MAADOCO 4 - Wanaadi A'deddu

Ñaatö’tänei dö’seeno

¹ Yaawä Jesuuquidiito cönaajäntäi chea soto owaanomaadöcoomo chu’jä jawä. Jooje soto tödöiña yeejumma’jocoomo weijäcä töwö cönaatajiimai cudiiyada aca, ije’waca cönä’ja’dö aca. Tameedä soto shuucu cönä’ja’to chu’jä jawä.

² Yaawä töwö anejjejaiñene’jödöödä cönoowanooma’to yö’seeno joi ecamma’jä’ancädä. Edääje cönä’döaacä ñanno soto owaanomaadawäiñe:

³ —Etaatäcä. Ñaatö’tänei cönnatö’taacä.

⁴ Chäwwä ñaatö’tädaawä dhantai dhadöödö cönä’mei ääma taawä. Tadiiñaamo cöneejoto yaawä, dhadöödö cöneena’jätöicho.

⁵ Dhantai dhadöödö cönä’mei toojajaato de’wä. Jadheedä cöna’tai, sö’je’da nono weijäcä.

⁶ Yaawääne’, shii weja’ca’jäcä cöiñatui; tömiiche’da yeijäcä cuiñu’tai yaawä.

⁷ Dhantai ’chene dhadöödö cönä’mei wesooca ’jano de’wä. Ya’ta’jäcä yää wesooca cöna’tai chea; cöneetatannä’cai yaawä. Yää dhadöödö ejössata’da cöneiyacä yaawä.

⁸ Anejja dhadöödö aashichaato nono de’wä cönä’mei. Yää cöna’tai yaawä; cöneejössatai yaawä. Dhantai tooni sotooto de’wä amoojadä cönä’jaacä tooni dhadöödö wa’taajä ejeedödö; dhantai ’chene aaduwaawä soto, dhantai mmaane ijaatoodea soto; quee cönä’döaacä Jesuuquidiito.

⁹ Yaawä töwö cönä’döaacä chäwwäiñe: —Eta’sato neta’ñojo; quee.

Jesuuquidiito wwä yö’seenoje ecammajäätö’jödö

¹⁰ Yää ’jeje soto jadäiñe Jesuuquidiito weichö, ñanno yö’tä cönä’ja’todö, amoojadooto de’wä aaco’como ñoowanoomadö mmaja, Jesuuquidiito cöneecamma’joicho yää yö’seeno jäcä.

¹¹ Töwö cönä’döaacä chäwwäiñe: —Änwanno äwwäiñe u’ajä na Wanaadi töcaajichaanaije weiñä jäcä owoowanoomato’como, yää owaanojöönö’jödö. Anejjacoomo wwä mmaane yö’seeno joi ecammadö;

¹² täne’ma ene’mataame aneene’da eiyeto, tätaajä’e etaajä’taame aneeta’da eiyetoode; töweichöcoomo mma änsa’dumincha’noto, choone’nadiiyöcoomo täncwanno’jo ei’ño yaawä; quee cönä’döaacä Jesuuquidiito.

Ñaatö’tänei dö’seeno jäcä ecammajäätö’jödö

¹³ Edääje mmaja töwö cönä’döa’dea chäwwäiñe: —Mädä yö’seeno mmädä odhoowanääcäiñe’da näätaadö naane’; ¿aaquene mmaja anejja yö’seeno maneetatäädö deeade’ ?

¹⁴ Ñäädä ñaatö’tänei Wanaadi a’deddu ecammajä’nei cu’tädööje na.

¹⁵ Anejja wwä Wanaadi a’deddu ecammajäätödö eta’jäcä, Caajuushawa ne’a yaawä; yää Wanaadi a’deddu etaajä chö’tajäätödö acanno nichö’taque’ja yaawä. Ñäädä cu’tädö yää ääma taawä dhadöödö cönä’meichö.

¹⁶ Yää dhadöödö toojajaato de’wä cönä’meichö mmaane, ñanno ta’cwaiñe Wanaadi a’deddu etannamo cu’tädö yää.

¹⁷ Tömiiche’daane tönwanno, a’dhe töweiyaamo mma. Wanaadi a’deddu jäcäinchädä yeetunu eneea’jäcä, wätä’maminchajoonä jeiñe mma, yaawä dea mma ne’nomjaato.

¹⁸ Yää dhadöödö wesooca ’jano de’wä cönä’meichö ’quene, Wanaadi a’deddu etannamo cu’tädö yää,

¹⁹ ñanno edä nono de’wono ijummannamo, mösooma ijummadö ca’como wätäncu’tädö. Anejjeja’como jadä’jödöödä tumjumma yaawä tönwanno. Tameedä yää Wanaadi a’deddu na’dua, aashicha aneejannä’ca’da yeichö wetä.

²⁰ Yää dhadöödö aashichaato nono de’wä cönä’meichö mmaane, aashicha Wanaadi a’deddu etannamo cu’tädö yää. Ñanno jäcäiñe Wanaadi a’deddu aashicha nejanga yaawä. Dhantai ñaato yää tooni sotooto de’wä amoojadä chääjedöödö cönä’ja’dö nönge; dhantai ’chene aaduwaawä soto chääjedöödö cönä’ja’dö nönge; dhantai ’chene ijaatoodea soto chääjedöödö cönä’ja’dö nönge; quee cönä’döaacä Jesuuquidiito.

