MATEO 14 - Wanaadi A'deddu

Juan Wautiita wääma’jödö

¹ Yääje mma yaawä cajiichaana Edoodhe cöneetaacä Jesuuquidiito ecaadö.

² Töwö cönä’döaacä tösootoi wwäiñe: —Juan Wautiita ñäädä, töwäämaajo jonno yaadoncaajä. Yääje yeijäcä täneemö tönnöe weneene; quee cönä’döaacä.

³ Edoodhe yääje cöna’döaacä töwwä Juan jedeesoje tödööjo’jödö weijäcä, cadheena que imiijo’jödö weijäcä mmaja. Töwö yääje cönnöi Edoodhía woije, ñäädä tacoono Jediipe jiñamo.

⁴ Edääje Juan töwä’döe cönä’jaacä Edoodhe wwä: —Cone’da mädä adhaacono jiñamo dö’tä aweichö; quee.

⁵ Töwö Edoodhe Juan ema’se töweiye cönä’ja’dö’je, soto tönnontäiñe cönä’jaacä, Wanaadi wa’deuwödö ecammaneije Juan weichö töneecanö’e yeichomjäcä.

⁶ Yaawä Edoodhe wennu’jödö cu’nädö anootoi’chädö awä tönwanno cönänwa’to. Edoodhía nnedö cönänwaacä ñeenedööcomooje. Edoodhe wacö’je yää cönä’jaacä.

⁷ Yääje yeijäcä töwö jäduuje cönääcammai ñäädä wodi wwä; cönä’döaacä: —Ämjummadö ane’ca’cä öwwä, wäntuiye yaawä.

⁸ Ñäädä wodi senö wwä tö’jedä’jödö weijäcä cönä’döaacä Edoodhe wwä: —Juan Wautiita ju’jä ene’cä jadaaji aca; quee.

⁹ Cajiichaana Edoodhe cone’da cönä’döjoi yaawä. Yaawääne’ jäduuje töwääcamma’jödö weijäcä, töjaadoncomo wääwashinchädö jöichädööje mmaja, ta’deddu iiñaca’se’da cönä’jaacä.

¹⁰ Yaawä tösootoi cönaanontoicho jedeeso ewöötö taca, Juan jöncä’e.

¹¹ Iju’jämjödö cönnejooto yaawä jadaaji aca. Ñäädä ajei’choto’jaato wwä cuntuicho yaawä. Ñäädä cuntui yaawä senö wwä.

¹² Yääje mma yaawä Juan nowaanomaadö’jödö cöntonto jedeeso ewöötö taca. Chääquejöödö cönaadoicho ewaacadö wetä. Yää ’jeje cöntonto yaawä Jesuuquidiito wwä ecammajä’e.

Ijaatoodea miide soto ewanshincho’jocoomo

¹³ Yää eta’jäcä töwwä Jesuuquidiito cöntämä töjääcäjeene, cudiiyada awä, soto ’jemjönö aca. Yääje mma yaawä iichä’jödö eta’jäcä soto wwäiñe, inchäcä cöntonto yaawä macääcä, töjaatawonnoiñe.

¹⁴ Töwaajäiya’jäcä Jesuuquidiito jooje soto cöneedantoicho. Töwö wentumje cöneene’ma’to. Cädäija’como cönaadoncaicho.

¹⁵ Cho’momöödawä ñoowanoomadö cöneejoto yaawä chäwwadäädä; cönä’döa’to: —Cho’momöödö mädä. Amoinche caato jata jäcä. Canno soto enno’jacooto, täwanshiñööcomo aneejemaataiyeto jataaca.

¹⁶ Jesuuquidiito cönä’döaacä: —¿Ane’cotoojo tädööto deeade’ ? Änwannoone ewanshinchätääcä.

¹⁷ Tönwanno cönä’döa’to chäwwä: —Ijaatoodea uu i’yaca’jödö mma cöwwäiñe na, na’cwacaano’cä aacä mma; quee cönä’döa’to.

¹⁸ Jesuuquidiito cönä’döaacä: —Ene’täcä sadäädä; quee.

