MAADOCO 9 - Wanaadi A'deddu

¹ Edääje mmaja Jesuuquidiito cönä’döa’dea chäwwäiñe: —Chäänönge yääje wä’döa äwwäiñe, dhantai eetä maatoodö äwäämadööcomo owaajo meneeato’de töjäädudu que Wanaadi cajiichaanaje yäänejoodö; quee cönä’döaacä Jesuuquidiito.

Jesuuquidiito wenwacaama’jödö

² Tooni amoojato anoototo ai Jesuuquidiito töjaadä cönaadäi Peedhodo, Jacoowo mmaja, Juan mmaja; töjääcäjeeneiñe cöntonto jöö cawooto de’cäi. Yäätä töwö Jesuuquidiito anejjeja cönenwacaamai dhowaadäädäiñe.

³ Yoomö weijotä cönä’döi, tajääde’de, wadeecu wa’cä, camiisha choccajä’nei nichoccadö e’jodhe’cä tajääde’de yeichö.

⁴ Yaawä Jesuuquidiito nowaanomaadö owaadäädäiñe cönäänejoicho Edía, Moisé mmaja; Jesuuquidiito jadä cöna’deujä’a’to.

⁵ Yaawä Peedhodo cönä’döaacä Jesuuquidiito wwä: —Owaanomaanei, aashicha eetä caato. Ämmaichomo ñaa nanaamo’ñojo, aaduwaawä; tooni amäädä ämmai, tooni mmaja Moisé mmai, tooni mmaja Edía mmai; quee.

⁶ Peedhodo yääje cönä’döaacä töwa’deutojo ’je’da yeijäcä, jooje töwääcatonca töweichomjäcä.

⁷ Ca’dutu cöneejä yaawä immai’chäiñe. A’deu cönäätaacä yaawä ca’dutu do’taca: —Önnedö umjummadö mä’dä; dha’deddu etaatäcä; quee cönäätaacä.

⁸ Yaawä töwääje’duca’comjäcä töjääcäjeeneiñe cönäädantoicho ñanno Jesuuquidiito nowaanomaadö; Jesuuquidiito mma chääjadäiñe cönä’jaacä.

⁹ Yaawä jöö daca töwä’tädaawäiñe Jesuuquidiito cönä’döaacä chäwwäiñe: —Aneene’jocoomo maneecammajä’täi’che soto wwäiñe töwäämaajo jonno Soto nnedö waadoncadö wa’cä; quee cönä’döaacä.

¹⁰ Yääje yeijäcä ñoowanoomadö töwwäädäiñe mma cönnöicho yää. Tönwannoje dea töwäätäcamma’jo cönä’ja’to: —¿Aaquene töwä’dö’se yeichö mädä “töwäämaajo jonno waadoncanä”, quee cönä’döa’dö? quee töwäätäcamma’jo töweiye cönä’ja’to.

¹¹ Yaawä tönwanno Jesuuquidiito cöneecamma’joicho: —¿Ane’que’nei owaanomannamo awa’de Edía we’tojo töneecamma weneeneto? quee cönä’döa’to.

¹² Töwö cöneccujä’a’to; cönä’döaacä chäwwäiñe: —Chäänöngato mädä; Edía awa’de ye’tojo na, tameedä choonecaaneije. Öwö, Soto nnedö, jääcä imennaajä töweiye na, yää wäntunaanö’tojo jäcä, wä’quiiñeme’jotoojo jäcä mmaja.

¹³ Yääje wä’döa äwwäiñe, Edía cöneejä deeade’; tumjummadööcomo woije mma soto cönnöicho, chääjäcä töweeja’dä’emö Wanaadi a’deddu imennaajä jäcä naadöje dea; quee cönä’döaacä Jesuuquidiito.

Mude’cä’cä odo’sha ’jano adonca’jödö

¹⁴ Yää ’jeje tönoowanoomadö döiñaiñe töwennaca’comjäcä Jesuuquidiito cöneedantoicho jooje soto dhawoodhecääcäiñe. Judhío owaanomannamo yäätä cönä’ja’to dea, Jesuuquidiito nowaanomaadö jadäiñe wätäccujä’näje.

¹⁵ Soto wwäiñe Jesuuquidiito eneea’jäcä ta’cwaiñe cönä’ja’to yaawä. Chäwwadäädä cöneeca’tömöicho yaawä, a’dejjadö wetä.

¹⁶ Yaawä Jesuuquidiito cöneecamma’joicho: —¿Ane’cäämö jäcä chääjadäiñe mätäccujä’ato? quee cönä’döaacä.

¹⁷ Tooni dhanwa, yäätä cönä’ja’dö, cönä’döaacä: —Owaanomaanei, äwwadäädä önnedö weneejä, dhanwa’cä, odo’sha ana’deudeme’jojöönö ’jano.

