MAADOCO 6 - Wanaadi A'deddu

Naasade ña Jesuuquidiito wei’jödö

¹ Yääje mma yaawä Jesuuquidiito cönääma’täi yäätonno; töjaatacäi cönennacai. Ñoowanoomadö chääjadä cöntonto.

² Yaawä wäädeetatoojo anooto awä töwö soto cönoowanooma’to judhío we’jummato’como taca. Dhantai etannamo’jödö cönääcatoncaicho; cönä’döa’to: —¿Äsha mädä wa’cä mä’dä cönoowanoomai chea? ¿Aaquene mädä wa’cä töseedujä’ne nai? Mädä wa’cä täneemö nödööaadö naane’.

³ ¿Ñäädäjöönö ca määdhä jatuuwa döjä’nei? ¿Yeenö jönca Madía, dhacontoncomo Jacoowo, José mmaja, Juudha mmaja, Simón mmaja? ¿Tameedä jönca cöjaadäiñe naicho ijaadui’chomo? quee cönä’döa’to soto. Tönwanno cone’da cönä’ja’to chääjäcä.

⁴ Yaawä Jesuuquidiito cönä’döaacä chäwwäiñe: —Aneiñajancomo Wanaadi wa’deuwödö ecammanei aashicha tönnöe naicho. Ijaatawoncomo mmaane tönquiiñeme’que, yä’jimmä’tädö mmaja; quee cönä’döaacä.

⁵ Yäätä täneemö tödööjai’cha töwö cönä’jaacä. Äächädä mma cädäija’como cönaadoncaicho, tamäädö ye’wäiñe tödöödö que.

⁶ Töwö cone’da cönä’jaacä aneecamjö’da soto weichomjäcä. Yaawä töwö cönäämannä’acä jata amoinchemjönö waadäi, soto owaanomancädäiñe.

Ecammajä’e tönoowanoomadö anonto’jocoomo Jesuuquidiito wwä

⁷ Yääje mma yaawä Jesuuquidiito cöni’jummaicho tönoowanoomadö, ñanno amoojadooto de’wä aaco’como. Aacäi cönaanontoicho. Töwö cuntui chäwwäiñe ijääduduucomo, odo’shancomo ija’canö’joto’como.

⁸ Töuwaque’da töwö cönaanontoicho; chä’sejiichomo mma cönaadojoi. Chanwaichomo anaadojo’da cöneiya’dea, yuduucomo, ijöödataichomo anaadojo’da mmaja.

⁹ Yää dea mma, shaajatuichomooje cönä’ja’dö dea mma, cönaadojoi chäwwäiñe, yoomöcoomo tooni mma, aacä’da.

¹⁰ Töwö cönä’döaacä chäwwäiñe: —Maa taca owoomonga’comjäcä yäätä eichäcä’de aneiñaja äätädööcomo wa’cä.

¹¹ Anejja jataawoncomo aashicha ayöödötäiñe’da yeiya’comjäcä, aneecammajäätödööcomo eta’se’da yeiya’comjäcä mmaja, yäätonno ojoncomo’de, ä’juduucomo she’secaadöje mma, eta’se’da yeichöcoomo ene’ju’tojooje. Chäänönge yääje wä’döa äwwäiñe, tönwanno imaaminchadööcomo jooje’cä na’de yaawä wätämmencajootojo anooto awä, Sodhooma ñancomo maminchadööcomo e’jodhe’cä, Comooda ñancomo maminchadööcomo e’jodhe’cä mmaja; quee cönä’döaacä Jesuuquidiito tönoowanoomadö wwäiñe.

¹² Ñanno cöntonto yaawä. Edääje töneecammajä’e cönä’ja’to soto wwäiñe: —Aweichöcoomo sha’duminchatääcä; quee.

¹³ Tönwanno jooje odo’shancomo tömja’canö’jo töweiye cönä’ja’to; cädäija’como töneejichö’täiñe cönä’ja’to dea, shimi che shiimi’jancädäiñe.

