MATEO 10 - Wanaadi A'deddu

Amoojadooto de’wä aaco’como anonta’como

¹ Yääje mma yaawä Jesuuquidiito cöna’dejjaicho tönoowanoomadö, ñanno amoojadooto de’wä aaco’como. Chäwwäiñe cuntui ijääduduucomo, odo’shancomo ija’canö’joto’como, tameedä cädäi ejiichö’totoojo mmaja, tameedä se’nato ejiichö’totoojo mmaja.

² Edä yää ñanno amoojadooto de’wä aaco’como anonta’como eetöcoomo: Awa’de Simón, Peedhodooje mmaja töwö chäätö; yää ’jeje dhacoono Antedé; yää ’jeje Jacoowo, ñäädä Seewedheeo nnedö; dhacoono Juan mmaja;

³ Jediipe mmaja; Waadotoodomé mmaja; Tomá mmaja, Mateo mmaja, ñäädä acu’shänä jödaatai i’jummanei’jödö; Jacoowo mmaja, Aadeujeeo nnedö; Deweo mmaja, ñäädä Tadheo täätö mmaja;

⁴ Simón mmaja, ñäädä jäduujato wa’deuwödö; Juudha Icaadiyoote mmaja, ñäädä Jesuuquidiito u’nei’jödö.

Ecammajä’e tönoowanoomadö anonto’jocoomo Jesuuquidiito wwä

⁵ Ñanno amoojadooto de’wä aaco’como Jesuuquidiito cönaanontoicho; edääje töwö cönwätuujaicho: —Judhíojöncomo jataacäiñe mma mötäätäi’che. Samaadiya ña mma mötäätäi’chede.

⁶ Iisadaaediitacoomo döiñaiñeene ojoncomo. Tönwanno naato oweeja yännanö’a’como nönge.

⁷ Edääje ecammajä’täcä’de: “Amoinche’da nä’döi eduuwa Wanaadi acaajichaanaichomooje yä’dötoojo;” quee caichäcä’de.

⁸ Cädäija’como adoncatääcä’de, woi ’ja’como mmaja, äqueejö mmaja. Odo’sha ija’canö’jotääcä’dede. Täje’da mädä tödöötojo äwwäiñe nä’tua; täje’da mmaja u’täcä’de änwanno.

⁹ “Oodo, jödaata mmaja, anejja yää nöngato mmaja, manaadätäi’che.

¹⁰ Acanwaichomo mmaja manaadätäi’chede. Tooni mma owoomöcoomo anaadätääcä’de, aacä’da. Tösaajatuiche’da mma ojoncomo’de, adhe’sejiichomo tadä’da mmaja. Tadaawaaju tödöönei ätääwashinchä’da’da töweiye nai.

¹¹ “Jataaca äwä’döa’comjäcä aneedantätääcä’de soto aashichaato. Ñäädä mmai chaca eichäcä’de aneiñaja äätädööcomo wa’cä.

¹² Chä’saca owoomonga’comjäcä chaawoncomo a’dejjatääcä’de; “Aashicha awei’sheiñe ñaa na;” quee caichäcä’de.

¹³ Yäätä soto aashichaato töweiye yeiya’jäcä, yää aashicha yeicho’como mecammaato’dedö chäwwä nä’tua’de. Aashicha’da yeiya’comjäcä mmaane äwwäiñeene nä’tua’de.

¹⁴ Aashicha ayöödötäiñe’da yeiya’comjäcä, aneecammajäätödööcomo eta’se’da yeiya’comjäcä mmaja, yää maa tacanno ojoncomo’de, yää jataawonno jeiñe mma; ä’juduucomo she’secaadöje mma ñäntäcä’de.

¹⁵ Chäänönge yääje wä’döa äwwäiñe, tönwanno imaaminchadööcomo jooje’cä na’de yaawä wätämmencajootojo anooto awä, Sodhooma ñancomo maminchadööcomo e’jodhe’cä, Comooda ñancomo maminchadööcomo e’jodhe’cä mmaja.

Yeetunu eneetojo

¹⁶ “Öwö manaanontaato eduuwa. Änwanno maato’de oweeja mado antawäiñe eijai ñaatoodöje. Yääje yeijäcä odhoowadäädäiñe eichäcä’de, äcääyu töweiye naichöje, tääde’cwade’daane, jaduuma weichö nöngeene.

¹⁷ Äädai’chätääcä’de soto jäcäiñe. Tönwanno ayu’ato’de äcamma’jonnamo wwäiñe. Töwe’jummato’como taca adhaiju’jä’ato’de.

¹⁸ Cajiichaanacoomo wwadäädä jadä’jödöödä adhaadäaato’de, acu’shänä wwadäädä mmaja, sootoije aweichöcoomo jo’tädööje. Mädääje ya’deddu ecammajä’jai maato chäwwäiñe, Wanaadi dhowaanojöncomo wwäiñe mmaja.

¹⁹ Yaawä äcamma’jonnamo wwä ayuutudaawäiñe, mätäncano’tätäi’che awa’deuto’como jäcä, äwwäiñe ecammajo’tojo jäcä jeiñe mma. Äwwäiñe eccujo’tojo cu’nädö aca yä’döa’jäcä Wanaadi nu’a’de awa’deuto’como.

²⁰ Änwannojöönööne adha’deuwato’de, Epíiditu Santoone na’deuwa’de äntaiñe, ñäädä Oomotoncomo dö’sennoto.

