MAADOCO 3 - Wanaadi A'deddu

Dhamäädö töwaamo’mongato wei’jödö

¹ Yääje mma yaawä Jesuuquidiito cönoomomöi chea we’jummatoojo taca. Yäätä cönä’jaacä dhanwa dhamäädö töwaamo’mongato.

² Yäätoncomo soto Jesuuquidiito cöneene’ma’to; ¿adoncatai ’ja, wäädeetatoojo anooto yeichaame? quee töucwadööcomooje, chääjäcä cone’da töwa’deuto’como ejoodödö wetä yaawä.

³ Yaawä Jesuuquidiito cönä’döaacä dhamäädö töwaamo’mongato wwä: —Aanöncä, ä’cäde sadäädä.

⁴ Töwö Jesuuquidiito ñanno soto cöneecamma’joicho: —¿Ane’cäämö wäädeetatoojo anooto awä tödööemööje necammaanä waanontänä imennaajä? ¿Aashichaato ’ja, conemjönööne’ ? ¿Ewaanacaadö, emaadööne’ ? quee cönä’döaacä. Äucwätä’da mma ñanno soto cönä’ja’to.

⁵ Yaawä Jesuuquidiito ñanno cöneene’ma’to cone’da töweichö que. Töwö wentumje cönä’jaacä eta’se’da yeichomjäcä. Töwö cönä’döaacä dhamäädö töwaamo’mongato wwä: —Änwojoocä; quee. Ñäädä cönänwojoi; dhamäädö aashicha cönä’döi yaawä.

⁶ Yaawä ñanno jaadiseeo cöneeja’caicho. Tönwanno cöna’deuwa’to yaawä Edoodhe sotoi jadäiñe Jesuuquidiito emaatojo jäcä.

Tuna jawä jooja’como soto wei’jocoomo

⁷ Yääje mma yaawä Jesuuquidiito cöntämä chu’jä döiña tönoowanoomadö jadäiñe. Jooje soto Caadideea ñancomo chääjadä cöntonto dea.

⁸ Aashichaato Jesuuquidiito nödö’jödö eta’jäcä jooje soto cöneejoto yöiña, Judheea ñancomo, Jeduusadén ñancomo mmaja, Iduumea ñancomo mmaja, Joodadán mänsemjoncomo mmaja, Tiido ñancomo mmaja, Sidhón ñancomo mmaja.

⁹ Jooje soto weichomjäcä Jesuuquidiito tönoowanoomadö cönaanontoicho cudiiyada eseecajo, töwä’totoojoje, soto wwä tädennu’jodö queiñe.

¹⁰ Jooje soto adonca’jocoomo weijäcä Jesuuquidiito wwä tameedä cädäija’como töwaatadiimajä’ene chäwwadäädä töötä cönä’ja’to, ajoojodö wetä.

¹¹ Odo’shancomo wwä Jesuuquidiito eneea’jäcä tönwanno tä’mudhe töwä’döe töweiye cönä’ja’to ije’taca. Töca’tömjä’e töweiye cönä’ja’to: —Wanaadi nnedö amäädä; quee.

¹² Jesuuquidiito Wanaadi nnedööje töweichö ätä’täjo’da töweiye cönä’jaacä chäwwäiñe.

Amoojadooto de’wä aaco’como anonta’como

¹³ Yääje mma yaawä Jesuuquidiito cöntämä jöö de’cäi. Töwö cöna’dejjaicho ñanno tumjummadö dea mma. Ñanno cöne’jummaicho yöiña.

¹⁴ Töwö cöne’toicho amoojadooto de’wä aacä töjaadä töweiyaamoje, ecammajä’e tanontaamoje mmaja.

¹⁵ Chäwwäiñe cuntui ijääduduucomo cädäija’como adoncato’como, odo’shancomo ija’canö’joto’como mmaja.

¹⁶ Ñanno eetöcoomo cönä’jaacä: Simón, ñäädä Peedhodooje cöne’täichö;

¹⁷ Jacoowo mmaja, Seewedheeo nnedö; Juan mmaja, Jacoowo acoono. Ñanno Jesuuquidiito cöne’toicho Wooaneedejeeje; Yeetötöömadö nönga’como; quee töwä’dö’se yeichö.

