MATEO 12 - Wanaadi A'deddu

Wäädeetatoojo anooto awä tödööemjönö tödö’jödö Jesuuquidiito nowaanomaadö wwäiñe

¹ Wäädeetatoojo anooto awä Jesuuquidiito cönta’to audaajä ai. Ñoowanoomadö ämiije cönä’ja’to; natö ejeedödö cömjä’a’to tuduucomooje.

² Yää eneea’jäcä jaadiseeo cönä’döa’to Jesuuquidiito wwä: —Eneecäjaane’ma, wäädeetatoojo anooto awä tödööemjönö onoowanoomadö nödööaatoodö; quee cönä’döa’to ñanno jaadiseeo.

³ Jesuuquidiito cönä’döaacä chäwwäiñe: —¿Ana’de’tä’da ca meiya’quene Dawí nödö’jödö ämiije töweichö, chääjadoncomo mmaja?

⁴ Töwö cönoomomöi Wanaadi weichojo taca. Uu täneemöje tödööajä cönäu’cwai yaawä. Yää cönä’jaacä Dawí uduuje tödööajääjönö, chääjadoncomo uduucomooje tödööajääjönö mmaja, Wanaadi wwä töwa’deuwaamo edhaajotoncomo uduucomooje tödööajääne.

⁵ ¿Waanontänä imenaajä jäcä ana’de’tä’da ca meiya’quennea cone’da’da yeichö Wanaadi wwä töwa’ deuwaamo edhaajotoncomo wetaadawa’cajoodöcoomo wäädeetatoojo anooto awä, Wanaadi weichojo taca?

⁶ Yääje wä’döa äwwäiñe, töweiye na eetä Wanaadi weichojo e’jodhaato jaiñoone.

⁷ Wanaadi a’deddu imennaajä yääje nä’döa: “Wentumje äneetä weiñä tujunne na öwwä; saaquidiijiisiyo tödöödö tujunne’da mma;” quee nä’döa imennajä. Yää imennaajä odhoowanääcäiñe’da töneeta määnetääne. Odhoowanääcäiñe ei’jo mmaane chäänöngemjöncomooje ane’tä’da meichädö chäänönga’como.

⁸ Soto nnedö na wäädeetatoojo anooto edhaajäje jadä’jödöödä; quee cönä’döaacä Jesuuquidiito jaadiseeo wwäiñe.

Dhamäädö töwaamo’mongato wei’jödö

⁹ Yääje mma yaawä yäätonno Jesuquidiito cöntämä judhío we’jummato’como taca.

¹⁰ Yäätä cönä’jaacä dhanwa dhamäädö töwaamo’mongato. Yäätoncomo soto Jesuuquidiito cöneecamma’joicho: —¿Aashicha töweiye nai wäädeetatoojo anooto awä soto adoncadö? quee cönä’döa’to. Tönwanno yääje cönä’döa’to chääjäcä cone’da töwa’deuto’como ejoodödö wetä.

¹¹ Jesuuquidiito cönä’döaacä chäwwäiñe: —¿Aaquene töweiye maato änwanno? Täcöönö oweeja we’ducca’jäcä socoojato do’taca wäädeetatoojo anooto awä, ¿anu’ca’da ’ja?

¹² Soto tujunne’cä töweiye nai, oweeja e’jodhe’cä. Yääje yeijäcä aashichaato tödöödö cone’da’da na wäädeetatoojo anooto awä; quee cönä’döaacä.

¹³ Yaawä Jesuuquidiito cönä’döaacä ñäädä dhamäädö töwaamo’mongato wwä: —Änwojoocä; quee. Ñäädä cönänwojoi; dhamäädö aashicha cönä’döi yaawä, ijaatoono nönge mmaja.

¹⁴ Yaawä ñanno jaadiseeo cöneeja’caicho. Cöne’jummaicho yaawä Jesuuquidiito emaadö a’de’tädö wetä.

Isaía nimennä’jödö nönge Jesuuquidiito wei’jödö

¹⁵ Täma’se yeichöcoomo eta’jäcä Jesuuquidiito cöntämä yäätonno; jooje soto cönta’to chääjadä. Töwö cönaadoncaicho tameedä cädäija’como.

¹⁶ Töwö soto cönwätuuja’to täcaademe’jo’da yeichöcoomo wetä.

¹⁷ Töwö yääje cönä’döaacä chäänönge Isaía necammajäätö’jödö yä’dödö wetä, ñäädä Wanaadi wa’deuwödö ecammanei. Edääje Isaía cömmennäi:

¹⁸ Määdhä ñäädä yaanonö, öwö ne’tä’jödö. Umjummadö töwö; ta’cwaiñe wa chääjäcä. Epíiditu Santo ’je wödööa’de. Öwö ya’deddu necammajä’a’de Wanaadi dhowaanojöncomo wwä.