²¹ “Yaawä töjimmotoncomo jadä’jödöödä soto nu’aato’de emaadö wetä. Yuumötoncomo tönnacontoncomo nu’aato’dede; mudeeshi mmaja tumöötoncomo nu’aato’de, senöötoncomo mmaja, yäämadö wetä.

²² Tameedä soto aquiiñeme’cato’de sootoije aweichöcoomo jo’tädööje. Ñäädä yaatameedö jonaane shinchänei nääwanaaca’de.

²³ Anejja jataawä amaamincha’comjäcä, äänejeetäcä’de aneetaja. Chäänönge yääje wä’döa, tameedä iisadaaediitacoomo jataadöcoomo mämja’dä’tä’dadä Soto nnedö ne’a’de.

²⁴ “Towaanomaamö towaanomaanei e’jodhe’da töweiye nai. Dhanoonö tädhaajä e’jodhe’da töweiye nai chea.

²⁵ Ñäädä towaanomaamö towaanomaanei weichö nönge töwä’dödö mma ijummajai ñai, cho’jodheene’daane. Chäänönge mmaja dhanoonö, tädhaajä weichö jäcä daja. Ñanno soto Caajuushawaaje chäädhajootoncomo cöne’toicho; töwaacö’je mma shootoi cone’da e’täjai ñaato.

Wanaadi mma ñontäjai cöweichöcoomo

²⁶ “Yääje yeijäcä soto mma monnontätäi’che. Tameedä tacaademjönö töweecataamöje na. Tameedä etoone’taajä töwääcatu’nacaamöje na dea.

²⁷ Yää tööjano’taca äwwäiñe töneecammajä’e wääneneedö, ecammajä’täcä’de tawaanato aca. Yää tacaade’da aneeta’jocoomo, tätaane ecammajä’täcä’de tameedä soto e’sadööcomo waadäi.

²⁸ Aji’jä emaanei monnontätäi’che; odo’tadö emaajai’cha na töwö. Ñäädääne ñontäjai maato, odo’tadö jadä’jödöödä wa’to nwaca adheemajaichoone.

²⁹ “ ¿Täje’da jönca tunu’e weneeneto aacä tadiiñaamo’cä? Tooni jödaata’cä mmädä chääje’jödööcomo. Yääje yeichaame Oomotoncomo wwä tacaade’da ääma’da töweiye naicho tönwanno.

³⁰ Wanaadi dhowaanäcä tameedä aweichöcoomo, äju’jädööcomo jadä’jödöödä töme’cu’tä na chäwwä.

³¹ Yääje yeijäcä tosaade’da eichäcä Änwanno tujunne maato Wanaadi wwä, jooje tadiiñaamo e’jodhe’cä.

Soto netaadöcoomoje Jesuuquidiito ecammajä’nnamo

³² “Ñäädä soto netaadöcoomoje töjöiye’da yeecammajä’nei, öwö mmaja Jaaja wwä töjöiye’da wecamma’dede jaadonooje yeichö.

³³ Ñäädä soto netaadöcoomoje joome’dänei mmaane, öwö mmaja wijoome’da’dede Jaaja caju ñano wwä.

Jesuuquidiito jo’tädööje wä’tu’de’täjoonä

³⁴ “Edä nono de’wä täncanoode’da weiñä ene’e we’aatäi mma maneecanö’täi’che. Täncanoode’da weiñä ene’e’daane we’ne, wänä ajäntojoone.

³⁵ Öwö jo’tädööje anejja dhanwa tumö nichu’de’ta’de, anejja wodi senö nichu’de’ta’dede. Ijaadaana mmaja töwo’jödö acä nä’tu’de’taato’de.

³⁶ Mädääje na; töwä’jimmä’tädö jadä dea mma nä’tu’de’taato’de.

³⁷ “Ñäädä öwö jummadö e’jodhe’cä tumö, senö ijummanei, sootoije eijai’cha na. Ñäädä öwö jummadö e’jodhe’cä tönnedö ijummanei, sootoije eijai’cha mmaja.

³⁸ Ñäädä jaadä töweichö wetä öwö jääcäinchädä äntunaanö’jaichojöönö, cuduusa jäcä äämajaichojööno mmaja, sootoije eijai’cha na.

³⁹ Ñäädä töweichö ewontänei, töweichö nennanö’ca’de. Ñäädä öwö jääcäinchädä töweichö u’nei mmaane, töweichö neneea’de.

Wääjemaajonä

⁴⁰ “Ñäädä aashicha ayöödöneichomo, aashicha yöödöa dea. Ñäädä aashicha yöödönei, aashicha yaanontänei’jödö tödöödö wa’cä mmaja na dea yää.

⁴¹ Ñäädä Wanaadi wa’deuwödö ecammanei aashicha tödöönei, Wanaadi anoonöje yeichö jäcäinchädä, Wanaadi wa’deuwödö ecammanei ejeemadö nönge dea nääjemaaja’de. Ñäädä soto aashichaato aashicha tödöönei, aashichaatoje yeichö jäcäinchädä, soto aashichaato ejeemadö nönge dea nääjemaaja’de.

⁴² Ñäädä tooni sunuuji’chä mmädä mäccö mmädä wocöödö u’nei’jödö töweiye na’de chääje’jödö, öwö sootoije yeichö jäcäinchädä u’a’jäcä; quee cönä’döaacä Jesuuquidiito tönoowanoomadö wwäiñe.