¹⁸ Antedé mmaja cönä’ja’dea; Jediipe mmaja; Waadotoodomé mmaja; Mateo mmaja; Tomá mmaja; Jacoowo mmaja, ñäädä Aadeujeeo nnedö; Taadheo mmaja; Simón mmaja, ñäädä jäduujato dha’deddu;

¹⁹ Juudha Icaadiyoote mmaja, ñäädä Jesuuquidiito u’nei’jödö dea. Yääje mma yaawä Jesuuquidiito cönoomomöi ä’saca, tönoowanoomadö jadäiñe.

Odo’sha ’je Jesuuquidiito e’tä’jödö

²⁰ Yaawä soto cöne’jummaicho dea yöiña, aneewashinchäjo’daiñe tödööene.

²¹ Yää eta’jäcä Jesuuquidiito jimmä wwäiñe tönwanno cöneejoto yöiña adäädö wetä, tö’jeta töwwäiñe Jesuuquidiito tö’tadö weijäcä.

²² Judhío owaanomannamo, ñanno Jeduusadén ñancomo we’a’como, cönä’döa’to: —Weesewú ’je määdhä na, ñäädä odo’sha edhaajotoncomo. Ñäädä jäduuduje odo’shancomo tömja’canö’jo weneene; quee cönä’döa’to.

²³ Yaawä Jesuuquidiito cöna’dejjaicho ñanno. Töwö yö’seeno joi cöna’deuwöi chäwwäiñe; cönä’döaacä: —¿Aaquene mmaja Caajuushawa töwwäädä ääja’canö’jodö deeade’ ?

²⁴ Yää jataawoncomo dea wewäänä’ta’comjäcä, töwaatame mma ataamejai ñaato.

²⁵ Yää maa tawoncomo dea töwwäädäiñe yä’tu’de’ta’comjäcä, ataamejai mmaja.

²⁶ Mädääje mmaja Caajuushawa, töwwäädä yä’tu’de’ta’jäcä, töwwäädä yeewänä’ta’jäcä mmaja, numa jäduujeedä eijai’cha yaawä; töwaatame mma ataamejai ña.

²⁷ “Anejja omomjai’cha na jäduujato mmai chaca inshomaadö que enwajiiña, imööjätöödö’jo’da. Imööjätöödö’joone adääjai ña inshomaadö.

²⁸ “Chäänönge yääje wä’döa äwwäiñe, tameedä soto cone’nadiiyöcoomo ätäncwanno’jojai ña, tameedä cone’da ya’deuwödööcomo mmaja.

²⁹ Epíiditu Santo jäcä cone’da wa’deunä mmaane ätäncwanno’jojai’cha na; yeichöje choone’nadiiyö na’de; quee cönä’döaacä Jesuuquidiito.

³⁰ Töwö yääje cönä’döaacä odo’sha ’je tä’tä’jödö weijäcä chäwwäiñe.

Jesuuquidiito dhenö weejö’jödö, dhacontomo mmaja

³¹ Yää ’jeje Jesuuquidiito acontomo cöneejoto yöiña, yeenö mmaja. Tönwanno jödo’na cönä’ja’to; Jesuuquidiito cöna’dejjaja’to.

³² Ñanno soto, Jesuuquidiito awoodhecääcä cönä’ja’todö, cönä’döa’to chäwwä: —Aanö adha’dejja, adhaacontomo mmaja; jödo’na naato; quee cönä’döa’to.

³³ Yaawä Jesuuquidiito cönä’döaacä: —¿Änääcö ñäädä aanö, quee ’ja? ¿Änä’camo ñanno adhaacontomo, quee ’ja?

³⁴ Töwö cöneene’ma’to tawoodhecooconcomo wataajimaadö; cönä’döaacä yaawä: —Canno ñanno maama, yaacontomo mmaja.

³⁵ Ñäädä Wanaadi woije tödöönei, ñäädä ñäädä yaacono, jaaduichö mmaja, maama mmaja; quee cönä’döaacä Jesuuquidiito.