¹⁸ Chääjäcä odo’sha weichawä nono jo töneemajo weneene. Tönta’donta yaawä määdhä önnedö, tödheedö täu’cwe mmaja. Mädääje jo’wadootoje nijääduque’a. Onoowanoomadö wwäiñe wija’canö’jojannö’je; a’que noneejaicho; quee cönä’döaacä ñäädä dhanwa.

¹⁹ Yaawä Jesuuquidiito cönä’döaacä chäwwäiñe: —Mädä wa’cä aneecamjö’da maato. ¿Ä’waasa’cäne mma numa ajaadäiñe wei’she maato? Numa dajaane wä’döi äshinchädööcomooje. Sadäädä ene’täcä mä’dä mude’cä’cä; quee cönä’döaacä Jesuuquidiito.

²⁰ Tönwanno cönnejooto yaawä chäwwadäädä. Yaawä Jesuuquidiito eneea’jäcä odo’sha wwä töwö mude’cä’cä cöneenönnäi’chäi. Ñäädä mude’cä’cä cöne’ducai yaawä nono jo. Tönta’dontancädä cönaawotönnajä’acä.

²¹ Yaawä Jesuuquidiito yuumö cöneecamma’joi: —¿Ächännauwä’cä yaajäntä’jödö mädä? quee cönä’döaacä. Yuumö cönä’döaacä yaawä: —Mude’cä’cäje yeichö jonnoto’jödöödä mädääje na.

²² Aneedawä wa’to nwaca odo’sha töneemajo weneene, na’cwaca mmaja, emaadö wetä. Adoncajai aweiya’jäcä wentumje ñaa eneecä; ñaa ’wa’täcä; quee cönä’döaacä ñäädä mude’cä’cä umö.

²³ Jesuuquidiito cönä’döaacä chäwwä: —Ecaanö’jai aweiya’jäcä, tameedä töwä’döe ñäädä ecaanö’nei wwä; quee Jesuuquidiito cönä’döaacä.

²⁴ Yaawä mude’cä’cä umö töcä’de cöna’deuwöi; cönä’döaacä: —Wecaanö’a; cö’wa’täcä chäänönge jeene wecamjöiye; quee.

²⁵ Yaawä töwwadäädä jooja’como soto we’jummadööcomo eneea’jäcä Jesuuquidiito odo’sha cöneuwöi; cönä’döaacä: —Odo’sha ana’deudeme’jojöönö, aneetajoojönö mmaja, yääje wä’döa äwwä, dhacanno adheeja’cacä. Dhaca mmaja yää ’jeje odhoomomöi’chede; quee cönä’döaacä.

²⁶ Yaawä ñäädä odo’sha cöncä’tömöi, ñäädä mude’cä’cä tumjunne’da cöneenönnäi’chäi chea yaawä. Dhacanno cöneeja’cai yaawä, acoichamjödö’jo. Yääje yeijäcä töwääma yeiyaatäi soto cöneecanö’a’to.

²⁷ Yaawä dhamäädö jäcä Jesuuquidiito cönaajäi, annäjöödö wetä. Ñäädä cönammöi yaawä.

²⁸ Yääje mma yaawä ä’saca Jesuuquidiito womonga’jäcä töudäje ñoowanoomadö cöneecamma’joicho: —¿Ane’que’nei ija’canö’jojai’cha ñaa nä’jaanä; quee cönä’döa’to.

²⁹ Jesuuquidiito cönä’döaacä chäwwäiñe: —Yääjato odo’sha töweeja’ca nai Wanaadi wwä wa’deuwö’jä queede, wäänema’jä queede mmaja; quee cönä’döaacä Jesuuquidiito.

Töwäämatoojo jäcä Jesuuquidiito necammajäätö’jödö mmaja

³⁰ Yaawä yäätonno tööta’comjäcä Caadideea chäcä cöneeja’dätoicho. Jesuuquidiito töwääcadeeme’jojo’se’da cönä’jaacä soto wwäiñe.

³¹ Töwö tönoowanoomadö cönoowanooma’to; cönä’döaacä chäwwäiñe: —Öwö, Soto nnedö, wä’tuja’de soto wwäiñe. Tönwanno yeemaato’de yaawä. Aaduwaawä anoototo ai waadonca’de wäämaajo jonno; quee cönä’döaacä chäwwäiñe.

³² Ñoowanoomadö dhowaanäcäiñe’da cönäätaacä yääje ya’deuwödö. Tönwanno tösaade cönä’ja’to, yää jäcä ecamma’jo’se’da.

¿Änääcö o’jodhe’cä nai?