Adhaawa dö’seeno

²¹ Edääje mmaja Jesuuquidiito cönä’döa’dea chäwwäiñe: —¿A’täi o’nä tödööemööje ca adhaawa emjannaajä töweiye nai, wöwa o’nä jeiñe mma? Ng’jn, dha’täi ye’wä tödööemö jeene.

²² Tameedä etoone’taajä töwääcatu’nacaamöje na; tameedä tacaademjönö töweecataamöje na dea.

²³ Eta’sato neta’ñojo; quee cönä’döaacä Jesuuquidiito.

²⁴ Edääje mmaja cönä’döa’dea töwö: —Aashichaane etaatäcä. Änwanno mätämmencajaato’de anemmenca’jocoomo nönge dea, cho’jodhe jeene mmaja.

²⁵ Ñäädä töweiyato wwä jooje’cä nä’tua’de. Ñäädä a’cato mmaane nätänwajiiñaja’de yää she’caasa töwwä naadö que; quee cönä’döaacä Jesuuquidiito.

Dhadöödö wa’tadö dö’seeno

²⁶ Edääje mmaja Jesuuquidiito cönä’döa’dea: —Edääje na Wanaadi cajiichaanaje yeichö, dhanwa dhadöödö audaajä awä tönnatö’tä töweiye naichöje.

²⁷ Töwö coijai nönö’ca, ano töwä’jä, dhadöödö wa’tätaame, yaatö’nä’taame mmaja, ya’tatoojo dhowaanäcä’da yeichaame.

²⁸ Nono töwoije natö’nä’a; awa’deene chääjö mma, yää ’jeje dhajäädö, yää ’jeje jeene chääjedöödö jaiñoone.

²⁹ Chääjedöödö wau’cwanga’jäcä jeene acäätädö yaawä, shoomatoojo cu’nädö aca yä’dö’jödö weijäcä; quee cönä’döaacä Jesuuquidiito.

Wishu adöödö dö’seeno

³⁰ Edääje mmaja Jesuuquidiito cönä’döa’dea: —¿Ane’cäämö nönge Wanaadi cajiichaanaje yeichö nai, quee ’ja? ¿Ane’cäämö yö’seenoje ecammato’me nai, quee ’ja?

³¹ Wishu adöödö ñaatö’taajä töweiye naichöje na. Yää adöödö she’caasa töweiye nai, anejja adöödö o’näiñe.

³² Ñaatö’tä’jeje na’ta yaawä adai’jä, anejja natö e’jodhe’cä; töwaajäta mmaja yaawä. Yaawä tadiiñaamo dho’nä äädeetajai; quee cönä’döaacä Jesuuquidiito.

Yö’seeno töneecammajä’e Jesuuquidiito wei’jödö

³³ Jooje mädä nöngato yö’seeno que dea Jesuuquidiito chäwwäiñe töneecammajä’e cönä’jaacä Wanaadi a’deddu, etaajai yeichöcoomo woije.

³⁴ Yö’seeno que’da chäwwäiñe a’deuwö’da töweiye cönä’jaacä. Tönoowanoomadö wwäiñe mmaane dhai töneecammajä’e cönä’jaacä.

Jesuuquidiito wwä jejeichä edennanö’jo’jödö

³⁵ Yää anooto co’momöödawä töwö Jesuuquidiito cönä’döaacä tönoowanoomadö wwäiñe: —Ma’chomo; chu’jä mänsemjona queedä’täiye; quee.

³⁶ Tönwanno soto cönnämäicho yaawä. Jesuuquidiito cönaadoicho yaawä dhawä cönä’ja’dö awäädä. Anejja cudiiyada mmaja chääjadäiñe cönta’dea.

³⁷ Yääje mma yaawä jejeichä cönaajäntäi yaawä, joojato. Cudiiyada cönaadö’taacä madaataca que.

³⁸ Jesuuquidiito wönö’näje cönä’jaacä inwaju’jaca, camiisha de’wä. Tönwanno cönemjacaicho; cönä’döa’to chäwwä: —Owaanomaanei, ¿cone’da ayöödö’da nai cöwä’jajoodöcoomo?

³⁹ Jesuuquidiito cönä’jäi yaawä. Jejeichä cöneedennanö’joi yaawä. Töwö cönä’döaacä tuna wwä: —Adheedennacä; uncwe’da eichä; quee cönä’döaacä. Jejeichä cöneedennai yaawä; tameedä uncwe’da cönä’jaacä.

⁴⁰ Yaawä Jesuuquidiito cönä’döaacä tönoowanoomadö wwäiñe: —¿Ane’que’nei tösaade maato dea? ¿Aaquene aneecamjö’da maato dea? quee.

⁴¹ Ñanno cönääcatoncaicho jooje. Tönwannoje dea cönä’döa’to: —¿Änääcöömääne määdhä? Jejeichä jadä’jödöödä dha’deddu töneeta, tuna mmaja; quee cönä’döa’to.