätä cönaatajiimai.

³⁰ Jooje soto cönä’döicho yaawä yöiña. Tönwanno cönnejooto secumja’como, tänuuquemjöncomo mmaja, ta’deudemjöncomo mmaja, töwe’tamonga’como mmaja, anejjacoomo cädäija’como mmaja. Jesuuquidiito dö’tä cönnöicho. Töwö cönaadoncaicho yaawä tameedä.

³¹ Ñanno soto cönääcatoncaicho yaawä, töwwäiñe eneea’jäcä ta’deudemjöncomo wa’deutadööcomo, töwe’tamonga’como waadoncadööcomo mmaja, secumja’como sheecuncadööcomo mmaja, tänuuquemjöncomo enu’tädööcomo mmaja. Aashicha cöna’deuwa’to yaawä iisadaaediitacoomo Wanaadiyö jäcä.

Aacäichea miide soto ewanshincho’jocoomo

³² Yääje mma yaawä Jesuuquidiito tönoowanoomadö cöna’dejjaicho; cönä’döaacä: —Wentumje canno soto wene’maato. Aaduwaawä anooto nä’döi eduuwa jaadä yeichöcoomo; tönwanno chääwanshiñööcoomo ’je’da na. Ämiije enno’ja’se’daiñe wa ijaatacäiñe, ääma taawä mma a’su’ta’noto; quee cönä’döaacä Jesuuquidiito.

³³ Ñoowanoomadö cönä’döa’to yaawä: —¿Äsha mmaja sadä caneejodöötädö deaade’ canno jooja’como soto ewanshiñööcomo, jata ’jemjönö aca mmädä?

³⁴ Jesuuquidiito cöneecamma’joicho: —¿Ä’waasa uu nai äwwäiñe? quee cönä’döaacä. Tönwanno cönä’döa’to: —Aacä amoojato i’yaca’jödö, aacä’cä na’cwacaano’cä mmaja.

³⁵ Yaawä Jesuuquidiito soto cönaajimaajoicho nono jo.

³⁶ Yää aacä amoojato i’yaca’jödö cönannäjöi yaawä, na’cwacancomo’cä mmaja. Töwa’deuwödö’jo yää cöni’yajäätöi. Tönoowanoomadö wwäiñe cuntui yaawä. Tönwanno cöneecamoicho soto wwäiñe.

³⁷ Tameedä cönääwashinchöicho yaawä töwensu’tädööcomo wa’cä. Yäädetö’jödö cönancuicho yaawä, aacä amoojato wöwa.

³⁸ Ñanno töwääwashinchaamo cönä’ja’to aacäichea miide dhanwaacomo, wodiiñamo töme’cu’tä’da mma, mudeeshi’chä töme’cu’tä’da mmaja.

³⁹ Soto enno’jadööcomo’jo Jesuuquidiito cönä’täi yaawä cudiiyada aca. Maacada ña cöntämä yaawä.