³³ Yääje mma yaawä Cajeedamu ña cönä’döicho. Ä’saca töweichöcoomo Jesuuquidiito tönoowanoomadö cöneecamma’joicho: —¿Ane’cäämö jäcä mätäccujä’ato ääma tai cöweejödaawäiñe? quee cönä’döaacä.

³⁴ Tönwanno äucwätä’da cönä’ja’to, “ ¿änääcö cantawäiñe o’jodhe’cä nai?” queeto jäcä töwäätäccujäätö’jocoomo weijäcä ääma tai töweejödaawäiñe.

³⁵ Yaawä Jesuuquidiito cönaatajiimai; tönoowanoomadö cöna’dejjaicho, ñanno amoojadooto de’wä aaco’como. Töwö cönä’döaacä chäwwäiñe: —Ñäädä cajiichaanaje töwei’shato tameedä dho’noncomooje eijai ña, tameedä soto anoonöcoomoje mmaja; quee cönä’döaacä.

³⁶ Yaawä mude’cä’cä cönnöi dhantawäiñe; tänaawä tödöödö’jo töwö cönä’döaacä tönoowanoomadö wwäiñe:

³⁷ —Ñäädä öwö jääcäinchädä määdhä mude’cä’cä nöngato aashicha tödöönei, öwö mmaja aashicha yöödöa dea. Ñäädä aashicha yöödönei, öwö mma’da aashicha yöödöa, yaanontänei’jödö mmajaane; quee cönä’döaacä Jesuuquidiito.

Cutu’dedööcomoojönö cö’wa’täneichomooje yeichö

³⁸ Yääje mma yaawä Juan cönä’döaacä Jesuuquidiito wwä: —Owaanomaanei, soto ñaa cöneeneaacä adhe’tancädä odo’shancomo ija’canö’jodööje. Chäwwä yääje ännöjo’da ñaa cöneiyacä cöjaadoncomoojönööje yeijäcä.

³⁹ Yaawä Jesuuquidiito cönä’döaacä chäwwäiñe: —Ännöjo’da’daane eichäcä’de. Öwö yeetö joi täneemö tödöönei’jödö öwö jääcä cone’da a’deujai’cha na yää ’jeje.

⁴⁰ Ñäädä cutu’dedööcomoojönö cö’wa’täneichomooje na.

⁴¹ Ñäädä Quidiito sotoije aweichöcoomo jäcäinchädä tooni sunuuji’chä mmädä owoocödööcomo u’nei’jödö töweiye na’de chääje’jödö, öwö yeetö joi u’a’jäcä.

Soto shaadijannä’cannamo

⁴² “Ñäädä mude’cä’cä yeecanö’nei shaadijannä’canei täju ijöncäcä tö’wadö’tämje yei’jödö na, dama sö’jato ’cwaca emaadöje mma.

⁴³ Adhaamädö nödöödö woije asaadijanga’jäcä acä’cä. Aashicha eijai ña ijaatoonomjödö mma adhaamädö caju ña äätädö; cone’da eijai ña a’nädäncädä adhaamädö weichaame wa’to töwäätunque’emjönö nwaca äätädo.

⁴⁴ Dhacöödö ääma’da iiña, wa’to unqueejö’da mmaja, yeichöje.

⁴⁵ Ä’judu wötäädö woije asaadijanga’jäcä, acä’cä. Aashicha eijai ña ijaatoonomjödö mma ä’judu caju ña äätädö; cone’da eijai ña a’nädäncädä ä’judu weichaame wa’to töwäätunque’emjönö aca äwäätämaajodö.

⁴⁶ Dhacöödö ääma’da iiña, wa’to unqueejö’da mmaja, yeichöje.

⁴⁷ Adheenudu nene’madö woije asaadijanga’jäcä u’cacä. Aashicha eijai ña ijaatoonomjödö mma adheenudu Wanaadi jataacäi äätädö; cone’da eijai ña a’nädäncädä adheenudu weichaame wa’to töwäätunque’emjönö aca awäätämaajodö.

⁴⁸ Dhacöödö ääma’da iiña, wa’to unqueejö’da mmaja, yeichöje.

⁴⁹ “Tameedä soto wa’to que necoonecaato’de, saayu que äwanshi choonecaadö töweiye naichöje. Tameedä saaquidiijiisiyo mmaja saayu que necooneca’dede.

⁵⁰ Aashicha saayu töweiye nai. Yaawääne’, dha’cwötöödö wataamea’jäcä, ¿aaquene ma’cwötöömaiyede yaawä? Saayu ’je eichäcä änwannoje dea, ta’cwaiñe eichäcä ajimmotoncomo jäcäiñe; quee cönä’döaacä Jesuuquidiito.