Juan Wautiita wääma’jödö

¹⁴ Yääje mma yaawä cajiichaana Edoodhe cöneetaacä Jesuuquidiito ecaadö, tameedä yeichö wa’cä tacaade yä’dö’jödö weijäcä. Töwö Edoodhe cönä’döaacä: —Juan Wautiita ñäädä, töwäämaajo jonno yaadoncaajä. Yääje yeijäcä jooje täneemö tönnöe weneene; quee cönä’döaacä.

¹⁵ Anejjacoomo ’quene töwä’döe cönä’ja’to: —Edía ñäädä; quee. Anejjacoomo mmaane töwä’döe cönä’ja’to: —Wanaadi wa’deuwödö ecammanei ñäädä, jenaado’jocoomo cönä’ja’todööje mmaja; quee.

¹⁶ Jesuuquidiito ecaadö eta’jäcä Edoodhe wwä, töwö cönä’döaacä: —Juan ñäädä, wijöncä’joneedö; töwäämaajo jonno cönaadoncai; quee.

¹⁷ Edoodhe yääje cönä’döaacä töwwä Juan jedeesoje tödööjo’jödö weijäcä, cadheena que imiijo’jödö weijäcä mmaja. Töwö yääje cönnöi Edoodhía woije, ñäädä tacoono Jediipe jiñamo. Töwö Edoodhe ñäädä Edoodhía cönnöi töjiiñamooje.

¹⁸ Edääje Juan Wautiita töwä’döe cönä’jaacä Edoodhe wwä: —Cone’da mädä adhaacono jiñamo dö’tä aweichö; quee.

¹⁹ Yää jo’tädööje ñäädä Edoodhía Juan cuntu’de’taacä jooje; emaajo’se cönä’jaacä. Emaajojai’chaane cönä’jaacä,

²⁰ Juan tönnontä Edoodhe weijäcä. Töwö Edoodhe dhowaanäcä cönä’jaacä aashicha Juan weichö, chäänöngatooje yeichö mmaja. Yääje yeijäcä Edoodhía wwä töneewontä cönä’jaacä. Towaanäcä’da Juan necammajäätödö wäätataame Edoodhe eta’se dea töweiye cönä’jaacä.

²¹ Äcuude yaawä Edoodhía woojo’totoojo cu’nädö cönoojodöi. Töwennu’jödö anootoi’chädö cu’nädö awä Edoodhe tösootoi cönaajä’maicho, suddau edhaajotoncomo mmaja, täneejuca’como Caadideea ñancomo mmaja.

²² Yaawä Edoodhía nnedö cönoomomöi yääwashinchädööcomo döiña. Töwö cönänwai ñeenedööcomooje. Edoodhe wacö’je cönänwaacä, chääjadoncomo wääwashinchädö wacö’je mmaja. Yääje yeijäcä Edoodhe cönä’döaacä ñäädä wodi wwä: —Ämjummadö ane’ca’cä öwwä, wäntuiye yaawä; quee.

²³ Töwö jäduuje cönääcammai chäwwä; cönä’döaacä: —Ane’catäädö woije u’jai wa, tameedä öwwä naadö annai tödööene; quee cönä’döaacä Edoodhe.

²⁴ Ñäädä wodi cöneeja’cai yaawä. Senö cöneecamma’joi yaawä: —¿Ane’cäämö wane’ca’anä; quee cönä’döaacä. Yeenö cönä’döaacä: —Juan Wautiita ju’jä e’ca’cä; quee.

²⁵ Yaawä dea mma ñäädä wodi cöntämä Edoodhe döiña; cönä’döaacä chäwwä: —Eduuwa dea mma Juan Wautiita ju’jä wijumma, jadaaji aca; quee cönä’döaacä.

²⁶ Yaawä cajiichaana Edoodhe cone’da cönä’döjoi jooje. Yaawääne’, tönancödö netaadöcoomoje jäduuje ñäädä wodi wwä töwääcamma’jödö weijäcä, ta’deddu iiñaca’se’da cönä’jaacä.