¹⁹ Töwö ätäccujäätö’da na’de, ätäuwö’da mmaja. Ewoodoicha’da na’de jataawä.

²⁰ Soto cudaata täcuumeto wa’taajä aiyonei töweiye naichöje’da yaanonö na’de; adhaawa änweijojöönö tunque’ca mma uncwe’canei töweiye naichöje’da mmaja. Yaawä jeene, wätämmencajootojo anooto awä jeene, töwö nichaana’ca’de.

²¹ Wanaadi dhowaanojöncomo wwäiñe nätääcanö’ja’de töwö; quee Isaía cömmennäi.

Odo’sha ’je Jesuuquidiito e’tä’jödö soto wwäiñe

²² Yääje mma yaawä ñanno soto odo’sha ’jano cönnejooto Jesuuquidiito wwadäädä. Ñäädä cönä’jaacä tänuuque’da, ta’deude’da mmaja. Jesuuquidiito cönaadoncai yaawä. Ñäädä cöna’deutai yaawä; cönäänu’täi chea.

²³ Soto cönääcatoncaicho yaawä; cönä’döa’to: —¿Ñäädä ca mä’dä Dawí weichö? quee cönä’döa’to Jesuuquidiito jäcä.

²⁴ Jaadiseeo cöneeta’to yääje ya’deuwödööcomo. Tönwanno cönä’döa’to: —Mä’dä dhanwa odo’shancomo tömja’canö’jo weneene Weesewú jäduudu que, ñäädä odo’sha edhaajotoncomo; quee cönä’döa’to.

²⁵ Jesuuquidiito dhowaanäcä cönä’jaacä chö’tajäätödööcomo. Töwö cönä’döaacä chäwwäiñe: —Yää jataawoncomo dea wewäänä’ta’comjäcä töwaatame mma ataamejai ñaato. Yää maa tawoncomo dea töwwäädäiñe yä’tu’de’ta’comjäcä, ei’cha yaawä.

²⁶ Mädääje mmaja Caajuushawa, töwwäädä yä’ja’canö’ja’jäcä, töwö dea nä’tu’de’ta yaawä. Yääje yeiya’jäcä ¿aaquene mmaja numa jäduuje eichö deeade’ ?

²⁷ ¿Weesewú jäduudu que ca odo’sha ija’canö’jodö mecaanö’ato öwwä? Yääje yeiya’jäcä, ¿änääcö jäduudu que tömja’canö’jo weneeneto osootoichomo änwanno? Yääje yeijäcä osootoichomo dea nene’ju’jaato chäänönge’da aweichöcoomo.

²⁸ Öwö mmaane odo’sha tömja’canö’jo wäänene ñäädä Wanaadi dö’sennoto Epíiditu Santo jäduudu que. Yääje yeijäcä odhoowanääcäiñe eijai ña Wanaadi acaajichaanaichomooje yä’dötoojoje yeichö.

²⁹ “ ¿Aaquene anejja omoomödööde’ jäduujato mmai chaca inshomaadö que enwajiña, imööjätöödö’jo’da mmädä? Imööjätöödö’jode inshomaadö adääjai ña.

³⁰ “Ñäädä jaadonoojönö, tu’de’tänei ñäädä. Ñäädä jaadä anaamu’jönö, töja’e mma nöja’a.

³¹ “Yääje yeijäcä yääje wä’döa äwwäiñe, tameedä soto cone’nadiiyöcoomo ätäncwanno’jojai ña, tameedä cone’da ya’deuwödööcomo mmaja. Epíiditu Santo jäcä cone’da wa’deunä mmaane ätäncwanno’jojai’cha na.

³² Ñäädä Soto nnedö jäcä conemjönö wa’deuwödö, choone’nadiiyö ätäncwanno’jojai ña. Epíiditu Santo jäcä conemjönö wa’deuwödö mmaane, choone’nadiiyö ätäncwanno’jo’da na’de, eduuwa weiñä naadawä, weiñä na’dedö awä mmaja.

Chääjedöödö jäcä dee ene’jutuudu

³³ “Dee aashichaato, aashicha chääjedöödö. Dee conemjönö ’quene, cone’da mmaja chääjedöödö. Chääjedöödö jäcä dee ene’jutuudu.

³⁴ Äcääyu nönga’como änwanno. Aaquene aashicha adha’deutädööde’, cone’daane aweiya’como. Tötö’tajäätödö nönge wa’deunä töweiye nai.

³⁵ Soto aashichaato aashicha na’deuwa, aashicha chö’tajäätödö weijäcä. Soto conemjönö mmaane cone’da na’deuwa, cone’da chö’tajäätödö weijäcä.

³⁶ Öwö yääje wä’döa äwwäiñe, wätämmencajootojo anooto awä tameedä soto nätääcamma’jajaato’de tameedä towoinchadäiñe töwa’deuwö’jocoomo jäcä.