¹⁹ Yaawä Jesuuquidiito soto cönaajimaajoicho woi ye’wä. Töwö uu cönannäjöi yaawä, yää ijaatoodea i’yaca’jödö, na’cwacaano’ca mmaja, a’nädäncädä. Caju ña ene’mancädä yää äwanshi jäcä cöna’deuwöi yaawä. Yaawä uu cöni’yajäätöi. Tönoowanoomadö wwäiñe cuntui. Ñanno cöneecamoicho yaawä soto wwäiñe.

²⁰ Tameedäädä cönääwashinchoicho yaawä, töwensu’tädööcomo wa’cä. Yää ’jeje i’yajä’ajä wäädetö’jödö cönancuicho yaawä, amoojadooto de’wä aacä wöwa.

²¹ Ñanno töwääwashinchaamo’jödö cönä’ja’to ijaatoodea miide dhanwaacomo, wodiiñamo töme’cu’tä’da mma, mudeeshi’chä töme’cu’tä’da mmaja.

Jesuuquidiito wötä’jödö tuna de’wä

²² Yääje mma yaawä Jesuuquidiito mänsemjona tönoowanoomadö cönenno’jaicho towaajo, cudiiyada awä. Töwö mmaane cöno’nomjoi yäätä, soto wwäiñe wääcammanääje.

²³ Yaawä soto enno’jadööcomo’jo töjääcäjeene cöntämä jöö de’cäi, Wanaadi wwä a’deuwe. Cho’monga’jäcä töwö cönä’jaacä yäätä töjääcäjeene.

²⁴ Ñanno ñoowanoomadö cönä’ja’to cudiiyada awä chu’jä annawääne. Yaawä jejeichä cönä’döi chääjäcäiñe, madaataca mmaja.

²⁵ Yaawä yääwadöncataame yöiñaiñe Jesuuquidiito cöntaacä tuna de’cäcä.

²⁶ Tuna de’cäcä yeejödö edanta’jäcä ñoowanoomadö cönääcatoncaicho jooje. Tönwanno cöncä’tömjä’a’to tösaadöcoomoje: —Äcaatomjä mä’dä; quee cönä’döa’to.

²⁷ Yaawä dea mma Jesuuquidiito cöna’deuwöi chäwwäiñe: —Ääcatonca’daane eichäcä, öwö mma. Tösaade’daane eichäcä; quee cönä’döaacä.

²⁸ Peedhodo cönä’döaacä yaawä chäwwä: —Cajiichaana, amäädä aweiya’jäcä, ca’dejjacä, adöiña wötäiye tuna de’cäcä.

²⁹ Jesuuquidiito cönä’döaacä: —Ä’cädeene; quee. Peedhodo cönä’täi yaawä cudiiyada acanno. Tuna de’cäcä cöntaacä Jesuuquidiito wwadäädä.

³⁰ Yaawä jejeichä töwwä eneea’jäcä, töwö cönääcatoncai. Töwoomomöödawä töwö cönä’döaacä: —Cajiichaana, cäwaanacaacä; quee cöncä’tömöi.

³¹ Yaawä dea mma Jesuuquidiito cönaajäi dhamäädö jäcä; cönä’döaacä chäwwä: —Aneecamjö’daiche deja ma dea. ¿Ane’que’nei tösaade mä’jannea?

³² Yaawä cudiiyada aca yä’ta’comjäcä jejeichä cöneedennai.

³³ Yääje mma yaawä ñanno cudiiyada acancomo tä’mudhe cönä’döicho Jesuuquidiito je’tacä; —Wanaadi nnedö dämma amäädä; quee cönä’döa’to.

Cädäija’como adonca’jödö Jeneesade ña

³⁴ Mänsemjo cönä’döicho yaawä, Jeneesade ña.

³⁵ Iiñancomo wwäiñe Jesuuquidiitoje yeichö edanta’jäcä, tameedä yeichö wa’cä cöneecammaicho. Cädäija’como cönnejooto yaawä yöiña.

³⁶ Tönwanno cönä’döa’to Jesuuquidiito wwä: —Owoomö a’sadö mma ñaa najoojo’ñojo; quee. Tameedä ajoojonnamo’jödö cönaadoncaicho.