²⁷ Yaawä dea mma cajiichaana Edoodhe suddau cönaanontäi Juan Wautiita ju’jä wetä.

²⁸ Ñäädä cöntämä yaawä; Juan cömjöncätäi. Iju’jä cönnejä yaawä jadaaji aca. Wodi wwä cuntui yaawä; ñäädä wodi cuntui yaawä senö wwä.

²⁹ Yää eta’jäcä Juan nowaanomaadö wwä tönwanno cöntonto yaawä Juan equeejödö wetä. Cönaadoicho yaawä ewaacadö wetä.

Ijaatoodea miide soto ewanshincho’jocoomo

³⁰ Ñanno anonta’como cöne’jummaicho yaawä Jesuuquidiito döiña. Chäwwä cöneecammajäätöicho tameedä tönnö’jocoomo, tönoowanooma’jocoomo mmaja.

³¹ Yaawä Jesuuquidiito cönä’döaacä chäwwäiñe: —Töudäje ma’chomo; soto ’jemjönö aca cäädeetätantäiye a’dhe; quee. Töwö yääje cönä’döaacä jooje soto we’jätöödöcoomo weijäcä, täwanshinchojootäiñe’da’jödöödä.

³² Yääje mma yaawä cudiiyada awä töjääcäjeeneiñe Jesuuquidiito cöntonto anonta’como jadä, soto ’jemjönö aca.

³³ Sotoocomo cöneenea’to iichädööcomo; dhowaanäcäiñe cönä’jaacä Jesuuquidiitoje yeichö. Yaawä ñanno soto, jata waadoinchomo, macääcä cöntonto tamjä’ne; Jesuuquidiito owaajodäiñe cönä’döicho iiña.

³⁴ Cudiiyada acanno Jesuuquidiito wä’ta’jäcä töwö cöneedantoicho ñanno jooja’como soto. Wentumje cöneene’ma’to, oweeja tädhaajäquemjöncomo nönge yeichomjäcä. Yaawä töwö cönoowanooma’to numa.

³⁵ Cho’momjai yä’döa’jäcä ñoowanoomadö cöneejoto chäwwadäädä; cönä’döa’to chäwwä: —Cho’momöödö mädä; jata ’nacäi caato.

³⁶ Canno soto täwanshiche’da naato. Yääje yeijäcä enno’jacooto jataaca, amoinche’da naadö aca, täwanshiñööcomo aneejemaataiyeto; quee cönä’döa’to.

³⁷ Yaawä Jesuuquidiito cönä’döaacä chäwwäiñe: —Änwannoone ewanshinchätääcä; quee. Ñoowanoomadö cönä’döa’to chäwwä: —¿Aaquene mmaja amoojadä sotooto ’cäwa’cä jödaata äwanshi ñaa aneejemaadö deeade’ canno ewanshiñööcomooje? quee cönä’döa’to.

³⁸ Jesuuquidiito cönä’döaacä chäwwäiñe: —¿Ä’waasa’cä uu nai äwwäiñe? Yä’cä eneetantäcä; quee. Töwwäiñe eneea’jäcä ñoowanoomadö cönä’döa’to: —Ijaatoodea uu i’yaca’jödö na, na’cwacaano’cä aacä mma; quee cönä’döa’to.

³⁹ Yaawä Jesuuquidiito soto cönaajimaajoicho wannai, woi a’taanö de’wä.

⁴⁰ Soto cönaatajiimajäätöicho yaawä wannai, aneetaja ijaatoodea soto soto, aneetaja aacä soto soto.

⁴¹ Jesuuquidiito uu cönannäjöi yaawä, yää ijaatoodea i’yaca’jödö, na’cwacancomo’cä mmaja, a’nädäncädä. Caju ña ene’mancädä yää äwanshi jäcä cöna’deuwöi. Uu cöni’yajäätöi yaawä. Tönoowanoomadö wwäiñe cuntui yaawä soto wwäiñe ecaamodö wetä. Ñanno aaconcomo na’cwacancomo’cä mmaja cöneecamoi chea chääwaadäiñe.