³⁷ Awa’deuwö’jocoomo jäcä mätämmencajaato’de. Aashicha awa’deuwö’jocoomo weiya’jäcä chäänönga’comooje Wanaadi adhe’taato’de. Cone’da awa’deuwö’jocoomo weiya’jäcä mmaane, cone’da Wanaadi adhe’taato’de yaawä; quee cönä’döaacä Jesuuquidiito.

Soto conemjöncomo ene’ju’tojo tönnöjo yeichöcoomo

³⁸ Yääje mma yaawä anejjacoomo jaadiseeo, judhío owaanomannamo mmaja cönä’döa’to: —Owaanomanei, äwwä ene’ju’tojo tödöödö ene’se ñaa na; quee cönä’döa’to.

³⁹ Jesuuquidiito cöneccujä’acä; cönä’döaacä chäwwäiñe: —Soto conemjöncomo, masuuduija’como, ene’ju’tojo tödöödö ene’se weneeneto. Yääje yeichaame aneene’da naato’de. Joná wei’jödö mmaane nichö’tammecö’ña’to, ñäädä Wanaadi wa’deuwödö ecammanei’jödö.

⁴⁰ Joná cönä’jaacä na’cwacaano wenwaca aaduwaawä anooto, aaduwaawä coijaicho mmaja. Mädääje mmaja Soto nnedö na’de nono aca aaduwaawä anooto, aaduwaawä coijaicho mmaja.

⁴¹ Yaawä, wätämmencajootojo anooto awä, canno soto eduuwa naatoodö wätääcamma’jojoodawäiñe, tönwanno Niiniwe ñancomo’jödö wwä conemjöncomooje nätä’täjaato’de. Ñanno Niiniwe ñancomo tötö’tajäätödööcomo cönsa’duminchaicho Joná necammajäätödö etaadö’jo. Joná e’jodhaato’cä jaiñoone eetä na eduuwa.

⁴² Yaawä, wätämmencajootojo anooto awä mmaja, ñäädä wodi, shii weja’catoojo suda’wawoono cajiichaana mmaja conemjöncomooje ne’taato’dede canno soto eduuwa naatoodö, yäätäcamma’jojoodawäiñe. Ñäädä wodi amoinchenno cöneejä tösejjeque Saadomón wa’deuwödö eta. Saadomón e’jodhaato’cä jaiñoone eetä na eduuwa.

Odo’sha wennacaadö

⁴³ “Soto acanno odo’sha weja’ca’jäcä töwö näämannä’a nono sedejjato de’cäcä, töweejata’totoojo ujiiyancädä; aneedantä’daane.

⁴⁴ Aneedantä’da töweijäcä edääje nichö’tajä’a yaawä: “Iiña mmaja yennacaiyede, weeja’ca’jödö taca mmaja yoomomöiye;” quee. Yaawä iiña mmaja töwä’döa’jäcä täwöötö’jödö nedanta maa töseemeeca ñängajä eijai ñaadöje, töcoonecaajä’e mmaja, tädhaajäque’daane.

⁴⁵ Töwö nöta yaawä töjimmä wetäiñe. Aacä amoojato odo’shancomo nene’aato yaawä; cone’daiñe’cä jeene tönwanno. Yaawä tönwanno nomongaato ñäädä soto aca, töweejata’tädööcomo wetä. Yaawä ñäädä soto wecoone’maajä na awa’de töwei’jödö e’jodhe’cä jeene. Mädääje nä’döaato’de canno soto conemjöncomo, eduuwa naatoodö.

Jesuuquidiito dhenö weejö’jödö, dhacontomo mmaja

⁴⁶ Soto wwäiñe Jesuuquidiito wa’deutaame dea yeenö cöneejoto dhacontomo jadä. Tönwanno jödo’na cönä’ja’to; Jesuuquidiito jadä töwa’deuwö’se cönä’ja’to.

⁴⁷ Anejja cönä’döaacä Jesuuquidiito wwä yaawä: Aanö, adhaacontomo mmaja jödo’na naato; äwwä töwa’deuwö’se naato; quee.

⁴⁸ Töwö Jesuuquidiito cönä’döaacä ecammanei’jödö wwä: —¿Änääcö ñäädä aanö, quee ’ja? ¿Änä’camo ñanno adhaacontomo, quee’ja?

⁴⁹ Yaawä tönoowanoomadö wwadäädäiñe cöneenejoi; cönä’döaacä: —Canno ñanno maama, yaacontomo mmaja.

⁵⁰ Ñäädä Jaaja caju ñano woije tödöönei, ñäädä ñäädä yaacono, jaaduichö mmaja, maama mmaja; quee cönä’döaacä Jesuuquidiito.