MATEO 1 - Wanaadi A'deddu

Jesuuquidiito adai’chomo’jödö

¹ Edä yää jajeeda imennaajä, Jesuuquidiito adai’chomo’jödö eetöcoomo. Jesuuquidiito cönä’jaacä Dawí weichö, Aawadán weichö mmaja.

² Aawadán nnedö cönä’jaacä Isaaca. Isaaca nnedö cönä’jaacä Jacoowo. Jacoowo nnacoomo cönä’ja’to Judhá, yuichomo mmaja, dhacoono mmaja.

³ Judhá nnacoomo cönä’ja’to Jaade, Saada mmaja; yeenötoncomo cönä’jaacä Tamaada. Jaade nnedö cönä’jaacä Eesedón. Eesedón nnedö cönä’jaacä Adaama.

⁴ Adaama nnedö cönä’jaacä Amiinadhaawa. Amiinadhaawa nnedö cönä’jaacä Naasón. Naasón nnedö cönä’jaacä Saadamón.

⁵ Saadamón nnedö cönä’jaacä Wooso; Wooso dhenö cönä’jaacä Dajaawa. Wooso nnedö cönä’jaacä Oweede; Oweede dhenö cönä’jaacä Duuti. Oweede nnedö cönä’jaacä Isaí.

⁶ Isaí nnedö cönä’jaacä cajiichaana Dawí. Cajiichaana Dawí nnedö cönä’jaacä Saadomón; Saadomón dhenö cönä’jaacä Udía jiñamomjödö.

⁷ Saadomón nnedö cönä’jaacä Doowowán. Doowowán nnedö cönä’jaacä Awía. Awía nnedö cönä’jaacä Aasa.

⁸ Aasa nnedö cönä’jaacä Joosajaata. Joosajaata nnedö cönä’jaacä Jodaama. Jodaama nnedö cönä’jaacä Usía.

⁹ Usía nnedö cönä’jaacä Jotaama. Jotaama nnedö cönä’jaacä Acaasa. Acaasa nnedö cönä’jaacä Eesequía.

¹⁰ Eesequía nnedö cönä’jaacä Maanaseesa. Maanaseesa nnedö cönä’jaacä Amón. Amón nnedö cönä’jaacä Josía.

¹¹ Josía nnacoomo cönä’ja’to Jeeconía, dhacontomo mmaja. Ñäädä Jeeconía cönennui Waawidooniya ña jedeesoje iisadaaediitacoomo wataadojoodawäiñe.

¹² Yää ’jeje Jeeconía nnedö cönennui, Sadaatiyeedeje töwö chäatö. Sadaatiyeede nnedö cönä’jaacä Sodoowaweede.

¹³ Sodoowaweede nnedö cönä’jaacä Aawiyuudu. Aawiyuudu nnedö cönä’jaacä Eediyaquín. Eediyaquín nnedö cönä’jaacä Asoodo.

¹⁴ Asoodo nnedö cönä’jaacä Sadhooco. Sadhooco nnedö cönä’jaacä Aquín. Aquín nnedö cönä’jaacä Eediyuudu.

¹⁵ Eediyuudu nnedö cönä’jaacä Edeeasaada. Edeeasaada nnedö cönä’jaacä Matán. Matán nnedö cönä’jaacä Jacoowo.

¹⁶ Jacoowo nnedö cönä’jaacä José. Ñäädä José cönä’jaacä Madía ño, Jesuuquidiito dhenö ño, ñäädä Äwaanacaaneije tä’täämö.

¹⁷ Mädä wa’cä cönä’ja’to ñanno Aawadán atöödö; amoojadooto de’wä aacäichea iju’jä cönä’ja’to Aawadán jonno Dawí jona tödööene. Amoojadooto de’wä aacäichea iju’jä mmaja cönä’ja’to Dawí jonno Waawidooniya ña iisadaaediitacoomo wataadojo’jocoomo jona tödööene. Waawidooniya ña yaatadoojo’jocoomo jonno Jesuuquidiito wennudu jona tödööene cönä’ja’to amoojadooto de’wä aacäichea iju’jä mmaja.

Jesuuquidiito wennu’jödö

¹⁸ Edääje Jesuuquidiito cönennui: Yeenö Madía cönä’jaacä José jadä töwä’döeemöje, töwäätäcamma’jo’jocoomo weijäcä. Yö’tä ä’dö’dadä Madía cönwensu’täi, Epíiditu Santo woije.

¹⁹ Dhanwa aashichaato José cönä’jaacä, ñäädä iiño; Madía cone’da ecaademe’jo’se’da cönä’jaacä. Tacaade’da mmaane e’nomja’se cönä’jaacä.

²⁰ E’nomjadö jäcä chö’tajäätödaawä Cajiichaana amoodedö cönäänejoi chäwwä, iwäänetöödö ai; cönä’döaacä: —Amäädä José, Dawí weichö, ajiiñamooje Madía tödöödö mma monnontäi. Epíiditu Santo woijato wamoodetaajä ñäädä iiñedö, töwennueemöje naadö.

²¹ Iiñedö nennua’de, dhanwa’cä, Jesuuquidiitoje e’täcä’de. Töwö mädääje nätä’täja’de choone’nadiiyöcoomo jonno tösootoi ewaanacaaneichomooje töweiyemööje töweijäcä; quee cönä’döaacä amoode.

²² Tameedä yää cönä’jaacä Cajichaana a’deddu nönge yeichö wetä, yää Wanaadi wa’deuwödö ecammanei cöneecammaichö:

²³ Dhanwa acä eijönö niwensu’ta’de; iiñedo nennua’de; Emanweedaje nätä’täja’de; quee cöneecammaichö. Wanaadi cöjaadäiñe na; quee töwä’dö’se yeichö mädä Emanweeda, quee naadö.

²⁴ Tönöcöödö jonno José wä’jäa’jäcä, töwö töjiiñamooje Madía cönnöi, Cajiichaana amoodedö wa’deuwö’jödö nönge.

²⁵ Chäänawä ei’cha töweiye cönä’jaacä yaawä iiñedö awa’deeto wennudu wa’cä. Jesuuquidiitoje cöne’täi yaawä.