⁴² Tameedäädä cönääwashinchoicho yaawä, töwensu’tädööcomo wa’cä.

⁴³ Yää ’jeje uu i’yajä’ajä wäädetö’jödö cönancuicho yaawä, na’cwacancomo’cä wäädetö’jödö mmaja, amoojadooto de’wä aacä wöwa.

⁴⁴ Ñanno töwääwashinchaamo’jödö cönä’ja’to ijaatoodea miide dhanwaacomo.

Tuna de’wä Jesuuquidiito wötä’jödö

⁴⁵ Yääje mma yaawä cudiiyada awä Jesuuquidiito tönoowanoomadö cönenno’jaicho towaajo, Wesaada ña, chu’jä mänsemjona. Töwö mmaane cöno’nomjoi yäätä, soto wwäiñe wääcammanääje.

⁴⁶ Yaawä soto enno’jadööcomo’jo töwö cöntämä jöö de’cäi, Wanaadi wwä a’deuwe.

⁴⁷ Yaawä cho’monga’jäcä ñoowanoomadö cönä’ja’to cudiiyada aca chu’jä ännawääne. Jesuuquidiito mmaane macäi cönä’jaacä töjääcäjeene.

⁴⁸ Töwö cöneeneaacä töweetamincha yeichöcoomo sheequimmaatö, aneiñajaadädä jejeichä wwä adäädöcoomo weijäcä. Yaawä yääwadöncataame yöiñaiñe Jesuuquidiito cöntaacä tuna de’cäcä. Töwö ija’dätä’seiñe cönä’jaacä.

⁴⁹ Tuna de’cäcä iichädö edanta’jäcä ñoowanoomadö wwäiñe, tösaadöcoomoje cöncä’tömöicho yaawä; äcaatomjä atäi cöneecanö’a’to.

⁵⁰ Tameedäädä tönwanno cönääcatoncaicho eneedö’jo. Yaawä dea mma Jesuuquidiito cöna’deuwöi chäwwäiñe; cönä’döaacä: —Ääcatonca’daane eichäcä, öwö mma. Tösaade’daane eichäcä; quee cönä’döaacä.

⁵¹ Töwö cönä’täi yaawä cudiiyada aca, yää dhawä cönä’ja’todö aca. Jejeichä cöneedennai yaawä. Tönwanno yeicho’como ’je’da cönä’jaacä yaawä töwääcatonca’jocoomo weijäcä.

⁵² Tönwanno yää täneemö tödö’jödö äntö’tammecö’da cönä’ja’to, yää uu ejannäjö’jödö, chäänönge’da dea chö’tajäätödööcomo weijäcä.

Jeneesade ña cädäija’como adonca’jödö

⁵³ Mänsemjona tönwanno cönä’döicho yaawä, Jeneesade ña, cudiiyada i’wadö’tädööje mma.

⁵⁴ Cudiiyada acanno yä’ta’jäcäiñe soto cöneedantoicho Jesuuquidiito.

⁵⁵ Yaawä ñanno soto ä’sa waadäi cönäätujiiya’to; cädäija’como cönaadäa’to Jesuuquidiito döiña, chä’wötööcomo jo, yäätä yeichö töneeta’jocoomo döiña.

⁵⁶ Jata she’coto’cä aca iicha’jäca, adai’joto aca jeiñe mma, jata tö’cäcä jeiñe mma, ñanno soto cädäija’como tömja’ca cönä’ja’to jödo’na. Ñanno cädäija’como töwä’döe cönä’ja’to Jesuuquidiito wwä: —Owoomö a’sadö mma ñaa najoojo’ñojo; quee. Tameedä ajoojonnamo’jödö töwaadonca cönä’ja’to.